¿Imanasqataq Jehova Diospa testigonkunaqa navidadta mana ruwankuchu?
Rimasqanku, imam kaq
Rimasqanku: Jehova Diospa testigonkunaqa Jesuspi mana iñisqankuraykum navidadtaqa mana ruwankuchu.
Imam kaq: Jesuspim iñiniku chayraykum mana iskayrayanikuchu paynintakamalla salvakunapaq kasqanmanta (Hechos 4:12).
Rimasqanku: Navidadta mana ruwanankupaq yachachisqankuwanmi ayllukunata rakinachinku.
Imam kaq: Ñuqaykuqa munanikum ayllukuna huk sunqulla kawsakunankuta chaymi bibliapi yachachikuykunawan yanapaniku.
Rimasqanku: Navidadqa imatapas quykanakuspa kusikunapaqmi. Testigokunaqa manam chayna kayta munankuchu, chaymi mana ruwankuchu.
Imam kaq: Ñuqaykuqa sapa punchawmi kallpanchakuniku piwanpas hawkalla kawsakunaykupaq hinaspa qukuykuq kanaykupaq (Proverbios 11:25; Romanos 12:18). Chaymi huñunakuyniykupi qullqita mana mañanikuchu nitaq Diosmanta willakuspaykupas, aswanqa Jesuspa kayna nisqantam kasukuniku: “Mana imallawanmi chaskirqankichik [...] mana imallapaqtaqyá qamkunapas qumuychik’, nisqanta (Mateo 10:8). Chaymantapas, Dios kamachimuptin runakunapa tukuy sasachakuynin manaña kananmantam willakuniku (Mateo 10:7).
¿Imanasqataq Jehova Diospa testigonkunaqa navidadta mana ruwankuchu?
Jesusqa kamachirqa wañukusqan punchawta yuyarinanchikpaqmi manam nacesqan punchawta yuyarinapaqchu (Lucas 22:19, 20).
Apostolkunapa tiempopi kaq iñiqkunaqa manam navidadtaqa ruwarqakuchu. Huk qillqapa nisqanman hinaqa apostol Juanpa wañukusqanmanta iskay pachak wata pasaytañas Roma nacionpi 330 watapi navidad ruwaytaqa qallaykusqaku (Diccionario del cristianismo).
Bibliaqa manam willakunchu 25 diciembre punchawpi Jesus nacesqanmantaqa nitaqmi ima qillqapas willakunchu imay punchawpipuni Jesus nacesqanmantaqa.
Jehova Diosqa manam allinpaqchu qawan navidad ruwaytaqa ¿imanasqa? Navidadqa taytacha-mamacha yupaychay costumbrekunamanta hamusqanraykum (2 Corintios 6:17).
¿Imanasqataq Jehova Diospa testigonkunaqa yaqa lliw runakunapa ruwasqanta mana ruwankuchu?
Navidadta ruwayninku bibliapa yachachisqanwan mana tupasqanta yachaspapas hinaspa costumbreman hina kasqanta yachaspapas chaykunata mana kaqpaqpas hapispam hinalla ruwanku.
Bibliam yachachiwanku allinta piensarispa sapakama tanteakunaykupaq (Romanos 12:1, 2). Yachachiwankutaqmi Diospa yachachisqanman hina kawsakunaykupaqpas (Juan 4:23, 24). Ñuqaykuqa Jehova Dios kasukuytam munaniku, chaymi mana ruwanikuchu costumbreman hina hukkunapa ruwasqankutaqa.
Manataqmi michakunikuchu navidadta hukkuna ruwanankutaqa, chaypaqqa sapakamam tanteakunanku.