Yachachiyta tukuspa kallpanchanapaq

IMAMANTA yachachinaykipaq kaqtaqa sumaqtachá preparakurunki chaynallataq rimayta qallarispalla piensarichinaykipaq kaqtapas. Yachachisqaykipa tukupayninpi imayna kallpanchanaykipaqpas tanteanaykim, tukunaykipaqña rimasqaykitam uyarisuqnikikunaqa astawan yuyanqaku. Tukunallaykipaqña rimasqaykikuna uyarisuqnikikunata mana kallpanchaptinqa yachachisqaykim yanqapaqña kanman.

Qatiqnin willakuypi reparay. Josueymi wañukunanpaqña kachkaspan Israelpi ancianokunaman mana qonqanapaq hina yachachirqa. Chay discurso qosqanpim yuyarichirqa Abrahanpa tiemponmantaraq Jehova Diosqa llaqtanta imayna cuidasqanmanta, ichaqa manam yuyarichiyllachu-yuyarichirqa aswanqa tukuy sonqonwanmi kaynata kallpancharqa: “Kunanyá Tayta Diosta respetaspa cheqap sonqowan payta adoraychik”, nispa. Leey Josuey 24:14, 15 nisqanta hinaspa reparay rimayta tukunanpaqña uyariqninkunata imayna kallpanchasqanpi.

Hechos 2:14-36 nisqankunapi reparay, apostol Pedrom Jerusalenpi 33 kaq watapi Pentecostes fiestapi achka runakunapa qayllanpi rimarqa. Profeta Joelpa willakusqanman hina chuya espiritu chaskisqankumanta willayta tukuruspanmi Salmos libropi willakuykuna Jesucristopa kawsarisqanwan, hinaspa Diospa ladonman hoqarisqa kasqanwan imayna tupasqanmanta willarqa. Discursonpa tukupayninpim kaynata kallpancharqa: “Israelpa llapallan mirayninkuna, yachaychikyá, qamkunapa [wañuchisqaykichik] Jesustam Israel nacionpi Cristo hinaspa Señor kananpaq Dios churaykun”, nispa. Chaymi tapukurqaku: “Wawqekuna ¿imatataq rurallasaqku?”, nispa. ‘Chaymi Pedroñataq nirqa: Huchaykichikmanta wanakuspaykichik Jesucristopa sutinpi bautizachikuychik’, nispa (Hech. 2:37, 38). Chayna nisqanta uyarispankum Cristopi iñikuspa yaqa kimsa waranqa runakuna chay punchawpi bautizakurqaku.

Imakunapi reparanaykipaq. Discursoykita tukunaykipaqña kallpanchasqaykiqa imamanta yachachisqaykiwanmi tupanan. Aswan allinnin kaq yachachikuyninkunawanpas tupanantaqmi. Kikikim tanteanayki discursoykipa titulonta yapamanta ninaykipaq otaq manapas, ichapas servichikuwaq discursoykipa titulonpi kaq wakin palabrakunata.

Yachachisqaykita tukunaykipaqña rimasqaykiqa uyarisuqnikikunatam kallpanchanan imam ruranankupaq. Imamanta yachachinaykipaq kaqta hinaspa aswan allinnin kaq yachachikuykunata akllaruspaqa, ¿yaqachu piensarqanki uyarisuqnikikunapaq imanasqa allin kasqanta chaynataq imayna yanapasqanta? Chaykunapi reparaspaqa atinkim yachachisqaykiwan uyarisuqnikikuna kallpanchayta.

Imam ruranankupaq kallpanchaspaykipas sutillatam chaytaqa qawachinayki. Chaypaqqa imanasqa ruranankupaq kasqantam qawachinayki chaynataq imayna yanapasqantapas. Rimayta tukunaykipaqña tanteasqaykiqa imamanta yachachisqaykita yuyanankupaqmi yanapanqa.

