¿Imamantam Jesusqa salvawanchik?

Qallariymantapacham runaqa mozo-sipaslla kaspa wiña-wiñaypaq kawsakuyta munarqa. Ichaqa manam chaynachu, llapanchikmi wañuqlla kanchik. Hanaypi rikuriq textotam Job qillqarqa yaqa kimsa waranqa wata ñawpaqtaraq. Chaywanpas chiqapmi nisqanqa.

Lliwmá mana wañuspa kawsakuyta munanchik. Chayraykuchá Bibliapiqa nin sunqunchikpi wiña-wiñaypaq kaqkunamanta piensanapaq Dios churasqanta (Eclesiastes 3:11). ¿Yaqachu kuyakuq Dios sunqunchikpi chayta churanman karqa wañuqllata unanchawachkaspanchik? Manamiki ¿aw? Bibliaqa ninmi wañuyqa enemigonchik hina kasqanta hinaspa chinkachisqa kananmantapas (1 Corintios 15:26).

Manamá enemigonchik kasqanmantaqa iskayrayachwanchu. Allin serniyuq runaqa manam wañuytaqa munanmanchu. Aswanqa wañuymanta lluptinapaqmi tukuyta ruwanchik. Unquspanchikpas chayllam hampikunapaq imatapas ruwanchik.

¿Yaqachu pasaypaqta wañuyqa chinkanman? Arí. Diosqa manam as watakunalla kawsaspa wañunallapaqchu unanchawarqanchik, aswanqa kay pachapi wiña-wiñaypaq kawsakunapaqmi. Diospa nisqanqa cumplikunqapunim (Isaias 55:11).

Chaynaqa, ¿imaynatam Jehova Diosqa wañuyta chinkachinqa? Runakunaqa una-unay watakunañam wañuy chinkachiytaqa munarqaku, ichaqa manam kunankamapas atinkuchu. Yachaysapa runakunam unquykunata hampinankupaq tukuy rikchaq hampikunata ruwarqaku. Hinallamá kunankamapas runakuna imayna ruwasqa kasqanmanta yachayta maskachkanku. Chaywanpas manaraqmi atinkuchu wañuymanta hampi tariytaqa. Bibliaqa ninmi llapallanchik ñutu allpaman kutiykusqanchikta (Eclesiastes 3:20).

Chayna kaptinpas sumaq willakuykunam kan, manam runachu sasachakuyninchikkunata allichanqa, aswanqa Jehova Diosmi. Payqa churintam qurqa ñuqanchikpa rantinchikpi wañuspan wañuymanta librawananchikpaq.