QARANPI KAQ YACHACHIKUY | HANAQ PACHAPI KAWSAQKUNATA RIKUSQANKUMANTA
¿Imakunatam runakuna ninku hanaq pachamanta?
Runakunaqa tukuytam ninku hanaq pachamanta. Wakinmi ninku hanaq pachapiqa wañusqa ayllunku kasqanta, chaymi huk lawpiqa wañusqa ayllunkuta yupaychanku. Hukkunañataqmi ninku hanaq pachapiqa hawka kawsakuy kasqanta hinaspa angelkunapa chaynataq allin ruwaq runakunapa yachanan kasqantapas. Wakinkunaqa ninkutaqmi hanaq pachapiqa wara-waranqantin dioskuna yachasqanta. Chaymi achka runakunaqa hanaq pachamanta imam kaqta yachayta munanku.
Wakin runakunam ichaqa ninku hanaq pacha imayna kasqantaqa mana yachay atinamanta, chaynataqa ninku pipas hanaq pachamanta mana hamusqanta piensaspankum. Chayna nisqankuqa manam chiqapchu. ¿Imanasqa? Jesusmi kay pachaman manaraq hamuchkaspan hanaq pachapi kawsarqaña. Hanaq pachamanta hamusqantam religionpi punta apaqkunaman nirqa: “Hanaq pachamantaqa uraykamurqani manam munasqayta ruwanaypaqchu aswanqa kachamuwaqniypa munasqanta ruwanaypaqmi”, nispa. Chaymi qatiqninkunamanpas hanaq pachamanta kaynata nirqa: “Taytaypa wasinpiqa achkam yachanapaq wasikuna kachkan”, nispa (Juan 6:38; 14:2).
Jesuspa taytan Jehova Diospas hanaq pachapim yachan (1 Reyes 8:30). Chaymi paykunaqa hanaq pachamanta sumaqta yachasqankurayku serviqninkunaman hanaq pacha imayna kasqanmanta qawachirqaku.
Qatiqnin yachachikuypim yachasun Diospa runankuna hanaq pacha imayna kasqanta qawasqankumanta willakusqankuta. Willakusqankumanta yachaspanchikqa yuyarinanchikmi hanaq pachapi kaqkunaqa mana rikuy atina hinaspa mana llachpay atina kasqanta. Chaymi Diosqa hanaq pacha imayna kasqanmanta entiendenankupaq hinalla serviqninkunaman qawachirqa, chaynapi llapanchik entiendenanchikpaq. Qawasqankumanta yachasqanchikqa yanapawasunmi hanaq pachapi pikuna kasqankumanta allinta yachanapaq.