Diosmanta willakuypim yanapakunku: Micronesia lawpi

ESTADOS UNIDOS nacionmanta Katherine sutiyoq sipasmi 16 watanpi bautizakurqa. Payqa tukuy sonqonwanmi Jehova Diosta serviyta munarqa. Ichaqa, predicasqan lawpim Bibliamanta yachay munaq runakunataqa mana tariqchu. Paymi willakun: “Diosta reqsinanpaq pipas yanapaykunanta Diosta mañakuq runakunamantam qellqanchikkunapi leeq kani. Ñoqaqa chayna runakunatam tariyta munarqani, ichaqa manam tarirqanichu”, nispa.

Achka wataña chay yachasqan lawpi predicachkaspanmi, Katherineqa Bibliamanta yachay munaq runakunapa kasqan lawman astakuyta munarqa. Ichaqa iskayrayarqam. Payqa familianmanta huk kutipi iskay semanalla karunchakuruspanmi, sapa punchaw llumpay llakikuywan tarikurqa. ¿Yaqachu kunanqa familianmanta rakikuyta atinman? Diosta reqsiy munaq runakunata yanapay munasqanmi anchata yanaparurqa. Chaymi yuyaymanarqa maylaw nacionman rinanpaq hinaspanmi Guam Betel wasiman qellqarqa. Hinaptinmi niykurqaku ima ruwananmanta. 26 watanpi kachkaspanmi, 2007 watapa julio killanpi astakurqa Pacífico lawpi Saipán islaman. Chayqa wasinmanta yaqa 10.000 kilometropim tarikun. ¿Imaynam payqa tarikurqa?

MAÑAKUSQANKUTAM DIOS UYARIYKURQA

Chay congregacionpi pisi tiempollaraq kachkaspanmi Katherineqa tarirurqa 35 watanpi Doris sutiyoq warmita, paymi Bibliamanta yachayta munarqa. Yachachiq librota estudiaspa kimsa kaq yachachikuyninpiña kachkaptinkum Katherineqa llakikuyta qallaykurqa. Paymi nin: “Dorisqa allin estudiaqmi karqa chaymi manchakuq kani mana allinta yachachinaymanta, ñoqaqa manam haykapipas Bibliamantaqa sapa semanaqa yachachiqchu kani. Chaymi piensarqani experienciayoq otaq wiñaymasin kaq iñiqmasiy estudiota qonanmanta”, nispa. Chayraykum Jehova Diosta mañakurqa allin yachachiq cristianata maskaypi yanapaykunapaq, chaynapi payña Dorista estudiachinanpaq. Katherineqa chayna tanteasqanmantam Dorisman niyta munarqa.

Katherinem nin: “Chay tanteasqaymanta manaraq willachkaptiymi Dorisqa sasachakuyninmanta willawarqa. Ñoqaqa uyariykuspaymi willarqani pay hina sasachakuypi tarikuptiy Jehova Dios imayna yanapawasqanmanta”, nispa. Dorisñataqmi chayna willasqanmanta agradecekuspan nirqa: “Jehova Diosmi qamtaqa servichikuchkasunki. Wasiyman chayamusqayki punchawqa Bibliaytam unayña leechkarqani. Waqaspaymi Diosta mañakuchkarqani Bibliata entiendenaypaq pipas yanapaykuwananpaq. Hinaptinmi punkuyta takaykamurqanki. ¡Mañakusqaytamá Jehova Dios uyariykuwarqa!”, nispa. Chay punchawta yuyarispanmi Katherineqa waqanraq. Paymi nin: “Dorispa chayna niwasqanwanmi musyakururqani mañakusqayta Jehova Dios uyariykuwasqanmanta. Chaywanmi Diosqa qawachiwarqa Bibliamanta hinalla yachachinaypaq atisqayta”, nispa.

