Marcos

2 Pisi p’unchaykuna qhepamanmi Jesusqa wajmanta Capernaún llaqtaman jaykurqan, chayneqpi runakunataq wasipi kashasqanta yacharurqanku.+ 2 Jinan askhallaña chay wasiman juñukamurqanku, manañan ni punkupipas campo karqanñachu, Jesustaq Diospa siminta paykunaman willayta qallarirqan.+ 3 Chaypi yachachishaqtinmi mana kuyuriy atiq runata tawamanta wantuspa apamurqanku.+ 4 Ichaqa askha runakuna kasqanraykun mana Jesusman apaykuyta atirqankuchu, chaymi paykunaqa wasiq techonta t’oqospa chayninta chay runata juj camillapi Jesuspa kasqanman uraykachirqanku. 5 Jesustaq iñiyniyoq kasqankuta rikuspa+ chay mana kuyuriq runata nirqan: “Wawalláy, juchaykikunan perdonasqa kapun”,+ nispa. 6 Chaypin tiyasharqanku kamachikuy simita wakin yachachiqkunapas, paykunan sonqonkupi nisharqanku:+ 7 “¿Imaraykutaq kay runari khaynata riman? Diostamá k’amishan chaywanqa, ¿pitaq juchakuna perdonaytari atinman, manachu Dioslla?”,+ nispa. 8 Chaymi Jesusqa chhayna piensasqankuta reparaspa nirqan: “¿Imaraykun sonqoykichispi chhaynata piensashankichis?+ 9 ¿Mayqentaq aswan fácil kanman? ¿Mana kuyuriy atiq runata: Juchaykikunan perdonasqa kapun, niychu, icha: Jatarispa camillaykita oqarispa ripuy, niychu? 10 Yachanallaykichispaqpas, runaq Churinqa*+ atiyniyoqmi kay pachapi juchakunata perdonananpaq”,+ nispa. Chayta nispataq chay mana kuyuriy atiq runata nirqan: 11 “Sayariy, camillaykita oqarispa wasiykiman ripuy”, nispa. 12 Jinan chay runaqa sayarispa camillantapas oqarispa llapa runakunaq ñaupanmanta lloqsipurqan, runakunataq chaywan anchata admirakurqanku, Diosta jatunchaspataq nirqanku: “Manamá jayk’aqpas khaynakunaqa rikukurqanchu”,+ nispa.

13 Wajmantan Jesusqa qocha pataman rillarqantaq, lliu runakunataq payman juñukamurqanku, jinan paykunata yachachiyta qallarirqan. 14 Purishaspan Jesusqa rikurqan Alfeoq wawan Leví* sutiyoq runata impuesto cobranapi tiyashaqta, jinan Jesusqa payta nirqan: “Qatikamuway”,* nispa; paytaq sayarispa qatikurqan.+ 15 Chay qhepamanmi Jesusqa Levipa wasinpi mijusharqan, chaypin askha kasharqanku impuesto cobraqkuna juchasapa runakunapas; paykunaqa Jesuswan discipulonkunapiwan kuskan mijusharqanku. Paykunamanta askhan Jesusta qatikusharqanku.+ 16 Fariseo* t’aqamanta kamachikuy simita yachachiqkunan ichaqa, impuesto cobraqkunawan juchasapakunapiwan mijusqanta rikuspa Jesuspa discipulonkunata nirqanku: “¿Imaraykun yachachiqniykichis mijun impuesto cobraqkunawan juchasapakunawan ima?”, nispa. 17 Chayta uyarispan Jesusqa paykunata nirqan: “Qhalikunaqa manan doctorta necesitankuchu, onqosqakunan ichaqa necesitanku. Noqaqa manan chanin runakunata wajaqchu jamuni, aswanpas juchasapakunata wajaqmi”,+ nispa.

18 Juanpa discipulonkunapas fariseokunapas ayunaqkun. Chaymi Juanpa discipulonkunaqa Jesusman qayllaykuspa nirqanku: “Noqaykupas fariseokunaq discipulonkunapas ayunaykun, ¿imanaqtintaq discipuloykikunari mana ayunankuchu?”,+ nispa. 19 Jinan Jesusqa paykunata nirqan: “¿Ayunankumanchu novioq+ amigonkuna novio paykunawanraq kashaqtin? Manan allinchu kanman novio paykunawanraq kashaqtin amigonkuna ayunankuman chayqa ¿riki? 20 Ichaqa chayamunqan p’unchaykuna, chaypin novioqa paykunamanta qechusqa kanqa,+ chay p’unchayñan paykunaqa ayunanqaku. 21 Manan pipas mauk’a p’achamanqa mosoq telawan remiendanmanchu, chaytachus ruwanman chayqa chay mosoq telan q’estispa* mauk’a p’achata chutarispa astawanraq llik’irparinman.+ 22 Chaymantapas manan pipas mana poqosqa vinotaqa mauk’a qara p’uyñukunaman* jich’aykunmanchu. Jich’aykunmanchus chayqa, chay p’uyñukunachá phatapunman vino poqoqtin, chhaynapitaq vinoqa usunman, qara p’uyñukunapas manaña valepunmanchu. Aswanpas mana poqosqa vinotaqa mosoq qara p’uyñukunamanmi jich’aykuna”, nispa.

23 Samana p’unchaypi* chajra-chajranta Jesús pasashaqtinmi discipulonkunaqa purin-purin trigota p’itispa* mijuyta qallarirqanku.+ 24 Jinan fariseokunaqa Jesusta nirqanku: “¡Qhawariy! ¿Imaraykun samana p’unchaypi mana ruwanata ruwashanku?”, nispa. 25 Jesustaq paykunata nirqan: “¿Manachu jayk’aqpas leerqankichis imatachus David ruwarqan chayta? ¿Manachu leerqankichis imatachus paywan runankunapiwan yarqaypi tarikushaspa ruwarqanku chayta?+ 26 Uma sacerdote Abiatarmanta+ willakuypi nisqan jina, Diospa wasinman jaykuspan Davidqa Diosman jaywasqa t’antata mijurqan, qoykurqanmi runankunamanpas. Chay t’antataqa manan pipas mijunanchu karqan, aswanpas sacerdotekunallan.+ ¿Manachu chayta leerqankichis?”, nispa. 27 Chaymantan nillarqantaq: “Samana p’unchayqa runakunaraykun churasqa karqan,+ manataqmi runakunachu samana p’unchayrayku kamasqa karqan. 28 Chhaynaqa, runaq Churinqa samana p’unchaypapas Señorninmi”,+ nispa.