Diospa Palabranmanta yachay
¿Imaynatam yachawaq cheqap religionmanta?
Kay yachachikuymi kikikipa Bibliaykiwan wakin tapukuynikita contestasunki. Munaptikiqa Jehová Diospa testigonkunam kay tapukuymanta yachanaykipaq yanapasunkiman.
1. ¿Chullallachu cheqap religionqa?
Jesusmi discipulonkunaman yachachirqa chullalla cheqap religionmanta. Chayqa wiñay kawsayman rinapaq ñan hinam, chaymi Jesus nirqa “aschallam chaynintaqa richkanku”, nispa (Mateo 7:14). Diosqa chaskin Bibliapa yachachisqanman hina yupaychayllatam. Chayraykum cheqap cristianokunaqa huk iñiyniyoqlla kananku. (Leey Juan 4:23, 24; 14:6; Efesios 4:4, 5.)
2. ¿Imanasqataq achka religionkuna cristiano tukunku?
Llulla yachachiqkunam cheqap yachachikuyta yanqacharunku kikillankupaq munasqankuwan. Jesusmi paykunamanta nirqaña oveja hina rikchayniyoq hamuspapas sonqonkupiqa suwa atoq hinam kanku nispa (Mateo 7:13-15, 21, 23). Cristiano tukuqkunaqa apostolkuna wañuruptinmi mirarurqaku. (Leey Hechos 20:29, 30.)
3. ¿Imawantaq reqsichikun cheqap cristianoqa?
Cheqap cristianoqa Bibliatam Diospa Palabranta hina qawanku. Bibliapa yachachisqanta kasukunankupaqmi kallpanchakunku, manam runakunapa kamachisqantachu (Mateo 15:7-9) Paykunaqa yachachisqankuman hinam kawsanku. (Leey Juan 17:17; 2 Timoteo 3:16, 17.)
Jehová Diospa sutintam respetanku. Jesusmi runakunata yanaparqa Dios imayna kasqanta hinaspa sutinta yachanankupaq. Diospa sutin chuyanchasqa kananpaqmi orakuyta yachachirqa (Mateo 6:9). ¿Mayqen religiontaq Diospa sutinmanta yachachin yachasqayki lawpi? (Leey Juan 17:26; Romanos 10:13, 14.)
4. ¿Imaynatam tariwaq cheqap cristianokunata?
Cheqap cristianokunaqa Diospa Gobiernonmantam willakunku. Jesusmi kay Pachaman hamurqa Diospa Gobiernonmanta willakunanpaq, chayllam allin kawsakuytaqa apamunqa. Jesusqa wañukunan punchawkamam chaymanta willakurqa (Lucas 4:43; 8:1; 23:42, 43). Qatiqninkunamanpas chaymanta willakunankupaqmi kamachirqa. Watukamususpayki Diospa Gobiernonmanta pipas willasuptikiqa, ¿mayqen religionmantataq kanman? (Leey Mateo 10:7; 24:14.)
Jesuspa discipulonkunaqa, kay pachapi mana allin ruraykunamantam karunchakunku. Manam chaqrukunkuchu politicapi nitaq ima chaqwa ruraypipas (Juan 17:16). Manataqmi mana allin ruraykunataqa qatipakunkuchu. (Leey Santiago 1:27; 4:4.)
5. ¿Imataq cheqap cristianokunapiqa sutilla qawakunan?
Cheqap cristianokunaqa kuyanakunkum. Paykunataqa Diospa Palabranmi yachachin maymanta kaptinkupas lliw runakunata respetanankupaq. Mana cheqap religionpi kaqkunaqa guerrakunapim chaqrukunku, cheqap cristianokunaqa manam chaytaqa rurankuchu (Miqueas 4:1-4). Aswanqa mana imaraykullam kapuqninkuta, tiemponkuta servichikunku runamasinta yanapananpaq hinaspa kallpanchananpaq. (Leey Juan 13:34, 35; 1 Juan 4:20, 21.)
¿Mayqen religiontaq Bibliapa nisqanman hina yachachin, Diospa sutintapas respetan hinaspa Gobiernonmantapas willakun confianzawan suyanankupaq? ¿Pikunataq cheqapta kuyanakunku hinaspa guerrapiqa manataq chaqrukunkuchu? Kaykunam sutillata qawachin paykunaqa Jehová Diospa testigonkuna kasqanta (1 Juan 3:10-12).
Astawan yachayta munaspaqa qawariy ¿Imatapunim Bibliaqa yachachin? libropa 15 kaq yachachikuyninta, kay libroqa Jehová Diospa testigonkunapa rurasqanmi.
[30 kaq paginapi dibujo]
Ninkum, ‘Diostam reqsiniku’ nispa, rurasqankuwanmi ichaqa qawachinku mana chayna kasqankuta (Tito 1:16).