¿Imakunatam Jesus ruwarqa taytanpa sutinrayku?

1, 2. (1) ¿Imakunatam Jesus ruwarqa wañukunan tuta? (2) ¿Imamantam kay yachachikuypi yachasun?

JESUCRISTOM ñuqanchikrayku wañukurqa 33 watapi 14 de nisan punchawpi. Chay tutam Diosman sunqu apostolninkunawan huñunakurqa. Payqa yachakurqañam manapas unaymanta Judas traicionananta hinaspa enemigonkuna ñakarichispanku wañuchinankuta. Chaymi cenaruptillanku apostolninkunata rimapayarqa hinalla Diosman sunqu kanankupaq. Chay wasimanta manaraq lluqsichkaptinkum taytanta tukuy sunqunwan mañakurqa. Chaypi ima nisqantam apostol Juan qillqarqa. Chaytam kunan tarinchik Juan 17 capitulopi.

² Kay yachachikuypim yachasun wañukunantaña yachakuchkaspanpas Jesus mañakuspan imakunapi astawan piensasqanmanta. Yachasuntaqmi kay pachapi kachkaspam imarayku tukuyta ruwasqanmantapas.

“SUTIKITAM YACHACHIRQANI”

3. ¿Imatam Jesus taytanta mañakuspan nirqa? ¿Chaywanqa imatam nichkarqa? (Rimarimuytaq Juan 17:​6, 26 nisqanmantapas).

³ Jesusmi taytanta mañakuspan nirqa: “Sutikitam yachachirqani”, nispan. Iskay kutikama chaynata nisqanwanmi yachanchik Jesusqa taytanpa sutinmanta sapa kuti rimasqanta (leey Juan 17:​6, 26). ¿Chaywanqa nichkarqa Diospa sutinta chayllaraq yachachisqantachu? Manam. Qatiqninkunaqa judio kasqankuraykum Diospa palabranta leerqaku. Chaymi yacharqakuña Diospa sutin Jehova kasqantaqa. Palabranpiqa waranqantin kutitañam Diospa sutinqa rikurirqa. Chaynaqa, Jesusqa nichkarqa Dios imayna kasqanmanta, imakunata ruway munasqanmanta hinaspa imakunataña ruwasqanmanta runakunaman yachachisqanmantam. Manam Jesus hinaqa pipas Jehova Diostaqa riqsirqachu. Chayraykum paylla tukuy chaykunamantaqa alli-allinta yachachirqa.

4, 5. (1) ¿Imaynam tarikuchwan wañuymanta salvaykuwaqninchik doctorpa sutinta uyarispaqa? (2) ¿Imatam Jesuspa apostolninkunaqa yuyarirqaku Diospa sutinta uyarispanku?

⁴ Jesuspa nisqanta astawan entiendenapaq rimarisun punta apaq chaynataq doctor iñiqmasinchikmanta. Ichapas chay iñiqmasinchiktaqa unayña riqsinchik. Ichaqa qunqaymanta ima accidentepas pasaruwaptinchik chay iñiqmasinchikpa llamkasqan hospitalman aparuwachwan. Hinaptin payñataq allinta atiendeykuwaspanchik wañuymantaña salvaruwachwan. ¿Manachu chay punchawmanta chay iñiqmasinchiktaqa astawan kuyachwan? Sutinta uyarispanchikpas ñuqanchikrayku ima ruwasqantachá yuyarichwan. Punta apaq kasqanta hinaspa sutinta unayña yachaspanchikpas chay punchawmantam paytaqa astawanraq kuyasun hinaspa agradecekusun wañuymanta salvawasqanchikrayku.

⁵ Chaynam Jesuspa qatiqninkunapas Diospa sutin Jehova kasqantaqa unayña yacharqaku. Chaywanpas Jesuspa yachachisqanwanmi imayna Dios kasqanta astawanraq yacharqaku. Jesusqa imapipas taytantamá qatipakurqa. Chaymi imayna yachachisqantawan runakunata kuyasqanta qawaspanku apostolninkunapas Jehova Dios imayna kasqanta astawan entienderqaku (Juan 14:9; 17:3). Chaymi Diosta astawan kuyarqaku, sutinta uyarispankupas chaylla yuyarirqaku imayna Dios kasqanta.

‘RIQSICHIWASQAYKI SUTIKI’

6. ¿Imanasqam Jesusqa nirqa taytan kikinpa sutinta payman qusqanta? (Rimarimuytaq Juan 17:​11, 12 nisqanmantapas).

