¿Imataq religionkunata pasanqa hamuq tiempopi?

1. ¿Llapallan religionkunachu allin?

Lliw religionkunapim kan llampu sonqo runakuna. Paykunapi reparaspanmi Diosqa anchata valoran. Ichaqa religionpi kaqkunam tukuy mana allinta ruranku (2 Corintios 4:​3, 4; 11:​13-​15, NM). Noticiakunapim uyarinchik wakin religionkunaqa terroristakunaman sayapakusqankuta, guerrakuna otaq wañuchinakuykuna kaptin chaqrukusqankuta chaynataq warmachakuna abusasqankumantapas. Chaykunam llampu sonqo runakunata hukmanyachin. Leey Mateo 24:​3-5, 11, 12.

Cheqap religionqa Jehová Diostam hatunchan, pantay religionñataqmi sonqonta nanachin. Pantay religionqa Diosmanta hinaspa wañusqakunamantam llullata yachachin chaynallataq Bibliapa mana yachachisqan huk yachachikuykunatapas. Jehová Diosqa munanmi cheqap yachachikuykunamanta yachanankuta. Leey Ezequiel 18:4; 1 Timoteo 2:​3-5.

2. ¿Imam pasanqa religionkunata hamuq tiempopi?

Diostam kuyani nispa Satanaspa munaynin ruraq religionkunaqa manam Jehová Diospa agradonpaqchu (Santiago 4:4). Bibliam pantay religionkunata ‘Hatun Babiloniawan’ sutichan, Noeypa tiemponpi Sinchi para pasasqan qepata Babilonia sutiyoq llaqtapi pantay religionkuna qallarisqanrayku. Jehová Diosqa chayllam chinkachinqaña runakunata engañaspan ñakarichiq religionkunataqa. Leey Apocalipsis 17:​1, 2, 5, 16, 17; 18:8.

Pantay religionpi kaq llampu sonqo runakunapi reparaspanmi Jehová Diosqa llaqtanman paykunata huñuchkan. ¿Imaynata? Cheqapmanta yachachispanmi. Leey Miqueas 4:​2, 5.

3. ¿Imatam rurananku llampu sonqo runakunaqa?

Jehová Diosqa reparanmi cheqap yachachikuyta kuyaq hinaspa allin ruray munaq runakunapi. Chaymi kallpanchan pantay religionmanta chaylla lloqsinankupaq. Diosta cheqapta kuyaqkunaqa kallpanchakunankum imayna kawsasqankuta cambianankupaq. Leey Apocalipsis 18:4.

Jesuspa apostolninkuna allin noticiamanta willakuptinkum achka runakuna kallpanchakurqaku Diosta servinankupaq. Jehová Diosmi paykunaman yachachirqa suyakuyniyoq kusisqa kawsakunankupaq. Paykuna hinam ñoqanchikpas allin noticiamanta uyarispa Jehová Dios yupaychayninchikta puntapi churananchik. Leey 1 Tesalonicenses 1:​8, 9; 2:​13.

Jehová Diosqa kusikuywanmi chaskin pantay religionmanta lloqsikuspa paytaña yupaychanankupaq kallpanchakuqkunataqa. Paykunaqa Diospa amistadnintawan cheqap cristianokunapa kuyakuynintam tarinku chaynataq wiñay kawsay suyakuytapas. ¿Munawaqchu chay bendicionkuna chaskiyta? Leey Marcos 10:​29, 30; 2 Corintios 6:​17, 18.

4. ¿Imaynanpim Allpa pachapiqa kusikuyllaña kanqa?

Llapallan pantasqa religionkunata Jehová Dios chinkachiptinmi runakunaqa hawkayaypiña kawsanqaku. Chay religionkunaqa manañam runakunata engañanqachu nitaqmi rakinachinqañachu. Llapallan runakunam Jehová Diosllata yupaychanqaku. ¿Manachu chaykunaqa allin willakuykuna kanman? ¡Mayna allinmi chayqa! Leey Apocalipsis 18:​20, 21; 21:​3, 4.