Éxodo
4 Moisesmi ichaqa nirqan: “Mana uyariwanqakuchu ni creewanqakupaschu chayri, ¿imatataq ruwasaq?+ Yaqapaschá niwanqaku: Yanqan qanqa Jehová Diosmi rijurimuwan nishanki, nispa”. 2 Jinan Jehová Diosqa nirqan: “¿Imatan makiykipi jap’ishanki?”, nispa. Moisestaq nirqan: “Juj varata”, nispa. 3 Chayta niqtinmi Diosqa nirqan: “Chayta pampaman chanqay”, nispa. Jinan Moisesqa chanqarqan, chanqaqtin jinan chay varaqa mach’aqwayman tukurqan.+ Chayta rikuspan Moisesqa ayqerikurqan. 4 Chaymantataq Jehová Diosqa Moisesta nirqan: “Chupanmanta jap’iy”, nispa. Jinan Moisesqa jap’irqan, makinpitaq mach’aqwayqa kaq varaman tukupurqan. 5 Chaymantan Diosqa nillarqantaq: “Chaywanmi paykunaqa creenqaku ñaupa taytaykichis Abrahanpa, Isaacpa, Jacobpa Diosnin Jehová Dios qanman rijurisqayta”,+ nispa.
6 Jehová Diosqa nillarqantaqmi: “Makiykita p’achayki ukhuman winaykuy”, nispa. Jinan Moisesqa makinta p’achan ukhuman winaykurqan. ¡Orqoruqtintaq makinqa lepra* onqoyniyoq kapushasqa! ¡Rit’i jinaraqmi yuraqllaña kashasqa!+ 7 Chaymantan Diosqa nillarqantaq: “Makiykita jujmanta p’achayki ukhuman winaykuy”, nispa. Jinan Moisesqa makinta jujmanta winaykurqan. ¡Orqoruqtintaq makinqa wakin cuerpon jina allin kapushasqa! 8 Diosqa nillarqantaqmi: “Manachus ñaupaq señalwan creesunkiku chayqa, iskay kaq señalwanqa creesunkikun.+ 9 Manachus chay iskaynin señalwanpas creesunkiku nitaq kasusunkikupaschu chayqa, Nilo mayumantan unuta orqomunki, chaytataq ch’aki pampaman jich’anki. Chay unun ch’aki pampapi yawarman tukunqa”,+ nispa.
10 Moisesmi ichaqa Jehová Diosta nirqan: “Disculpaykuway Jehová Diosníy, kay kamachiykiqa manan usqhay rimaq runachu kani. Manan kunallanchu chhayna kashani, noqaqa jinapunin kani. Manapunin usqhay rimaqchu kani, rimaqtiypas qalluyraqmi watakun”,+ nispa. 11 Jinan Jehová Diosqa nirqan: “¿Pin runaman simita qorqan? ¿Pin runata upaman tukuchinman? ¿Pin runata ñausamanpas rikuqmanpas tukuchinman? ¿Manachu noqa Jehová Dios? 12 Chhaynaqa rillay, noqan simita qosayki, noqan yachachisayki ima rimanaykitapas”,+ nispa. 13 Moisesmi ichaqa nirqan: “Disculpaykuway Jehová Diosníy, aswanpas jujta kachay, ama noqataqa”, nispa. 14 Chayta niqtinmi Jehová Diosqa sinchita phiñakurqan, jinaspa nirqan: “Leví runa wayqeyki Aaronmi+ yanapasunki, noqaqa yachanin payqa allin rimaq kasqanta. Paymi aypamusunki, qanta rikuspan payqa anchata kusikunqa.+ 15 Llapa nisqaytan payman willanki.+ Rimaqtiykichisqa qankunawanmi kashasaq,+ noqan yachachisaykichis imachus ruwanaykichistapas. 16 Aaronmi llaqta runakunata rimapayanqa qanpa rantiykipi. Qantaq imachus nisqayta Aaronman willanki noqapas rimapayashayman jinata.*+ 17 Chay varatawanmi apanki, chaywanmi nisqay señalkunata ruwanki”,+ nispa.
18 Jinan Moisesqa suegron Jetroq kasqanman kutispa+ nirqan: “Ama jinachu kay, Egipto llaqtata kutisaq nishanin. Wayqeykuna kausashankuraqchus icha manachus chaytan yachamuyta munashani”, nispa. Jetrotaq nirqan: “Chhaynaqa sumaqlla riy”, nispa. 19 Moisesqa Madián ladopin kasharqan, chaypin Jehová Diosqa nillarqantaq: “Phaway Egiptoman kutiy, wañuchiyta munasuqniyki runakunaqa ñan wañupunkuña”,+ nispa.
20 Chaymi Moisesqa esposanta wawankunatawan asnoman sillaykachispa Egiptoman puririrqan. Aparqanmi Diospa varantapas. 21 Jujmantan Jehová Diosqa Moisesta nillarqantaq: “Egiptoman kutispaqa atiy qosqaywanmi faraonpa* ñaupanpi yachachisqay milagrokunata ruwanki.+ Ichaqa noqan faraonpa sonqonta rumiyachisaq,+ chaymi payqa chaykunataña ruwanki chaypas mana Israel runakunata kacharinqachu.+ 22 Chay pasaqtinmi qanqa faraonta ninki: Jehová Diosmi nin: Israelqa wawaymi, payqa phiwi* churiymi.+ 23 Chayraykun niyki: Wawayta kachariy adorawananpaq, manachus kacharinki chayqa phiwi wawaykitan wañuchisaq,+ nispayki”, nispa.
24 Alojakuq rishaqtinkun Jehová+ Diosqa paywan tuparqan, jinan wañuchiyta munarqan.*+ 25 Chaymi Ziporaqa+ filo rumita jap’ispa wawanpa qhari kaynin qarachata kuchurqan. Chaywantaq paypa chakinman tupaykachirqan, jinaspa nirqan: “Qanqa yawarwan rimanasqa novioymi kanki”, nispa. 26 Jinan Diosqa dejallarqan ripunanta. Chay ratun Ziporaqa wawanpa qhari kaynin qarachata kuchusqanrayku nirqan: “Yawarwan rimanasqa novio”, nispa.
27 Jehová Diosmi Aaronta nirqan: “Ch’inneq ladota riy Moisesman aypaq”,+ nispa. Jinan Aaronqa Diospa ajllakusqan orqota rirqan Moisesman aypaq,+ chaypin payqa Moisesta much’aykuspa napaykurqan. 28 Moisesqa Jehová Diospa llapa nisqantan Aaronman willarqan.+ Willarqanmi señalkuna ruwananpaq kamachisqantapas.+ 29 Chaymantataq Moiseswan Aaronwan kuska rispanku Israelpi llapa umalliqkunawan* juñukurqanku.+ 30 Aaronmi paykunaman willarqan imakunatachus Jehová Dios Moisesman nirqan chayta, Moisestaq Diospa nisqan señalkunata+ Israel runakunaq ñaupanpi ruwarqan. 31 Paykunaqa creerqankun Moisesta.+ Jinaspa Jehová Dios paykunata yuyarisqanta yachaspa,+ sufrisqankutapas rikusqanta yachaspa,+ qonqorikuspa pampakama k’umuykurqanku.