⁶ Jesusmi qatiqninkunamanta rimaspan taytanta mañakurqa: ‘Paykunatayá cuidaykuy [ . . . ] riqsichiwasqayki sutikirayku’, nispan (leey Juan 17:​11, 12). “Riqsichiwasqayki sutikiraykum” nisqantam griego rimaypiqa nichkan “quwasqayki sutikiraykum” nispan. ¿Chaywanqa nichkarqa chay punchawmanta Jehova sutiwanña riqsichikunanmantachu? Manam. Taytanpa sutinmanta rimaspanmi Jesusqa nirqa “sutikiraykum” nispa. Chaywanmi yachanchik Jesuspa sutinqa mana cambiasqanta. Chaynaqa, ¿imanasqam Jesusqa nirqa taytan kikinpa sutinta qusqanmanta? Taytanpa sutinpi hinaspa rantinpi rimananpaq kay pachaman hamusqanraykum. Arí, kay pachapi kachkaspan tukuy ima admirakuypaq kaqkunata ruwaspanmi taytanpa sutinpi ruwasqanta nirqa (Juan 5:43; 10:25). Chaymantapas Jesus ninanqa “Salvaqninchikqa Jehova Diosmi” ninanmi. Chaynaqa, Jesusqa sutinpa ima ninan kasqanpim taytanpa sutintapas apan. Chayraykum Jesus nirqa taytan kikinpa sutinta payman qusqanta.

7. ¿Imanasqam nichwan Jesuspa imapas nisqanqa taytanpa nisqan hina kasqanta? Tupanachiywan rimarimuy.

⁷ Jesuspa nisqanta astawan entiendenapaq kaywan tupachisun: Huk kamachiqmi huk runata churan paypa rantinpi rimananpaq. Chaymantapacham chay runapa rimasqanqa kamachiqpa rimasqan hina. Chaynallataqmi Jehova Diospas Jesusta churarqa paypa rantinpi rimananpaq. Chaymantapacham Jesuspa rimasqanqa Diospa rimasqan hina (Mat. 21:9; Luc. 13:35).

8. ¿Imaynatam yachanchik Jesusqa kay allpa pachaman manaraq hamuchkaspan taytanpa ‘sutinpi’ imatapas ruwasqanta? (Rimarimuytaq Exodo 23:​20, 21 nisqanmantapas).

⁸ Jesusqa kay pachaman manaraq hamuchkaspanmi Diospa nisqankunatawan kamachikuyninkunata angelkunaman chaynataq runakunaman willaq. Chaymi bibliapiqa Jesustaqa sutichan ‘palabrawanpas’ (Juan 1:​1-3). Israel runakuna chunniqninta riptinkum Jehova Dios huk angelta kamachirqa pusananpaq hinaspa mana allinkunamanta harkananpaq. Yaqachusmi chay angelqa karqa Jesus. Chay angelta kasukunankumanta rimaspanmi Israel runakunata Jehova Dios nirqa: “Payqa ñuqapa sutiypim hamunqa”, nispan (leey Exodo 23:​20, 21).a Chaywanmi Dios sutillata nichkarqa Jesusqa paypa rantinpi imatapas ruwananta. Nisqanman hinamá karqa. Tukuy ima ruwasqanwanmi hinaspa yachachisqanwanmi Jesusqa pimantapas astawan defienderqa taytan chuya hinaspa allin ruwaq kasqanta.

“TAYTALLÁY, SUTIKITAYÁ HATUNCHAY”

9. ¿Imatam Jesus munarqa?

⁹ Yachamusqanchikman hinam, kay allpa pachaman manaraq hamuchkaspan Jesusqa munarqa taytanpa sutin hatunchasqa kananta, chaytataqmi munarqa kay pachaman hamuspanpas. Tukuy ima ruwasqankunawanmi sutilla karqa taytanpa sutin hatunchasqa kananta munasqan. Chaymi wañukunanpaqña kachkaspan taytanta mañakuspan nirqa: “Taytalláy, sutikitayá hatunchay”, nispa. Hinaptinmi hanaq pachamanta taytan nimurqa: “Hatuncharuniñam, chaywanpas huktawanraqmi hatunchasaq”, nispa (Juan 12:28).

10, 11. (1) ¿Imaynatam Jesusqa taytanpa sutinta hatuncharqa? (Qawaytaq dibujotapas). (2) ¿Imanasqataq Diospa sutinta respetachinanchik hinaspa defiendenanchik?

