Diosqa interesakunmi ñoqanchikpi chaymanta qawasun
DIOS kuyawaptinchikqa, ¿imanasqataq kay pachapi llumpay ñakariykuna kan? Ñawpaq tiempomantaraqmi achka runakuna chaynata tapukurqaku. Arí, pi kuyasqaykitapas ñakariqta qawaspaykiqa yanapaykuytam munawaq ¿aw? Achka runakunam tapukunku imanasqam Diosqa mana imatapas ruranchu ñakariykunata chinkachinanpaq nispa; wakinqa piensankuraqmi ñoqanchikpi mana interesakusqanta. Chaymi kaymanta manaraq yachachkaspa, puntataqa segurakunanchik allin kananchikta Dios munasqanmanta. Chayna kasqanmantayá qatiqninpi qawasun.
Unanchasqankuna
Jehová Diosmi unancharqa “hanaq pachata, kay pachata, lamar qochata chaynataq chaykunapi tukuy imakunatapas” (Hechos 4:24). Unanchasqankunapi yuyaymanaspam cuentata qokunchik ancha kuyawasqanchikmanta. Piensariy imakuna gustasusqaykipi. ¿Mikuytachu anchata gustanki? Haykapipas piensarqankichu, ¿imaynataq kanman sapa punchaw hina kaqllata mikuyqa? Diosqa unanchanmanmi karqa mikunapaq chullalla kawsayta. Chayna unanchananmantaqa tukuy imaymana mikuykunatam akllanapaq qowarqanchik. ¿Ima nichwantaq allpa pachamanta? Diosqa unanchaspanmi sumaqyachirqa admirakuypaq tukuy rikchaq sachakunawan hinaspa waytakunawanpas. Anchatamá kaykunaqa vidanchikpi kusichiwanchik ¿aw?
Kunanñataq piensarisun runakuna imayna unanchasqa kasqanchikpi. Unanchasqam kachkanchik asirikuq kanapaq, takikunata gustanapaq, imapas allichasqa kananta munanapaq, kaykunatawan hukkunataqa manam necesitanchikchu kawsananchikpaqqa, ichaqa vidanchikpim kusichiwanchik. Chaykunamantapas aswan allinqa, kuyakuyniyoq unanchasqa kasqanchikmi. ¿Pitaq mana munanmanchu allin amistadniyoq kayta otaq kuyasqanchik abrazaykuwananchikta? Kayna kuyakuyniyoqta Dios unanchawasqanchikmi qawachin kuyakuyniyoq kasqanta.
Palabran
Bibliapas qawachinmi ñoqanchikpi Dios interesakusqanta. Arí, yachachiwanchikmi pay kuyawasqanchikta (1 Juan 4:8). Yachachikuyninkunaqa yanapawanchiktaqmi mana onqonapaq, niwanchikmi imapipas controlakunapaq hinaspa sinkakuy chaynataq mikuysapa kaypas mana allin kasqanta (1 Corintios 6:9, 10).
Bibliaqa yanapantaqmi hukkunawanpas allinta apanakunapaq. Ejemplopaq, niwanchikmi kuyanakunapaq hinaspa respetanakunapaq (Mateo 7:12). Niwanchiktaqmi llulla rimay, huchapakuy hinaspa wañuchiypas mana allin kasqanta, qawachiwanchiktaqmi qollqella kuyaypas envidiakuypas mana allinpi tukusqanta. Bibliapa yachachikuyninkunata lliw runakuna kasukuptinkuqa, manamá llumpay ñakariykunaqa kanmanchu, ¿aw?
Chaymantapas ancha kuyawasqanchiktam Diosqa sutillata qawachiwanchik, kay pachaman ñoqanchikrayku Churinta kachamusqanwan. Diospa Palabranmi nin: “Diosqa ancha-anchatam kuyarqa runakunata, chaymi sapallan Churinta qomurqa pipas paypi iñiqqa manaña puchukaspa wiñaypaqña kawsananpaq”, nispa (Juan 3:16). Churinta qomusqanwanmi Jehová Diosqa qawachinña ñakariytawan wañuyta wiñaypaq chinkachinanmanta (1 Juan 3:8).
Hinaptinqa kaykunam qawachiwanchik, cheqaptapuni Dios kuyawasqanchikta hinaspa ñakarinanchikta mana munasqantapas. Kaykunaqa segurawanchikmi lliw ñakariykunata chinkachinanmanta. Kayqa manamá yanqa rimayllachu: qatiqninpim Biblia qawachiwasun imayna rurananmanta.
[27 kaq paginapi dibujo]
Diosqa kuyakuq kaspanmi, unanchawarqanchik kuyakuyniyoq kananchikpaq