¿Imaynatam familiakunaqa kusisqa kawsakunmanku?

1. ¿Imanasqataq autoridadpa kamachisqanman hina casarakuna?

Allin noticiakunamanta willawaqninchik kusisqa Diosninchikmi munan familiakuna kusisqa kawsananchikta (1 Timoteo 1:​11, NM). Paymi casado vidataqa qallarichirqa. Autoridadkunapa kamachisqanman hina casarakuyqa allinmi wawa-churikunata uywanapaq chaynataq kusisqa kawsakunapaqpas. Autoridadkunam casarakunapaq kamachikuykunata horqonku, chaykunatam cristianokunaqa kasukunanku. Leey Lucas 2:​1, 4, 5.

Diosqa munanmi casarasqakunaqa tukuy tiempo kuskalla kawsanankuta. Munantaqmi casarasqa kaqkuna warmillanpaq otaq qosallanpaq kanankutapas (Hebreos 13:4). Payqa cheqninmi divorciakuspa rakinakuytaqa (Malaquias 2:​16). Ichaqa saqenmi mayqenpas hukwan pierdekuptinqa divorciakuspa hukwanña casarakunanta. Leey Mateo 19:​3-6, 9.

2. ¿Imaynatam casarasqakunaqa kawsananku?

Jehová Diosqa warmitawan qaritam unancharqacasado vidapi yanapanakunankupaq (Genesis 2:18). Qosatam uma kananpaq churarqa, chaymi payqa familianta mantienenanpaq chaynataq Diosmanta yachachinanpaq kallpanchakunan. Señoranta kuyasqanraykum imapaqpas kallpanchakunan. Casarasqakunaqa kuyanakuspankum respetanakunanku. Kusisqa kawsanankupaqmi pantaq kasqankurayku pampachanakuyta yachananku. Leey Efesios 4:​31, 32; 5:​22-​25, 33; 1 Pedro 3:7.

3. ¿Sasachakuypi kaspankuchu rakinakunanku?

Casado vidapi sasachakuspaqa iskayninkum kallpanchakunanku kuyakuywan rimapayanakunankupaq (1 Corintios 13:​4, 5). Sasachakuyninkuta allichanankuraykum wakinqa rakinakunku, Diospa Palabranmi ichaqa mana chaynatachu yachachin. Leey 1 Corintios 7:​10-​13.

4. ¿Imatam Diosqa munan wawa-churikunapaq?

Jehová Diosqa munanmi wawa-churikuna kusisqa kawsanankuta. Chaymi mozo-sipas kayninkupi kusisqa kawsanankupaq yachachin. Munantaqmi tayta-mamankupa yachachisqanta kasukunankutapas (Colosenses 3:​20). Chaynataq paytawan Churinta servispa kusisqa kawsanankutapas. Leey Eclesiastes 11:9–​12:1; Mateo 19:​13-​15; 21:​15, 16.

5. ¿Imaynatam wawa-churinkuta kusisqa kawsanankupaq yanapanmanku?

Tayta-mamaqa kallpanchakunankum wawa-churinman mikuchinankupaq, pachachinankupaq chaynataq maypi yachanankupaq otaq tiyanankupaqpas (1 Timoteo 5:8). Chaymantapas yachachinankum Diosta kuyaspa payman rikchakuyta (Efesios 6:4). Dios kuyayninkuqa wawa-churinkupaqmi sumaq ejemplo. Diospa yachachisqanman hina uywasqaqa allinta piensanankupaqmi yanapan. Leey Deuteronomio 6:​4-7; Proverbios 22:6.

Wawa-churikunaqa imapas allin rurasqankumanta kallpanchaykunatam munan. Wakinpiqa allinpunim corregiyqa, chaynata ruraspankum tayta-mamakunaqa mana allin ruraykunamanta karunchanqaku (Proverbios 22:15). Manam ichaqa hukmanyarunankupaq hinachu corregina. Leey Colosenses 3:21.

Jehová Diospa testigonkunam achka librokunata ruranku tayta-mamakunapaqwan wawa-churikunapaq. Yachachikuyninkunaqa Bibliapa nisqanman hinam kachkan. Leey Salmo 19:​7, 11.