¹⁰ Jesusqa hatuncharqataqmi taytanpa sutintapas. ¿Imaynata? Jehova Dios sumaq sunquyuq kasqanmanta hinaspa admirakuypaq ruwasqankunamanta hukkunawan rimaspanmi. Qatiqninkuna imaynata mañakunankupaq yachachispanmi nirqa: “Hanaq pachapi taytayku, sutikiyá chuyanchasqa kachun”, nispa (Mat. 6:9). ¿Imanasqataq chaynata mañakunapaq yachachirqa? Payqa cuentatam qukurqa Diospa sutin chuyanchasqa utaq respetasqa kananmanta. Cuentatataqmi qukurqa satanasqa yanqa tumpasqanmanta lliw yachanankutapas.

¹¹ Chaynaqa, ¿imanasqataq Diospa sutinta respetachinanchik hinaspa defiendenanchik? Jehova Diosmanta llullakunata satanas chiqirachisqanraykum. Eden huertapim satanas nirqa Jehova Dios llulla kasqanta hinaspa Adanwan Eva kusisqa kanankuta mana munasqanta (Gen. 3:​1-5). Chaywanqa nichkarqa Diospa tantiasqankuna mana allin kasqantam. Tukuy chaykunawanmi Diospa sutinta pinqayman churachkarqa. Watakuna pasaytañataqmi Diosta serviq Jobpa tiemponpi satanasqa nirqa imatapas chaskinankuraykulla runakunaqa Diosta servisqankumanta. Chay nina qalluqa nirqaraqmi sasachakuykuna kaptin pipas Diosman sunqu mana kananmanta (Job 1:​9-11; 2:4). Chayraykum Jehova Diosqa kunankama tiempota saqichkan pim llulla kasqanta cuentata qukunanchikpaq.

‘VIDAYTAM QUNI’

12. ¿Imatam Jesus ruwarqa taytanpa sutinta defiendenanrayku?

¹² Jesusqa taytanta anchata kuyasqanraykum tukuyta ruwarqa Diosta respetanankupaq hinaspa satanas llulla kasqanta lliw yachanankupaq. Chayraykum nirqa: ‘Vidaytam quni’, nispan (Juan 10:​17, 18). Arí, payqa taytanpa sutinta defiendesqanraykum wañuchisqa kaytapas mana manchakurqachu.b Payqa manamá Adanwan Eva hinachu karqa. Paykunaqa mana pantaq kaspankupas Jehova Diosta qipancharuspankum satanastaña kasukurqaku. Jesusmi ichaqa taytanta kuyasqanrayku kay pachaman hamurqa, hinaspanmi tukuy tiempo taytanta kasukurqa (Heb. 4:15; 5:​7-10). Wañukunankamam Diosman sunqu karqa ñakarichisqa kaspanpas (Heb. 12:2). Chaywanmi qawachirqa Jehova Diosta kuyasqanta.

13. ¿Imaraykum Jesusqa yacharqa satanas llulla kasqanta? (Qawaytaq dibujotapas).

¹³ Imaña kaptinpas taytanta kasukusqanwanmi Jesusqa sutillata qawachirqa satanas llulla kasqanta (Juan 8:44). Jesusqa pimantapas astawanmi Jehova Diostaqa riqsin. Chayraykum yacharqa satanaspa ima nisqanpas mana cierto kasqanta. Chaymi tantiakurqa Jehova Diosta defiendenanpaq. ¿Imanasqam wañukunankama aguantarqa? Taytan kuyakuq kasqanmanta hinaspa satanas llulla kasqanmanta mana iskayrayasqanraykum (Mat. 27:46).c

‘TUKURUNIM RUWANAYPAQ KAMACHIWASQAYKITA’

14. ¿Imaynatam Jehova Dios Jesusta bendecirqa kasukuq kasqanrayku?

¹⁴ Wañukunan tuta taytanta mañakuspanqa Jesusqa nirqataqmi: “Tukurunim ruwanaypaq kamachiwasqaykita”, nispa. Payqa kasukuq kasqanraykum mana iskayrayarqachu taytan bendecinanmanta (Juan 17:​4, 5). Jehova Diosqa manamá sepulturapichu saqirurqa (Hech. 2:​23, 24). Aswanqa kawsarirachispanmi aswan atiyniyuq kananpaq hanaq pachapi churaykurqa (Filip. 2:​8, 9). Achka wata pasaytañataqmi Jesusqa Diospa gobiernonpi kamachinanpaq churasqa karqa. Chay Diospa gobiernon achka bendicionkunatam apamuwasun. Chaymi Jesusqa taytanta imayna mañakunanchikpaq yachachiwaspanchik nirqa: “Qamñayá kamachiwayku. Munasqaykiyá ruwasqa kachun kay pachapipas hanaq pachapi hina”, nispa (Mat. 6:10).

