Diospa ñanninta allichaqpa nacesqan

Elisabetpa unqukunan punchawkuna chayaramuptinmi Mariaqa kimsa killa yanapasqanmanta Judeapi kaq Nazaret llaqtanman kutikurqa. Mariapas suqta killamantaqa unqukunanñam karqa.

Chay punchawkunallam Elisabetqa mana sasachakuspallan unqukururqa, wawanpas sanoy-sanoymi karqa. Chaymi payqa Zacarias qusanpiwan kusisqallaña karqaku, ayllunkunamanpas hinaspa riqsinakusqankunamanpas wawanta qawachiptinmi kusikurqaku.

Chaymantam Diospa kamachisqanman hina pusaq punchawninpi wawankuta qari kaychanpi señalachirqaku (Levitico 12:2, 3). Chay punchawtaqmi sutinta churananku karqa, hinaptinmi Zacariaswan wakin sutichayta munaptinku Elisabet nirqa: “Sutinqa Juanmi kanqa”, nispa (Lucas 1:60). Chayna sutiyuq kananpaqqa Diospa angelnin Gabrielmi willakurqaña.

Ayllunkunawan riqsinakusqankunañataqmi nirqaku: “Manam pipas aylluykipiqa chayna sutiyuqqa kanchu”, nispa (Lucas 1:61). Chaymi Zacariastapas makinkuwan rimaspanku tapurqaku churinta imawan sutichay munasqanta. Zacariasñataqmi tablata mañakuykuspan chaypi qillqarqa “Juanmi sutinqa” nispa (Lucas 1:63).

Chaynata qillqaruspallanmi Zacariasqa Diospa atiyninwan kaqmanta rimayta qallaykurqa. Paymanqa Diospa angelninmi willarqaña Elisabet wiksayakunanmanta, ichaqa iskayrayasqanraykum manaña rimayta atirqachu. Chaymi kaqlla rimayta qallaykuptin runakunaqa sunqunkupi nikurqaku: “¿Imaraq kay wawaqa kanqa?”, nispanku (Lucas 1:66). Hinaspam musyakurqaku ‘Juan’ nispaqa Dios sutichasqanmanta.

Chaypim Zacariasqa Diospa chuya espiritun yanapaptin nirqa: “Israel runakunapa Jehova Diosninyá hatunchasqa kachun llaqtanta llakipayasqanrayku hinaspa librasqanrayku. Atiyniyuq salvaqninchiktam hatarirachin serviqnin Davidpa mirayninmanta”, nispa (Lucas 1:68, 69). Manaraq Jesus nacechkaptinmi Zacariasqa ‘atiyniyuq salvaqninchik’ nispan Jesusmanta nirqa. Nirqataqmi: “Enemigonchikkunamanta Dios libraruwaptinchikñam paytaqa mana manchakuspa yupaychasun, chaynapi tukuy kawsasqanchik punchawkunapi payllapaqña kawsanapaq hinaspa allin kaqkunata ruwanapaq”, nispa (Lucas 1:74, 75).

Zacariasqa churinmantapas nirqam: “Qamñataqmi churilláy hanaq pacha Diospa willakuqninwan sutichasqa kanki, Jehova Diospa ñawpaqnintam rinki ñanninkunata allichanaykipaq, llaqtantam Diosqa salvanqa, huchankunatapas pampachaspanmi chaytaqa ruwanqa kuyapayakuyninrayku. Kayna kuyapayakuyninwanmi Diosqa musuq punchaw achkirimuchkaq hina kanchariykuwasunchik tutayaypi tiyaqkunaman hinaspa tutayaypi kaqkunaman achkita qunanpaq, chay achkim qawachiwasun hawkayaypi kanapaq ima ruwananchikta”, nispa (Lucas 1:76-79). ¡Mayna sumaqmi chay willakuyqa!

Zacarias chaynata niptinqa Nazaretmanñam Mariaqa chayarurqa. Payqa manaraqmi casarakurqachu, chaynaqa ¿ima ninmankutaq karqa wiksayuq kasqanta yacharuspanku?