¿Imatam ruwananchik sumaq huertapi kawsakunapaq?

Yachamurqanchikmi mana allin runakunata Diosqa chinkachinanmantaña. ¿Imanasqataq chayna kananta ninchik? Kikin Dios palabranpi niwasqanchikraykum kaykunamantaqa mana iskayrayanchikchu:

“Diosta mana yupaychaq runakunaqa wañunqakum” (1 JUAN 2:17).

Bibliaqa willawanchiktaqmi mana llapallan runakuna wañunanmanta, hina chaypipunim nichkan:

“Diospa munayninta ruwaqmi ichaqa wiñaypaq kawsanqa”, nispa.

Arí, Diosta kasukuspanchikqa wiñaypaqmi kawsakusunchik. Chaypaqqa puntatam Diosta riqsinanchik.

WIÑAYPAQ KAWSAKUNAPAQQA DIOSTAM RIQSINANCHIK

Jesusmi nirqa: “Wiñay kawsayqa kanqa sapallan chiqap Dios kasqaykita riqsiqkunapaqmi”, nispa (Juan 17:3). Taytanchik Diospa piñakuynin punchawpi mana wañunapaqqa paytam riqsinanchik, chaynapi wiñaypaq kawsakunapaq. Manam Diosta riqsisqallanchikwanchu wiñaypaqqa kawsakusun, aswanqa Dioswan amistad kaspam. Imaynam piwanpas amistad kanapaqqa sumaqta riqsinakunanchik chaynam Dioswanpas. Imaynata Dioswan amistad kanamantam kunan yachachkasunchik, chaypaqmi bibliapa yachachikuyninkunata qawasunchik.

BIBLIANCHIKTAQA SAPA PUNCHAWMI ÑAWINCHANANCHIK

Sapa punchawmi mikunanchik kawsanapaqqa. Ichaqa Jesusmi nirqa: “Runaqa kawsanan manam tantallawanchu aswanqa Jehova Diospa lliw rimasqankunawanmi”, nispa (Mateo 4:4).

Bibliapim tarinchik Jehova Diospa palabrankunata. Chaymi bibliata ñawinchaspaqa yachasunchik ñawpaqpi Dios ima ruwasqanmanta, kunan ima ruwasqanta chaynataq hamuq tiempopi ima ruwananmanta.

JEHOVA DIOSTA YANAPAYKUWANANCHIKPAQ MAÑAKUSUN

Sasa kaptinpas, ¿imataq yanapawasun Jehova Diosninchikta kasukunapaq? Chaypaqqa yanapawasun Diosninchikta sumaqta riqsiymi.

Sakura sutiyuq warmichatam chay ruwaynin yanaparqa. Payqa huchapakuyllapi purikuq warmim karqa. Ichaqa, bibliata estudiaspanmi yacharurqa huchapakuyta Dios chiqnisqanta (1 Corintios 6:18). Chaymi chay warmichaqa Diosninchikta mañakullarqa kallpata quykunanpaq chaynapi mana allin vidanta saqinanpaq. Chaywanpas hinallaraqmi kallpanchakuchkan huchapakuyman mana wichiykunanpaq. Paymi nin: “Mana allin pensamientokuna chayamuwaptinmi Jehova Diosta mañakullani yanapaykuwananpaq, kikillaymanta mana atisqayrayku. Kay ruwasqayqa yanapawanmi Diosman astawan asuykunaypaq”, nispa. Sakura warmichata hinam waranqantin runamasinchikkunatapas Diosninchikqa yanapachkan mana allin vidankuta saqinankupaq, chaynapi paypa munasqanman hinaña kawsakunankupaq (Filipenses 4:13).

Aswantaraq Diosninchikta riqsiptinchikqa paypas ñuqanchiktam sumaqta riqsiwasunchik, sumaq amistadninta hinam kuyawasunchik (Galatas 4:9; Salmo 25:14). Diosninchikta riqsispallanchikmi wiñaypaqqa kawsakusunchik sumaq huertapiqa. ¿Imaynataq chay sumaq huertaqa kanqa? Qatiqninpim chaymanta yachaykusunchik.