Dorisqa 2010 watapim bautizakurqa, kunanñataqmi achka runakunata Bibliamanta yachachichkan. Katherinem nin: “¡Jehova Diostam anchata agradecekuni Bibliamanta yachay munaqta tarisqaymanta!”, nispa. Kunanqa Pacífico lawpi kaq Kosrae islapim precursora especial kachkan.

KIMSA SASACHAKUYKUNAMANTA

19 watankumanta 79 watankukama pachak masnin iñiqmasinchikkunam Micronesia lawman astakurunku, chaynapi mana ancha Testigokunapa kasqanpi yanapanankupaq. Erica sutiyoq iñiqmasinchikmi 2006 watapi 19 watayoq kachkaspan Guam islaman astakurqa. Chayna astakuq iñiqmasinchikkuna imayna tarikusqankumantam nin: “Diosmanta yachay munaq runakunapa kasqanpi pipas precursor kaspanqa kusisqam tarikun. Jehova Diostam anchata agradecekuni chayna servinaypaq yanapawasqanmanta. ¡Kusikunapaqmá kayqa!”, nispa. Kunanqa Islas Marshallpi kaq Ebeye islapim Ericaqa kusisqallaña precursora especial kachkan. Huklaw nacionpi serviyqa sasaniraqmi kanman wakinpiqa. Qawasun kimsa sasachakuykunamanta. Qawasuntaq Micronesia lawman astakuqkuna sasachakuykunata imayna atipasqankumantapas.

Mana ancha kapuqniyoq kawsakuymanta. 22 watanpi Simon sutiyoq iñiqmasinchikmi 2007 watapi Palaos lawman astakurqa. Chay llaqtapi llamkaspanqa as qollqellatam ganaq, manam Inglaterra nacionninpi hinachu. Paymi nin: “Manam tukuy munasqaykunatachu rantinay karqa. Kunanqa mikunaypaq kaqkunata rantinaypaqqa allintam tanteani hinaspapas mana achka qollqepaq kaqtam maskani. Imaykunapas pakikuruptinqa mana mosoq kaqkunatam rantini, hinaspaymi pipas allichaykapuwananpaq maskani”, nispa. ¿Imaynam Simonqa tarikun mana ancha kapuqniyoq kaspan? Paymi nin: “As qollqellawan kawsaytam yacharurqani. Achka kutipim Jehova Dios yanapawasqanta musyakurqani. Qanchis wataña kaypi servisqaypiqa kapuwarqam mikunayqa chaynataq maypi puñunaypas”, nispa. Arí, Jehova Diosqa bendecinmi munayninta puntapi churasqankurayku mana ancha kapuqniyoq kaqkunataqa (Mat. 6:32, 33).

Llakikuyta atipanamanta. Erica sutiyoq cristianam nin: “Familiaywan kuskalla kasqayraykum karupi kaspay Dios serviyniypi hukmanyarunaymanta manchakuq kani”, nispa. ¿Imatam ruwanan karqa mana chayna tarikunanpaq? Paymi nin: “Manaraq huklawman astakuchkaspaymi chaymanta rimaq yachachikuykunata Willakuq qellqapi leerqani. Huk kaqnin yachachikuypim leerqani huk cristiana warmi wawanta kayna nisqanmanta: ‘Jehova Diosmi ñoqamantaqa aswan allinta waqaychasunki’. Chayna nisqanmi anchata kallpanchawarqa”, nispa. Hannah sutiyoq iñiqmasinchikmi qosan Patrickpiwan Diosta servichkanku Majuro (Islas Marshall) llaqtapi. Hannahqa hukmanyasqa mana tarikunanpaqmi congregacionpi iñiqmasinkunawan hukllawakun. Paymi nin: “Jehova Diostam haykapipas anchata agradecekuni achkallaña iñiqmasinchikkuna kasqanmanta, paykunapas familiay hinam kanku. Paykunapa mana yanapakuyninwanqa manam haykapipas atiymanchu karqa mana ancha Testigokunapa kasqanpi Dios serviytaqa”, nispa.

