¿Pitaq Diosqa?

1. ¿Imanasqam Diosllata yupaychana?

Diosmi tukuy imata unancharqa. Payqa wiña-wiñaypaq Diosmi (Salmo 90:2). Bibliaqa paymantam allin noticiakunata willawanchik (1 Timoteo 1:​11). Vida qowasqanchikraykum payllata yupaychaspa servina. Leey Apocalipsis 4:​11.

2. ¿Imaynataq payqa?

Manam pipas Diostaqa haykapipas rikurqachu, payqa ñoqanchikmanta aswan atiyniyoq mana rikuy atina espiritum (Juan 1:18; 4:24). Chayna kaptinpas unanchasqankunapi reparaspam yachachwan imayna Dios kasqanta. Tukuy rikchaq unanchasqan frutakunawan waytakunam qawachiwanchik kuyawasqanchikta chaynataq yachayniyoq kasqanta. Cielopipas tukuy ima unanchasqanmi qawachin tukuy atiyniyoq kasqanta. Leey Romanos 1:20.

Diostaqa reqsichwantaqmi Bibliata leespapas. Chaypim willawanchik runakuna kuyapayasqanta, ima munasqanta chaynataq imam mana munasqantapas, hinaspa imapas pasaptin imayna sientesqanmantapas. Leey Salmo 103:​7-​10.

3. ¿Sutiyoqchu kanman?

Jesusmi nirqa: “Hanaq pachapi Taytayku, sutiki yupaychasqa kachun”, nispa (Mateo 6:9). Huk rimaykunawan reqsichikuptinpas sutinqa chullallam. Ima idioma rimasqankuman hinam Diospa sutintaqa rimanku. Quechuapiqa Jehová nispam rimanchik. Bibliam Diosmanta nin: “Sutikiqa Jehová kasqantayá lliw runakuna yachachunku, qamllam kay pachapa altonpi Kamachiqqa kanki” (Salmo 83:18, NM). Apocalipsis 19:​6 nisqanpipas ninmi “¡Aleluya!”, nispa. Chay ninanqa alabasqa kachun Jah otaq Jehová ninanmi.

Achka Bibliakunapim Diospa sutinpa rantinpi tikranku: “Dios” otaq “Señor” nispalla. Qallariypiqa yaqa qanchis waranqa kutitam Diospa sutinqa Bibliapi rikurirqa. Jesusqa taytan Jehová Diosmanta yachachispanmi sapa kutilla taytanpa sutinmanta willarqa. Leey Juan 17:​26.

Qaway “¿Kanmanchu Diospa sutin?” niq videota.

4. ¿Reparanmanchu ñoqanchikpi?

Awriki, anchatam kuyawanchik. Chayna kaptinqa, ¿imanasqataq ñakariykuna kananta saqen? Hukkunam ninku pruebawananchikrayku castigawasqanchikta. Chayna nisqankuqa llullam. Leey Santiago 1:​13.

Diosmi unanchawarqanchik imayna kawsakuyta akllakunanchikpaq. Chaymi allin kanman payta servinapaq tanteakuyninchikqa (Josuey 24:15). Ichaqa achka runakunam mana allinkunata ruranankupaq kawsanku, chaymi ñakariyqa llumpayta mirarun. Chaykunata qawaspanmi Jehová Diosqa anchata llakikun. Leey Genesis 6:​5, 6.

Jehová Diosqa kuyawasqanchikrayku chaynataq kusisqa kawsananchikraykum ñakariykunata hinaspa ñakarichiwaqninchikkunata chinkachinqa. Ñakariykuna kananpaq imanasqa saqesqantam Diosqa yachan. 8 kaq yachachikuypim chaymanta astawan yachanki. Leey 2 Pedro 2:9; 3:​7, 13.

5. ¿Imaynatam Diosman asuykuchwan?

Jehová Diosqa munanmi oracionnintakama payman asuykunanchikta. Payqa llapallanchikmantam nanachikun (Salmo 65:2; 145:18). Huchanchik pampachaytapas munanmi, reparantaqmi munayninta ruranapaq atisqanchikman hina kallpanchakusqanchikpipas. Pantaqña kaspanchikpas atichwanmi paypa amistadnin kaytaqa. Leey Salmo 103:​12-​14; Santiago 4:8.

Payrayku kawsaspanchikmi Jehová Diosllata tukuy sonqonchikwan kuyananchik (Marcos 12:30). Dios kuyasqanchiktataqmi qawachisun paymanta astawan yachaspanchik chaynataq kamachikuyninkunatapas kasukuspa. Chaynata ruraspanchikmi payman astawan asuykusun. Leey 1 Timoteo 2:4; 1 Juan 5:3.