Lucas

22 Pisillañan kasharqan+ Mana Levadurayoq T’anta Fiestapaq, chay fiestataqa “Pascua” nikullantaqmi.+ 2 Umalli sacerdotekunawan kamachikuy simita yachachiqkunawantaq piensasharqanku imaynatachus Jesusta wañuchinkuman chayta,+ ichaqa runakunatan manchakusharqanku.+ 3 Satanasmi Iscariote sutichasqa Judasman jaykurqan, payqa chunka iskayniyoq apostolkunamanta jujninmi karqan.+ 4 Jinan Judasqa rispa umalli sacerdotekunawan templota qhawaq umallikunapiwan rimanakurqan imaynatachus paykunaman Jesusta jap’ichinman chayta.+ 5 Chaywanmi paykunaqa anchata kusikurqanku, rimanakurqankutaq Judasman qolqeta qonankupaq;+ 6 Judastaq allinmi nirqan. Chaymantapachan payqa piensasharqan imaynatachus runakunaq mana yachasqallan Jesusta jap’ichinman chayta.

7 Mana Levadurayoq T’anta Fiesta p’unchaymi chayamurqan, chaypin Pascua Fiestapaq+ uywata ñak’anapuni kaq. 8 Jinan Jesusqa Pedrota Juantawan nirqan: “Rispa Pascua Fiestapaq mijunata preparamuychis mijunanchispaq”,+ nispa. 9 Chaymi paykunaqa nirqanku: “¿Maypi preparamunaykutan munashanki?”, nispa. 10 Jinan Jesusqa paykunata nirqan: “Llaqtaman jaykuspaykichismi unu p’uyñu apashaq runawan tupankichis. Paypa qhepantan rinkichis maymanchus jaykunqa chay wasi ukhukama.+ 11 Jinaspan wasiyoqta ninkichis: Yachachikuqmi nin: ¿Maypin kashan visita chaskinayki cuarto, chaypi discipuloykunapiwan Pascua mijunata mijunaypaq?, nispa. 12 Jinan payqa altospi juj jatun cuartota rikuchisunkichis listollataña, chaypin alistamunkichis”, nispa. 13 Paykunataq rispa Jesuspa nisqanta jina tarirqanku, jinaspa chaypi Pascua Fiesta mijunapaq imachus necesitakusqanta alistarqanku.

14 Mijuna hora chayamuqtintaq Jesusqa mesapi tiyaykurqan apostolninkunawan kuska.+ 15 Chaypin Jesusqa paykunata nirqan: “Maytapunin munasharqani manaraq ñak’arishaspay kay Pascua Fiesta mijunata qankunawan kuska mijuyta, 16 niykichismi: Manan chayta wajmanta mijusaqchu Diospa gobiernonpi junt’akunankama”, nispa. 17 Copata chaskikuspataq Diosman graciasta qorqan, jinaspa nirqan: “Kay copata jap’iychis, jinaspa sapankaykichis chaymanta ujaychis, 18 niykichismi: Kunanmantaqa manapunin vinotaqa wajmanta ujasaqchu Diospa gobiernon chayamunankama”, nispa.

19 Chaymantapas juj t’antata jap’ispan+ Diosman graciasta qorqan, p’akispataq paykunaman jaywarqan: “Kayqa cuerpoytan representan,*+ chayqa qankunaraykun qosqa kanqa.+ Kaytaqa ruwallankichispunin noqata yuyariwanaykichispaq”,+ nispa. 20 Kaqllatataqmi copawanpas ruwarqan, cenayta tukuqtinkun nirqan: “Kay copaqa mosoq rimanakuytan+ representan,* yawarniymi chaytaqa valechinqa.+ Chay yawarniymi qankunarayku jich’asqa kanqa.+

21 ”Jap’ichiwaqniyqa noqawan kuskan mesapi kashan.+ 22 Runaq Churinqa imachus paymanta nisqaña kashan chayman jinan ripunqa;+ ichaqa, ¡ay imaraqmi kanqa chay jap’ichiqnin runamantaqa!”,+ nispa. 23 Jinan paykunaqa tapunakurqanku mayqenninkuchus chay mana allin ruwaq kashanman chayta.+

