Jeremías
18 Jehová Diosmi Jeremiasta khaynata nirqan: 2 “T’uruwan llank’aq runaq wasinta riy,+ chaypin qanwan rimasaq”, nispa.
3 Chaymi noqaqa t’uruwan llank’aq runaq wasinta jaykurqani, chay runaqa torno patapin mankata ruwashasqa. 4 Chay ruwashasqan mankan ichaqa mana allinchu lloqsirqan, chaymi payqa jujmanta chay t’uruwan llank’ayta qallarirqan, munasqanman jinan juj mankatañataq ruwarqan.
5 Jinan Jehová Diosqa rimapayamuwarqan, khaynatan niwarqan: 6 “Israel runakuna, ¿manachu chay manka ruwaq runa jina qankunawanpas ruwayta atiyman? Israel runakuna, t’uruwan llank’aq runaq makinpi t’uru jinan qankunaqa makiypi kashankichis,+ ninmi Jehová Dios. 7 Sichus juj nacionta, juj gobiernota t’irasayki, thunisayki,+ ch’usaqyachisayki niqtiy 8 chay nación mana allin ruwayninta saqepunqa chayqa, yuyaykusqaytan cambiasaq, manañan piensasqayman jinañachu paykunata ch’usaqyachisaq.+ 9 Ichaqa sichus juj nacionta, juj gobiernota perqasayki, sayachisayki* niqtiy 10 chay nación cheqnisqay ruwaykunata ruwanqa, mana kasukuwanqapaschu chayqa, paykunapaq allinkuna yuyaykusqaytan manaña ruwasaqñachu.
11 ”Kunanqa, ama jinachu kay, Judá runakunaman, Jerusalenpi tiyaq runakunaman kayta willamuy: Jehová Diosmi nin: Qankunata castiganaypaqmi yuyaykushani, imaynata ñak’arichinaypaqmi piensashani. Ama jinachu kaychis, mana allin ñanta saqepuychis, imayna kasqaykichista imayna kausasqaykichistapas allichaychis,+ nispa”.
12 Paykunan ichaqa nirqanku: “¡Yanqan chayqa!+ Noqaykuqa yuyaykusqaykuman jinan ruwasaqku, llapaykun k’ulluchakuspa millay sonqoykuq munasqanwan aysachikusaqku”,+ nispa.
13 Chaymi Jehová Dios khaynata nin:
“Qankuna kikiykichis nacionkunapi tapukamuychis,
¿Pillapas chhayna rimaqta uyarirqanchu?
Sipas Israelqa sinchi millay kaqtan ruwarqan.+
14 ¿Líbano orqopi qaqakunamanta rit’i chinkanmanchu?
¿Karu orqomanta phawamuq unu ch’akinmanchu?
15 Llaqtaymi ichaqa noqata qonqapuwan.+
Mana valeq kaqkunamanmi sacrificiokunata q’osñichinku,+
runakunatan misk’achinku, ñaupa taytankuq purisqan ñankunapin urmachinku,+
juj ladonta purinankupaqmi, mana allichasqa ñankunata purinankupaqmi pantachinku,
16 jallp’ankuta mancharikunaman tukuchinankupaqmi chayta ruwanku,+
silbapayasqa, asipayasqa kanankupaqmi chaytaqa ruwanku.+
Llapa chayninta puriqkunan sinchi admirasqa qhawanqaku, umankuta maywispan qhawanqaku.+
17 Inti lloqsimuy ladomanta jamuq wayra jinan enemigonkuq ñaupanpi ch’eqechisaq.
Sasachakuy p’unchaypi tarikuqtinkupas manan qhawarisaqchu, qhepancharparisaqmi”,+ nispa.
18 Paykunataq nirqanku: “Jamuychis, Jeremiaspa contranpi rimanakusun,+ sacerdotekunaqa yachachishawallasunmi, yachayniyoq runakunaqa yuyaychashawallasunmi, profetakunapas willashallanqakun. Jeremías contra rimasunchis, ama ima nisqantapas uyarisunchu”, nispa.
19 Diosnilláy Jehová, uyariykuway,
enemigoykunaq imachus nisqanta uyariy.
20 ¿Allinchu kanman allin kaqta mana allin kaqwan kutichiy?
T’oqotan ruwanku wañuchiwanankupaq.+
Yuyariy, askha kutitan ñaupaykiman jamurqani,
paykunaq allinninpaqmi rimapayarqayki,
phiñakuyniykita ama paykunaman chayachinaykipaqmi rimapayarqayki.
21 Chhaynaqa, wawankunata yarqaymanta wañuchiy,
espadawan paykunata wañuchiy.+
Warminkupas mana wawayoq, mana qosayoq qhepachunku,+
qharinkupas millay onqoywan wañuchunku,
wayna churinkupas maqanakuypi espadawan wañuchunku.+
22 Suwakunata wasinkuman kachaykuy,
wasinkumanta qaparisqanku uyarikuchun.
Jap’iwanankupaqmi t’oqota ruwanku,
purinaymanmi trampakunata churanku.+
23 Jehová Diosníy, qanqa allintan yachashanki,
rikushankin imakunatachus wañuchiwanankupaq yuyaykushanku chayta.+
Amapuni paykunataqa perdonaychu,
amapuni juchankutaqa qonqaychu.