Allinta entiendechinapaq

IMAMANTAPAS willaylla-willanaykimantaqa kallpanchakuy imam willasqaykimanta allinta entiendechinaykipaq. Chaynata yachachispaqa allintam entiendechinki iñiqmasikikunaman otaq hukkunamanpas.

Sumaqta yachachinapaqqa yachanam imaynata rimaspa entiendechiyta. Chaypaqqa yanapasunkimanmi 26 kaq yachachikuypi “Ordenninpi yachachinapaq” nisqan chaynataq 30 kaq yachachikuypi “Uyariwaqninchikkunapi reparanapaq” nisqanpas. Kay yachachikuypipas astawanmi yachasun imaynata allinta entiendechinapaq.

Entiendesqanku palabrakunawan rimanapaq. Entiendechinapaq kaq palabrakunawan rimayqa uyariwaqninchikkunaman entiendechinapaqmi yanapan. Jesuspas chaynatam yachachirqa Ancha Reqsisqa Yachachikuyninpi, rimasqantaqa lliw runakunam entienderqaku. Chaypim yachachirqa imayna kusisqa kawsakuymanta, runamasinchikwan imayna kawsakuymanta, sasachakuykunata imayna atipanamanta hinaspa imapaq kawsasqanchikmantapas. Chayna yachachisqankunataqa ichapas wakinqa chayllaraq uyarinku, ichaqa paykunapaq hina kasqanraykum allinta entiendenku. Jesusqa yachachirqa uyariqninkunapa entiendesqanku palabrakunawanmi (Mat. 5-7 caps.). Bibliapiqa achka yachachikuykunamantam tarinki, wakinqa imamantapas willayllam-willawanchik, wakinñataq imapas imayna pasasqanmanta, wakinñataqmi piensarinapaq kaqkunamanta; chayna kaptinpas kallpanchakunaykim imamanta yachachisqaykita allinta entiendechinaykipaq.

Entiendesqanku kaq palabrakunawan rimaptikiqa sasa entiendena yachachikuykunatapas entiendenqakum. ¿Imaynatam chaynata entiendechiwaq? Imamantapas llumpayta rimaspaqa uyarisuqnikikunapa umantam nanachiwaq. Aswan allinnin kaq yachachikuykunata ordenninpi qellqay chaynataq chaywan tupaq wakin yachachikuykunatapas. Chaymantapas yachachisqaykiwan tupaq textokunallata akllay, leeruspaykipas allinta explicay. Entiendenankupaq kaqkunataqa ama yanqacharuychu llumpayta rimasqaykiwanqa.

Bibliamanta yachachispapas chaynata ruray. Aswan allinnin kaq yachachikuykunamanta entiendenanpaq yanapay, wakin yachachikuykunamantaqa kikin estudiaspanmi otaq huñunakuyninchikkunapi uyarisqanwanmi yachanqa.

Yachachisqanchikta entiendechinapaqqa allintam preparakuna. Yachachisqanchikta entiendenankuta munaspaqa kikinchikmi allinta entiendenanchik, allinta entiendespaqa atisunmi sapa punchaw rimasqanchikman hinalla rimaspa mayqen yachachikuymantapas allin yachachiyta.

Mana entiendesqanku kaqkunamanta yachachispaqa explicay. Ama piensaychu yachasqankupaqña nitaq mana entiendeq kasqankupaqpas. Bibliamanta yachasqaykiraykupaschá wakinpiqa ichapas ninki ‘wakillan’, “allin yuyayniyoq confianza sirviente”, ‘sapaq ovejakuna’ chaynataq ‘achkallaña runakuna’ niq palabrakunata. Chaykunamanta mana explicaptikiqa manam entiendenqakuchu mana Testigo kaqkunaqa (Rom. 11:5; Mat. 24:45; Juan 10:16; Apoc. 7:9). Chaynallataqmi kanman “congregacionkunata watukuq” otaq “Jesuspa wañusqanta yuyarinapaq” niptikiqa chaynataq “publicador” otaq “precursor” niptikipas.

Mana Testigo kaqkunaqa rimankutaqmi Bibliapi kaq wakin palabrakunata, chaykunamantapas allintam entiendechina. Wakinmi “Armagedon” nisqanta tupachinku bomba nuclear nisqankuwan Allpantinpi tukuy ima kawsaqkuna chinkarunanta, wakinñataqmi piensanku ‘Diospa munaychakuyninqa’ sonqonkupi otaq hanaq pachapi kasqanta, manam Diospa gobiernon kasqantachu. “Alma” nisqanmantañataq piensanku pipas wañuruptin animan, animon otaq espiritun hinalla kawsasqanta. Wara-waranqantin runakunañataqmi piensanku ‘chuya espirituqa’ Taytawan chaynataq Churiwan huk cuerpollapi kimsanku kasqankuta. Chaynallataqmi ‘amamá huchapakunkichikchu’ nisqanmantapas explicananchik Diospa kamachisqanman hina mana kawsasqankurayku (1 Cor. 6:18).