15. ¿Imakunatawanraqmi Jesusqa ruwanqa?

¹⁵ Kayllapiñam kachkan Diospa piñakuynin punchawqa. Chaypim Jesusqa Diospa enemigonkunawan peleaspan mana cambiay munaqkunata wañuchinqa (Apoc. 16:​14, 16; 19:​11-16). Bibliapiqa niwanchiktaqmi “uku-uku uchkuman” satanasta wischuykunanmantapas. Chaywanqa niwanchik satanas manaña imatapas ruwayta atinanmantam (Apoc. 20:​1-3). Chaymanta 1.000 wata Jesus kamachiyta qallaykuptinmi enteron allpa pachapi hawkaña kawsakusun. Paymi yanapawasun manaña pantaq kanapaq, wañukuqkunatapas kawsarichinqam, hinaspapas kay allpa pachanchiktam sumaqta huertayachinqa. Arí, Jehova Diospa munasqanman hinañamá kawsakusun (Apoc. 21:​1-4).

16. ¿Imaynañataq kawsakusun 1.000 wata Jesuspa kamachisqan tukuytaqa?

¹⁶ ¿Imaynañataq kawsakusun 1.000 wata Jesuspa kamachisqan tukuytaqa? Manaña huchayuqmi hinaspa manaña pantaqmi kasun. Manañam necesitasunchu huchanchikmanta Dios pampachawananchikpaq Jesus yanapawananchiktaqa nitaq Dioswan allinyanakunanchikpaq pipas yanapawananchiktaqa. Manañataqmi wañusunñachu. Wañusqakunapas kawsarichisqañam kanqaku. Llapallanchikmá manaña pantaq kasun (1 Cor. 15:​25, 26).

17, 18. (1) ¿Imataq pasanqa 1.000 wata Jesus kamachiyta tukuruptin? (2) ¿Imatam Jesus ruwanqa kamachisqan tukuyta? (Rimarimuytaq 1 Corintios 15:​24, 28 nisqanmantapas, qawaytaq dibujotapas).

¹⁷ Jesuspa 1.000 wata kamachisqan tukuytaqa manañam pipas iskayrayanqachu Dios chuya hinaspa allin ruwaq kasqanmantaqa. ¡Mayna kusikunapaqmi chayqa kanqa! Satanasmi Eden huertapi nirqa Dios llulla hinaspa mana allin kamachiq kasqanta. Nirqataqmi runakunata mana kuyasqantapas. Chaymantapacham Diosta serviqkunaqa sutinta defienderqaku. Chaymi achka runakunaña yacharunchik Diosqa haykapipas allin ruwaq kasqanta. Tukuy ima ruwasqankunawanmi sutilla kanqa Jehova Dios anchata kuyawasqanchik.

¹⁸ Jesus kamachiyta tukuruptinqa enteron allpa pachapi runakunamá yachanqaku Jehova Diosmanta satanaspa nisqankunaqa llulla kasqanta. ¿Imatañam Jesusqa ruwanqa? Tukuy imatam taytanpa makinman churaykunqa payña kamachinanpaq. Taytanta kuyasqanraykum kikinpas Diospa makinpiña churakunqa. Jesusqa manamá satanas hinachu taytanpa contranpi hatarinqa (leey 1 Corintios 15:​24, 28).

19. ¿Imanasqam Jesusqa taytanpa munasqanman hina imatapas ruwarqa?

¹⁹ Yachamusqanchikman hinam Diosqa Jesusta churarqa paypa rantinpi rimananpaq chaynataq imayna kasqanta riqsichinanpaq. Chaytamá ñawpaqmantaraq Jesusqa ruwachkan. ¿Imanasqa? Taytanpa sutin paypaq imamantapas aswan allin kasqanraykum. Taytanpa sutinta defiendenanraykum wañurqa, chayraykutaqmi 1.000 wata kamachisqan tukuytapas taytanpa makinmanña tukuy imata churanqa. ¿Imaynatam Jesusta qatipakuchwan? Chaymantam qatiqninpi yachasun.