Discursoyki tukunanpaqña kasqanta sutillata qawachiy imayna rimasqaykiwan. Tupasqanman hinataqmi apurawman otaq allillamanta rimanayki. Apurawllamanña rimaspa qonqayta upallaruynikiqa manam allinchu kanman, manataqmi allinchu kanman allillamanta rimaynikipas. Kallpawan rimay ichaqa ama qaparichkaq hinachu. Discursoyki tukunanpaqña kasqanta imayna rimasqaykiwan sutillata qawachispapas mana iskayrayaspa tukuy sonqoykiwan rimasqaykitam qawachinayki. Preparakusqaykipi practicay rimayta tukunaykipaqña kaqkunata.

¿Hayka minutotaq tukunallaykipaqña rimasqaykiqa kanan? Manam hayka minutopaq kasqallanpichu reparanayki nitaq llumpaytachu rimanayki, mana chayqa uyarisuqnikikunam hukmanyarunmanku. Hayka minutopi rimanaykipaqqa uyarisuqnikikuna imayna uyarisusqaykipim reparanayki. Pisi rimayllawan kallpanchayqa allinpaqmi, allintaqmi kanman allinta tanteaspa ima rikchanachiywanpas rimayta tukuynikiqa. Tupachiy Eclesiastes libropi willakusqankuna pisi rimayllapi tukusqanta Jesuspa Ancha Reqsisqa Yachachikuynin Mateo libropi willakusqankunawan imayna tukusqanta (Ecl. 12:13, 14; Mat. 7:24-27).

Predicaspa. Predicaspaqa astawanmi kallpanchakunanchik uyariwaqninchikta kallpanchanapaq. Runamasinchikpi reparaspa chaynataq paykunata yanapanapaq allinta preparakuspaqa allintam yachachisun. Kay libropi kaq yachachikuykunataqa allintam servichikuchwan huk runallawan rimaspapas.

Uyariwaqninchikpa tiempon mana kaptinqa manapaschá unaytachu rimasun. Atikuptinqa niwaqmi: “Manaraq pasakuchkaspayá kallpanchasunaykipaq kaqta willaykusqayki, Bibliam yachachin Unanchaqninchik Dios Allpa pachata suma-sumaq huertaman tikrachinanmanta. Chay huertapi kaytaqa atichwanmi ichaqa yachananchikmi Diospa kamachisqanman hina imam rurananchikta”, nispa. Otaq nichwanmi yapapiña watukunanchikpaq.

Nanay simiwan wasiyoq rimaptinpas otaq kamiwaptinchikpas atichwanmi allin predicayta Mateo 10:12, 13 hinaspa Romanos 12:17, 18 nisqan textokunapi reparaspaqa. Llampu siminchikwan contestasqanchikqa ichapas cambiachinman Jehova Diospa testigonkunamanta imam piensasqanta.

Wakinpiqa ichapas wasiyoqwan allinta rimarunchik. ¿Manachu imamanta yachachisqanchikta yapamanta yuyarichichwan hinaspa uyarisqanta kasukunanpaq kallpanchachwan?

Astawan yachayta munasqanpi reparaspaqa tapuwaqmi imapas yachay munasqanmanta, chaytaqa ichapas contestawaq Razonamiento a partir de las Escrituras libropi yachachikuyman hina otaq Bibliata estudianapaq mayqen qellqawanpas. Ichaqa kallpanchakuy Mateo 28:19, 20 nisqanman hina ruranaykipaq.

¿Bibliamanta mayqen yachachikuynintachu estudiachiyta tukuchkanki? Imamanta yachachisqaykita yapamanta niptikiqa yachachisqaykitam yuyanqa. Aswan allinnin kaq yachachikuykunamanta tapuspapas astawan yuyananpaqmi yanapanki. Yachachisqayki imayna yanapasqanmantapas tapuy chaynallataq hukkunaman willananpaq imayna tanteasqanmantapas, chayna piensarichisqaykim yanapanqa Bibliamanta yachasqanman hina rurananpaq (Prov. 4:7).

Discursoykita tukunallaykipaqña imayna kallpanchasqaykiqa imamanta yachachisqaykita entiendenankupaqmi yanapan.