Astawan yachay munaqkunapaq
Proverbios 24:16 nisqanpim kaynata nin: ‘Allin ruwaq runaqa qanchis kutikamaña wichispanpas hatarinqam’, nispa. ¿Kaywanqa rimachkan sapa kuti huchaman wichiptinchik Dios pampachawananchikmantachu?
Manam chaymantachu rimachkan. Rimachkanqa sapa kuti sasachakuypi kaspanchik mana hukmanyaruspa hinalla kallpanchakusqanchikmantam.
Chaymanta astawan yachanapaq qawaykusun 15-17 versiculokama ima nisqanta, chaypim nin: ‘Allin ruwaq runapa contranpiqa amayá ima mana allintapas tantiaychu, wasinmantapas amayá imantapas suwakuychu. Allin ruwaq runaqa qanchis kutikamaña wichispapas qanchis kutikamam hatarinqa, mana allin runakunam ichaqa sasachakuyman wichinqaku. Enemigoyki sasachakuypi tarikuptinqa amayá asipayaychu, urmaruptinpas amayá sunquykipiqa kusikuychu’, nispa (Prov. 24:15-17).
Achka runakunam 16 versiculota ñawinchaspanku ninku ima huchatapas ruwaruspanchik wanakuptinchikqa Dios pampachawasqanchikmanta rimasqanta. Inglaterra nacionniyuq iskay sacerdotekunapas nirqakum ñawpaq tiempopipas hinaspa kunan tiempopipas achka runakuna chaynata yachachisqankuta. Chay sacerdotekunaqa nirqakutaqmi allin ruwaq runa achka kutikama huchallikuruspanpas wanakuptinqa hinalla Dios kuyasqanta. Chayraykum runakunaqa manaña kallpanchakunkuñachu allin kaqkunata ruwanankupaqqa. Paykunaqa piensankum achka kutikama huchallikuruptinpas Dios pampachananta.
16 kaqpiqa manam chaytachu yachachichkan.
Proverbios 24:16 nisqanpi “wichispapas” nisqanqa rimanmantaqmi wasi hawamanta runapa wichiykusqanmantapas (Deut. 22:4, 8; Amos 9:9). Chaymantapas, “wichiy” nisqanqa tupanmantaqmi sasachakuypi tarikusqanchikwanpas (Sal. 37:23, 24; Prov. 11:5; 17:20).
Bibliamanta allinta yachaq huk runapa nisqanman hinaqa hebreo rimaypi “wichiykuy” nisqanqa manam riman sapa kuti huchallikuymantachu. Yachayniyuq huk runapas 16 versiculopa ima niy munasqanmantam kaynata nirqa: “Diospa serviqninkunata ñakarichiqkunaqa sasachakuypim kanqaku. Diospa serviqninkunaqa manam haykapipas chinkachisqachu kanqaku, aswanqa mana allin ruwaqkunallam”, nispa.
Chaynaqa, Proverbios 24:16 nisqanpi “wichiy” nisqanqa manam rimachkan sapa kuti huchallikuymantachu, aswanqa sapa kuti sasachakuypi tarikuymantam. Sasa tiempopi kawsakusqanchikraykum allin ruwaq runakunapas unqurunmanku utaq ima sasachakuypipas tarikunmanku. Wakinkuqa autoridadkunapa ñakarichisqanmi kanmanku. Chaywanpas, Jehova Dios yanapaptinmi mana llumpaytachu hukmanyarunqaku. Diosta serviqkunapaqa yaqa llapanpim imapas ruwasqanchikqa allin. ¿Imanasqa? Bibliam niwanchik: “Diosqa ñakariqkunatam kallpanchan, wichisqakunatam hatarichin”, nispa (Sal. 41:1-3; 145:14-19).
Chayraykum allin ruwaq runaqa mana kusikunchu hukkuna sasachakuypi kaptinqa, aswanqa ‘Diosta manchakuqkuna allin kawsakusqankuta’ yachaspanmi kusikun (Ecl. 8:11-13; Job 31:3-6; Sal. 27:5, 6).