¿Imatam religionpi kaqkuna qawachinku qollqeta mañaspanku?

Estelaa sutiyoq señoram sapa kuti huk religionpi huñunakuyman wawankunapiwan riq. Pastorninmansi nisqa Bibliamanta astawan yachay munasqanta, ichaqa payqa manas haykapipas yanapasqachu, chaysi chay huñunakuymanqa manaña risqachu. Estelam nin: “Chay religionpi kaqkunam qellqamuwarqaku huñunakuykunaman manaña rispaypas qollqeta otaq diezmota apachinaypaq. Chaywanmi cuentata qokurqani qollqellaypi interesakusqankumanta”, nispa.

Religionpi unayña kaq Angelinam nirqa: “Religionniypiqa huñunakusqayku horam kimsa kutikama qollqe churanapaq platota pasachiqku. Munaqkum sapa haywamuptinku churanaykuta. Sapa kutillam qollqe churanaykupaq niwaqku. Chaymi piensarqani Diosqa paykunawan mana kasqanmanta”, nispa.

Reqsisqayki religionkunapiqa, ¿hikutankuchu qollqeta otaq diezmota qonaykipaq? ¿Chayna mañanankupaqchu Bibliaqa yachachin?

¿IMATAM BIBLIAQA YACHACHIN?

Diospa Churin Jesucristom nirqa: ‘Mana imallawanmi chaskirqankichik mana imallapaqtaqyá qoychikpas’, nispa (Mateo 10:8). Diospa yachachikuyninkunaqa manam qollqepaqchu, lliwmi mana qollqellawan yachananku.

¿Imaynatam apostolkunapa tiemponpi cristianokunaqa huñunakunanku wasikunapi gastokunata pagaqku?

‘Sapakamam qoqku sonqonkupi tanteasqankuman hina, manam llakikuspachu nitaq obligasqachu’ (2 Corintios 9:7). Apostol Pablopas Diosta servisqanpi gastonkunata pagananpaqmi karpakunata ruwaypi llamkarqa (Hechos 18:2, 3). Kikinmi nirqa: ‘Mantienekunaypaqmi tuta-punchaw llamkarqani, qamkunataqa manam gastachirqaykichikchu Diosmanta allin noticiata willakuspayqa’, nispa (1 Tesalonicenses 2:9).

¿JEHOVA DIOSPA TESTIGOKUNAPAS QOLLQETACHU MAÑAKUNKU?

Testigokunaqa huñunakunanku wasitam sutichanku Salonwan, chay wasikunaqa manam admirakuypaq tukuy imayoqchu. ¿Imaynatam chaypi gastokunata paganku? Jehova Diospa testigonkunaqa qollqetaqa otaq diezmotaqa manam mañakunkuchu. Aswanqa Diospa yachachikuyninmanta agradecekuspankum chay Salonpi kaq cajachakunapi tukuy sonqonkuwan tanteasqankuman hina qollqeta churanku.

Kay revistata ruwanapaq chaynataq leey munaqkunaman chayachinapaqqa qollqetam necesitakun. Ichaqa manam kay qellqapiqa tarinkichu qollqe mañakusqaykumanta willakuytaqa. Kay revistaqa ruwakun Diosmanta cheqap yachachikuyta runakuna yachanankupaqmi.

Gastokunata chayna pagasqankuqa, ¿tupanchu Jesuspa nisqanwan chaynataq ñawpa cristianokunapa imayna qosqankuwanpas?