¿Imaynataq Diosqa?

¿Imayna rikchayniyoqtaq Diosqa?

“Diosqa Espiritum.” (Juan 4:24)

¿IMATAM BIBLIA NIN?

Diosqa espiritum (2 Corintios 3:17). Chaymi ñoqanchikmantapas aswan yachayniyoq. 1 Timoteo 1:17 nisqanpim nin: “Payqa mana wañuq kaspam wiña-wiñaypaq munaychakuchkan, payqa mana rikuy atinam”, nispa. Chaymi mana rikuyta atichwanchu. Bibliam nin: “Diostaqa haykapipas manam pipas rikurqachu”, nispa (1 Juan 4:12).

Isaias 40:18 nisqanpim kayna tapukuy kan: “¿Pimantaq rikchachinkichik Tayta Diostaqa?”, nispa. Manam piensayllapas-piensachwanchu Diospa imayna kasqanmantaqa. Cielopi chaynataq kay Pachapi tukuy imakunaqa manam imapaschu tukuy atiyniyoq Diospa qayllanpiqa (Isaias 40:22, 26).

Angelkunam ichaqa Dioswan parlayta atinku, espiritu kasqankurayku chaynataq hanaq pachapi yachasqankurayku (1 Reyes 22:21; Hebreos 1:7). Jesusmi paykunamanta nirqa: “Angelkunam tukuy tiempo Taytaypa qayllanpi kachkan”, nispa (Mateo 18:10).

¿Diosqa tukuy hinastinpichu kachkan?

“Qamkunaqa kaynatayá mañakuychik: Hanaq pachapi Taytayku, sutiki yupaychasqa kachun.” (Mateo 6:9)

¿IMATAM BIBLIA NIN?

Diosqa manam wayra hinachu tukuy hinastinpi kachkan. Mateo 6:9; 18:10 nisqanpi Jesuspa rimasqanmi qawachin huk runa hina kawsaq kasqanta, payqa ‘hanaq pachapim yachan’ (1 Reyes 8:43).

Wañukunanpaqña kachkaspanmi Jesusqa nirqa: “Kunanñataqmi kay pachata saqespay kutisaq Taytayman”, nispa (Juan 16:28). Wañukuspanñataqmi espiritu cuerpoyoqña kawsarimurqa hinaspam hanaq pachaman kutirqa “Diospa qayllanpi” kananpaq (Hebreos 9:24).

Kay yachayninchikqa ancha allinmi, chaynapim Dios reqsiyta hinaspa payman asuykuytapas atisun (Santiago 4:8). Chaymantapas 1 Juan 5:21 nisqanpim willawanchik: “Churillaykuna, karunchakuychikyá taytacha-mamachakunamantaqa”, nispa. Kayna nisqanqa chaynataq Diosmanta cheqap kaqta yachasqanchikqa imapas yanqa kaqkunata mana yupaychanapaqmi yanapawanchik.

¿Imaynanpitaq Diosman rikchakuq kanchik?

“Diosmi runata unancharqa. Kikinman rikchakuqtam rurarqa. Qaritawan warmitam unancharqa.” (Genesis 1:27)

¿IMATAM BIBLIA NIN?

Runakunaqa Diosmanmi rikchakunchik kuyakuq, allin ruwaq hinaspa yachayniyoq kasqanchikpi. Chaymi Bibliaqa kallpanchawanchik: “Diospa kuyasqan churinkunam kankichik, chaynaqa payman rikchakuqyá kaychik. [Hinallayá] kuyanakuspa kawsaychik”, nispa (Efesios 5:1, 2).

Diosqa kikinchik tanteakunapaqmi saqewanchik, chaymi allin kaqta akllakunchikman mana allin kaqta akllanamantaqa, chaymantapas runamasinchik kuyasqanchiktam qawachichwan imata ruwaspapas (1 Corintios 13:4-7). Imakuna ruwaytapas atinchiktaqmi chaynataq Diospa tukuy sumaq unanchasqankunata admirakuywan qawaytapas. Ichaqa astawanraqmi Dios reqsiyta munanchik hinaspa munayninmanta yachaytapas (Mateo 5:3).

¿Imapim yanapawanchik Bibliamanta yachayninchikqa? Diosta astawan reqsispanchikqa hinaspa qatipakuspanchikqa, paypa munasqanman hina kawsaytam atisun. Chayta ruwaspanchikqa kusisqa hinaspa hawkam kawsakusun (Isaias 48:17, 18). Chaymantapas allin sonqowan Diosman asuykuspaqa, wiñaypaq kawsakuytam atisun (Juan 6:44; 17:3).