Qullqi mana haypakuptin

Casarasqa hinaspa iskay churiyuq Paulmi nin: “Nacionniypi tukuy imapapas precion wiñaruptinmi, kawsaykunapas aslla karqa ichaqa llumpay precioyuq. Achka kutipim unayta suyaq kaniku mikuy rantinaykupaq, ichaqa manañam imapas karqañachu chayaruptiykuqa. Runakunam manaña mikusqankurayku tulluyarurqaku, chaymi callekunapi wañusqa hina wichiqku. Mikuykunapa precionkunam llumpayta chaylla wiñarurqa. Punchawkunapa risqanman hina millonnintin qullqipaqña kasqanraykum, qullqipas mana valorniyuqña karqa. Bancopi qullqiypas qalaypaqmi chinkarurqa hinaspam ima ruwaytapas atirqanichu”, nispa.

Paulqa yacharqam ayllun kawsananpaqqa imatapas yachaywan allinta tanteananmanta (Proverbios 3:21). Hinallam payqa nin: “Electricistam karqani, ichaqa ima llamkaytapas chaskikuqmi kani mana achka qullqita chaskinay kaptinpas. Wakinmi llamkasqaymanta quwaqku kawsaykunata utaq imatapas. Sichu tawa jabonta quwaptinkuqa iskaytam rantikuq kani. Alli-allimantam 40 chiwchikunata rantiruspay uywarqani, wiñaruptinkuñataqmi rantikuruspay 300 chiwchikunata rantirurqani. Chaymantañataqmi 50 wallpaywan iskay saco sara kutapaq cambiarurqani. Chay iskaynin sacom aylluyta mikuchinaypaq hinaspa hukkunaman quykunaypaqpas unay tiempo haypawarqa”, nispa.

Paulqa yacharqataqmi chaynapi tarikuspanchikqa Diospi hapipakuyninchik aswan allin kasqanmanta. Diosta kasukuptinchikqa payqa yanapawasunmi. Jesusmi niwarqanchik imapas pisipuwaptinchik mana hukmanyarunamanta, paymi nirqa: ‘Taytaykichikmi yachan tukuy imapas pisipususqaykichiktaqa’, nispa (Lucas 12:29-31).

Satanasmi yaqa llapan runakunata inturun achka kapuqniyuq kay imamantapas aswan allin kasqanta piensanankupaq. Runakunam muspaypi hina tarikunku ima pisipuqninta tarinankupaq, hinaspa yanqapas-yanqa imatapas rantinankupaq. Achka runakunam qullqi manukusqankurayku prestaqnin runapa munaychakusqan rikurirunku (Proverbios 22:7).

Wakin runakunam mana allinta tanteanku. Paulmi kaynata willakun: “Riqsisqay runakunam ayllunkutawan amistadninkunata saqispanku huk nacionman ripukurqaku allinta kawsanankupaq piensaspanku. Ichaqa mana documentoyuq kasqankuraykum llamkaytaqa mana tarirqakuchu, wakinpiqa policiamantam pakakuqku hinaspa callekunapipas puñuqku. Paykunaqa manamá Diospa yanapakuynintaqa maskarqakuchu, ñuqaykum ichaqa aylluykuwan kuska yanapachikurqaniku sasachakuykunata atipanaykupaq”, nispa.

JESUCRISTOPA NIWASQANCHIK

Paulmi hinalla willakun: “Jesusmi kaynata nirqa: ‘Amayá afanakuychikchu hamuq punchawmantaqa. Qipa punchawkunaqa achka afanakuykunatam apamunqa, sapa punchawpaq sasachakuykunaqa amañayá hatunyachunchu’, nispa. Chaymi sapa punchaw mañakuq kani mikunayku mana pisipuwanankupaq. Jesuspa nisqanman hinamá Diosqa mana pisichipuwarqakuchu. Ichaqa wakinpiqa manamá tariqchu kaniku munasqaykutaqa. Huk kutipim imakuna rantikusqankuta mana yachaspaypas rantinaypaq suyarqani, rantinaypaq kaptiyñataqmi mana munasqay yogurlla kasqa, hinatamá rantirqani chay tuta mikunaykupaq. Anchatam Diosta agradecekuni chay sasachakuy punchawkuna aylluy mikusqa kasqankumanta”, nispa.a

Nirqataqmi: “Kunanqa qullqimantaqa allinñam kachkaniku. Sasachakuykunata atipasqaykuwanmi yacharuniku llumpay hukmanyaymantaqa Jehova Diospi hapipakuy ancha allin kasqanmanta.b Munasqanman hina imatapas ruwaptinchikqa Diosqa yanapawasunmi. Qawarqanikum Salmo 34:8 nisqan allinpuni kasqanta, ninmi: ‘Pruebaspataq yachaykuychik Diospa allin kasqantapas. Mayna-mayna kusisqamya Diospi amparakullaqpas’, nispa. Chayna qullqimanta sasachakuy huktawan hamuptinqa yachanikuñam imayna atipayta”, nispa.

Nintaqmi: “Runakunaqa kawsanchik manam llamkaywanchu nitaq qullqiwanchu aswanqa mikuywanmi. Chaymi bibliapa kayna nisqanta kusikuyllawanña suyachkaniku: ‘Kay pachapiyá achka-achka kawsaykuna qispichun’, nisqanta. Chayamunankamaqa kusisqam kasaqku mikunallaykupas hinaspa pachallaykupas kaptinqa. Bibliaqa niwanchiktaqmi: ‘Amayá apuyaytaqa kuyaychikchu ichaqa kapusuqnikichikwanyá contentakuychik. Diosmi nirqa: “Manapunim dejasqaykichu nitaqmi saqisqaykichu”’, nispa.c Diospa kayna nisqanqa anchatam kallpanchawanku”, nispa.

Diospa yanapakuyninta chaskinapaqqa paypim hapipakuna, chaytam Paulpas warminwan hinaspa churinkunawan ruwarqaku (Genesis 6:9). Kunan utaq hamuq watakunapi qullqimanta sasachakuypi tarikuptinchikqa, Paulpa allin tanteowan ruwasqankunatam qatipakunanchik.

Ichaqa ¿imatam ruwachwan ayllunchikpi sasachakuykuna kaptinqa?