Hatu-hatun buqueta Noey ruwasqanmanta

Watakunapa risqanman hinam achka runakunaña allpa pachapi karqa. Ichaqa yaqa lliwmi mana allin runakuna karqaku. Wakin angelkunapas Diosta mana kasukuspankum kay pachaman hamururqaku, ¿imapaq? Aychayuq tulluyuq rikuriruspanku warmikunawan casarakunankupaqmi.

Chaymi angelkunapa churinta warmikuna wachakururqaku. Chay churinkunam hatunkaray runakuna karqaku, hinaspapas runakunatam ñakarichiqku. Chaymi Jehova Diosqa tantiarurqa nisyullay-­nisyu parawan paykunata chaynataq mana allin runakunatapas chinkachinanpaq.

Ichaqa Noey sutiyuq runam tukuy sunqunwan Diosta kuyarqa. Payqa warmiyuq hinaspa kimsa churiyuqmi karqa. Churinkunapa sutinmi karqa: Sem, Cam hinaspa Jafet, paykunapas warmiyuqmi karqaku. Jehova Diosmi Noeyta kamachirqa hatu-hatun buqueta ruwananpaq, chaynapi ayllunwan nisyullay-nisyu parapi mana wañunankupaq. Nirqataqmi animalkunatapas buqueman yaykuchinanpaq.

Chaymi Noeyqa chaylla kasukuspan ayllunpiwan yaqa 50 watapi hatu-hatun buqueta ruwarqa. Diospa kamachisqanman hinamá ruwarqaku. Chaymantapas, nisyullay-nisyu para chayamunanmantam lliw runakunaman willakurqa, ichaqa manam pipas kasukurqachu.

Buqueman yaykurusqanku qipata, ¿imam karurqa? ¿Yachayta munawaqchu?