Bibliata mana leeqkunaqa manapaschá yachanqakuchu “Pablom qellqarqa...” otaq “Lucasmi nirqa...” niptillaykiqa, ichapas chayna sutiyoq kanman vecinonpas otaq amistadninpas. Chayraykum sutillata qawachinayki apostolmanta otaq Biblia qellqaqmanta rimasqaykita.

Ñawpa tiempopi imatapas imayna tupusqankumanta rimaspaqa uyariwaqninchikkuna entiendenankupaqmi yanapananchik. Ichapas rimachkawaq Noeypa rurasqan buquepa largon 130 metro kasqanmanta, anchonñataq 22 metro kasqanmanta, altonñataq 13 metro kasqanmanta; chaynallata niptikiqa manapaschá allintachu entiendenqaku (Gen. 6:15). Ichaqa astawanmi entiendenmanku maymanta maykama kasqanta otaq imayna sayayniyoq kasqanmanta willaptikiqa.

Entiendenankupaq astawan explicay. Imamantapas yachachisqaykitaqa manapaschá ima ninanmanta willasqallaykiwanchu entiendenqaku. Esdraspa tiemponpi Diospa Palabranta levitakuna leespaqa manam leeyllachu leerqaku aswanqa llaqtamasinkunamanmi ima ninan kasqanmanta explicarqaku chaynataq yachasqankuman hina imayna kawsanankutapas (Neh. 8:8, 12). Qampas chaynata yachachinaykipaq kallpanchakuy, allinta explicanaykipaq tiempochakuy chaynataq leesqayki textokuna imayna yanapasqantapas qawachiy.

Kawsarimusqan qepatam Jesucristoqa discipulonkunaman qawachirqa wañusqanwan kawsarisqanqa Diospa nisqanman hina cumplikusqanta. Yuyarichirqataqmi chaykunamanta testigo kasqankurayku imakuna ruranankutapas (Luc. 24:44-48). Uyariwaqninchikkunaman vidankupi imayna yanapasqanta entiendechiptinchikqa mana sasachakuspallam allinta entiendenqaku.

Entiendeypi sasachakuptinku. Mayna allinta explicaptinchikpas wakinqa manam entiendenqakuchu. ¿Imanasqa? Imamanta yachachisqanchikta mana uyariyta munasqankuraykum (Mat. 13:13-15). Chaynallataqmi mana iñiyniyoqkunapas Diospi iñiytaqa yanqapaq qawanku (1 Cor. 2:14). Chayna kaptinqa ichapas tanteachwan yapapiña paykunawan rimanapaq.

Wakin runakunaqa rumi sonqom kanku vidankupi imawanpas sasachakusqankurayku, chaymi yanapanapaq hinalla kallpanchakuptinchikqa ichapas tiempopa risqanman hina Diosmanta yachayta munanmanku. Azotesqa hinaspa wañuchisqa kananmanta discipulonkunaman Jesus willaptinpas manam entienderqakuchu. ¿Imanasqa? Manam chayna pasanantaqa piensarqakuchu nitaq munarqakuchu (Luc. 18:31-34). Ichaqa tiempo pasasqanman hinam 11 apostolninkuna chay nisqanta entienderqaku hinaspam Jesuspa kamachisqanman hina rurarqaku.

Imayna kawsasqanchikwanpas yanapachwanmi. Imamantapas entiendechinapaqqa manam rimayllachu rimana. Huñunakunanchik Salonman chayllaraq riptinku kuyakuywan chaskisqa kasqankutam achka runakuna yuyanku, manam imamanta yachasqankutachu. Chaynallataqmi cheqniwaqninchik wakin runakunapas kusisqa kawsakusqanchikta qawaspanku Diosmanta yachayta munanku. Wakinñataqmi sasachakuykunapipas kuyapayakuywan yanapanakusqanchikta qawaspanku cheqap religionpi kasqanchikta ninku. Diospa Palabranmanta entiendechispanchikqa reparanam imayna explicanapaq kasqanpi chaynataq imayna kawsasqanchikpipas.