Tapukuykunata Bibliawan contestanapaq

PIPAS creesqanchikmanta, imayna kawsasqanchikmanta, suyakuyninchikmanta otaq imapas pasasqanmanta imam piensasqanchikta tapuwaptinchikqa Bibliawan contestanapaqmi kallpanchakunchik. ¿Imanasqa? Diospa Palabran kasqanrayku, iñiyninchikpi hinaspa imayna kawsananchikpaq yanapawasqanchikrayku, kay tiempopi imanasqa imapas pasasqanmanta willawasqanchikrayku hinaspa Diospa prometesqanpi suyakuyninchik takyasqanraykum (2 Tim. 3:16, 17).

Chaymantapas Jehova Diospa testigon kasqanchikraykum Palabranta servichikunchik (Is. 43:12, NM). Chaymi Bibliapa nisqanman hina contestananchik, manam runapa piensasqanman hinachu. Runaqa imamantapas sapakamam hukniraqta piensanchik ichaqa Diospa piensasqanman hina piensanapaqmi Bibliawan yanapachikunchik, manam iskayrayanchikchu Palabranqa cheqappuni kasqanmanta. Kikinchikmi ima ruranapaqpas tanteakunchik. Chaymi imayna piensasqanchikman hina hukkunata hikutanamantaqa Bibliapa yachachisqanman hina yanapananchik kikinku tanteakunankupaq. Ñoqanchikpas apostol Pablo hinam munanchik ‘iñikuspa kasukunankuta’ (Rom. 16:26).

Jesucristomantam Apocalipsis 3:14 nin ‘cheqap kaq’ hinaspa “allin testigo” nispa. ¿Imaynatam Jesusqa tapusqankuta contestarqa hinaspa imatam rurarqa pruebanankurayku tapuptinku? Wakinpiqa rikchanachiykunawanmi piensarichinanpaq contestarqa. Wakinpiñataqmi tapuqninkunata tapurqa leesqanku textota imayna entiendesqankumanta hinaspam Diospa Palabranpi nisqanman hina contestaq (Mat. 4:3-10; 12:1-8; Luc. 10:25-28; 17:32). Chay tiempopiqa sinagoga nisqanku wasikunapim Diospa Palabranmanta wankusqa librokunata waqaycharqaku. Manam yachakunchu chay qellqakuna Jesuspa kasqanmantaqa, chayna kaptinpas allintam yacharqa hinaspam chay qellqakunapa nisqanman hina yachachirqa (Luc. 24:27, 44-47). Chaymi nirqa yachachisqanqa kikinmanta mana kasqanta aswanqa taytanpa kasqanmanta (Juan 8:26).

Ñoqanchikpas Jesus qatipakuytam munanchik. Jesus hinaqa manam haykapipas Jehova Diospa rimasqantaqa uyarirqanchikchu chaywanpas kapuwanchikmi Biblia, chayqa Diospa Palabranmi. Tapukuykunata contestanapaq Bibliata servichikuspaqa manam kikinchikpa piensasqanchiktachu qawachinchik. Pantaq runapa piensasqanman hina yachachinamantaqa kallpanchakunchikmi Jehova Diospa cheqap yachachikuyninmanta yachachinapaq (Juan 7:18; Rom. 3:4).

Diospa Palabrantaqa manam serviyllachu-servichikuna aswanqa uyariwaqninchikkunatam piensarichina. Imayna uyariwasqanchikman hinam tapuchwan: “¿Manachu Diospa Palabranqa cheqapta ninman? ¿Yachankichu chay rimasqanchikmanta Bibliapa ima nisqanta?”, nispa. Bibliam nin niptikiqa ichapas uyarisuqniki mana allinpaq hapinman hinaptinqa kaynatam niwaq: “Ñawpa tiempomantaraq kayna niq willakuymanta leeykapusqayki”, otaq niwaqmi “unay wataña ancha reqsisqa qellqam nin...”, nispa.

Wakinpiqa yachasqayki textotam umallaykimanta niwaq. Atikuptinqa allinmi kanman Bibliamanta leeynikiqa. Allinpaq kaptinqa uyarisuqnikipa Biblianmantapuni leey. Chaynata ruraspaykiqa sonqonmanmi chayanki (Heb. 4:12).

Astawanraqmi ancianokunaqa Bibliata servichikunanku tapukuykunata contestanankupaq. Pipas anciano kayta munaqqa ‘cheqap yachachikuyman’ hinam Diosmanta yachachinan (Tito 1:9). Ichapas mayqen iñiqmasinchikpas ancianopa consejasqanman hina ima rurananpaqpas tanteakunman, chaymi ancianokunaqa Bibliapa nisqanman hina consejananku. Ancianokunapa chayna yanapasqankuqa yanapanmanmi wakin iñiqmasinchikkunapas chaynata ruranankupaq.