Iñiqkunawan hukllawakuymanta. Simonmi nin: “Pipas huk nacionman chayllaraq chayaptinqa tukuy imam mana chaynallachu. Wakinpiqa hukmanyanim chistekunata willakuptiy mana entiendewaptinku”, nispa. Ericañataqmi nin: “Qallariypiqa sapallay hinam tarikurqani, ichaqa chayna tarikusqaymi yuyarichiwarqa imanasqa kayman hamusqaymanta. Kaypiqa kachkani Jehova Diosta astawan servinaypaqmi”, nispa. Nintaqmi: “Tiempopa risqanman hinam achka amistadkunata armarqani, paykunatam anchata kuyani”, nispa. Simonqa palauano rimayta yachananpaqmi kallpanchakurqa, chayna ruwasqanmi yanapan chaypi kaq iñiqmasinkunawan amistad kanankupaq (2 Cor. 6:13). Chay rimayta yachananpaq kallpanchakusqanraykutaqmi chaypi kaq iñiqmasinkuna kuyan. Arí, chayllaraq astakuqkuna chaypi iñiqkunawan huk sonqolla Diosta servispankuqa allin amistadtam ruwanku. ¿Ima bendicionkunatawanmi chaskinku mana ancha Testigokunapa kasqanpi yanapakuqkunaqa?

ACHKA COSECHA KASQANMANTA

Apostol Pablom qellqarqa: ‘Achka tarpuqqa achkatataqmi cosechanqa’, nispa (2 Cor. 9:6). Chayna nisqanqa Diosta serviyninkupi astawan kallpanchakuqkunawanmi tupanman. ¿Imatam cosecharqaku Micronesia lawpi yanapakunankupaq astakuqkunaqa?

Micronesia lawpiqa achkaraqmi kanku Bibliamanta yachay munaqkuna hinaspa yachasqankuta kasukuspanku iñiyninkupi ñawpariqkuna. Patrick hinaspa señoran Hannahqa predicarqakutaqmi Angaur islachapipas, chaypiqa 320 runakunallam yachanku. Chaypi iskay killaña predicachkaspankum warmisapa señorata tarirurqaku, payqa chayllam Biblia estudiayta qallaykurqa. Payqa Diosmanta astawan yachaspanmi kawsakuyninpi cambiarqa. Hannahm willakun chay señorata yachachisqankumanta bicicletapi kutimuspanku kayna nisqankuta: “¡Jehova Dios, anchatam agradecekuykiku!”, nispa. Nintaqmi: “Jehova Diosqa pi serviqninwanpas kay señorataqa pusaykamunmanmi karqa llaqtanmanqa. Ichaqa chay llaqtaman astakusqaykuraykum ñoqayku yanapaykurqaniku Diosta reqsinanpaq. ¡Ancha kusikunapaqmá chayqa karqa!”, nispa. Ericapa nisqanman hinaqa, “ancha kusikunapaqmi Jehova Diosta reqsinankupaq pitapas yanapaykuyqa”.

¿YANAPAKUWAQCHU QAMPAS?

Achka nacionkunapim Diosmanta willakuqkunaqa mana ancha kanchu. ¿Atiwaqchu huklaw nacionman astakuspayki yanapakuyta? Jehova Diosta mañakuy paymanta astawan willakuy munasqaykita sonqoykipi wiñachinanpaq. Rimariytaq ancianokunawan, congregacionta watukuq ancianokunawan otaq mana ancha Testigokunapa kasqan nacionpi yanapakuq iñiqkunawanpas. May nacionmanpas astakunaykipaq tantearuspaykiqa, qellqay chay nacionpi kaq Betel wasiman, chaynapi astakunaykipaq kaq lawmanta astawan yachanaykipaq.a Chaynata ruwaspaqa huklawman astakuq iñiqkuna hinam achka runakunata yanapasqaykimanta kusisqa tarikunki.