24 Chaymantapas paykunapuran sinchita discutirqanku mayqenninkuchus kuraqpaq jap’isqa karqan chaymanta.+ 25 Jinan Jesusqa paykunata nirqan: “Nacionkunapi reykunaqa kamachisqanku runakunatan dueñochakunku; chay runakunata kamachiqkunataq, allin ruwaqkuna nisqa kanku.+ 26 Qankunan ichaqa mana chhaynachu kanaykichis.+ Aswanpas, pipas qankuna ukhupi kuraqpaq qhawarikuqqa sullk’a jina kachun,+ pipas umalliq kaqtaq jujkunata serviq kachun. 27 ¿Mayqenmi kuraq kanman? ¿Mijuqchu icha serviqchu? Mijuqmi ¿riki? Chaywanpas noqaqa serviqniykichis jinan qankuna ukhupi kashani.+

28 ”Qankunaqa noqallawanpunin kasharqankichis+ pruebakunapiña tarikuqtiypas,+ 29 chaymi noqaqa qankunawan rimanakuni juj gobiernopaq, imaynan Taytaypas noqawan rimanakurqan jinata,+ 30 chhaynapi gobiernoypi noqawan kuska mesaypi mijunaykichispaq ujanaykichispaq ima,+ tronokunapi tiyaykuspa+ Israelpa chunka iskayniyoq ayllunkunata juzganaykichispaqwan.+

31 ”Simón, Simón, Satanasqa ñan ninña llapaykichista trigota jina suysunasuykichispaq.+ 32 Noqan ichaqa rogakuniña iñiyniykipi ama pisipanaykipaq;+ kutimuspaykin wayqeykikunata* kallpachanki”,+ nispa. 33 Jinan Pedroqa payta nirqan: “Señor, noqaqa liston kashani qanwan kuska carcelmanpas wañuymanpas chayanaypaq”,+ nispa. 34 Jesustaq ichaqa nirqan: “Pedro, noqan niyki: Kunanmi manaraq gallo waqashaqtin kinsa kutita, manan reqsinichu niwanki”,+ nispa.

35 Chaymantataq Jesusqa paykunata nirqan: “Mana qolqeyoqta,* mana qoqawayoqta, mana usut’ayoqta ima qankunata kachaqtiy,+ ¿pisirqasunkichischu imaykichispas?”, nispa. Paykunataq: “¡Manan!”, nirqanku. 36 Jinan Jesusqa paykunata nirqan: “Kunan ichaqa qolqeykichispas qoqawaykichispas kaqtinqa apakuychis, espadaykichis mana kanchu chayqa, jawa p’achaykichista vendespa jujta rantikuychis. 37 Niykichismi: Noqamantan qelqakurqan: Payqa juchallikuqkunawanmi yupasqa karqan,+ nispa, chayqa junt’akunanmi, junt’akushanñataqmi kanpas”,+ nispa. 38 Chaymi paykunaqa nirqanku: “Señor, ¡qhawariy! Kaypi iskay espadakuna kashan”, nispa. Jesustaq nirqan: “Chaylla kachun”, nispa.

39 Chaymanta lloqsispataq Jesusqa imaynan rillaqpuni jinata Olivos orqoman rirqan, discipulonkunapas qhepantan rillarqankutaq.+ 40 Chayman chayaspataq paykunata nirqan: “Diosmanta mañakushaychis tentacionman ama urmanaykichispaq”,+ nispa. 41 Jinaspa paykunamanta t’aqarikuspa rumi chanqayman jina rirqan, qonqorikuspataq mañakuyta qallarirqan: 42 “Taytáy, munanki chayqa, kay copata* noqamanta karunchay. Ichaqa ama munasqaychu kachun, aswanpas qanpa munasqayki”,+ nispa. 43 Chayllamanmi juj ángel rijurimurqan, jinaspa payta kallpacharqan.+ 44 Jesusqa sinchi llakisqan kasharqan, chaymi astawanraq tukuy sonqowan mañakurqan,+ jump’inpas yawar jinaraqmi pampaman sut’umurqan. 45 Chaymantataq mañakusqanmanta sayarispa discipulonkunaq kasqanman kutispa paykunata puñushaqta tarirqan, paykunaqa llakiq ñit’isqanmi puñurapusqaku.+ 46 Chaymi Jesusqa paykunata nirqan: “¿Imaraykun puñushankichis? Jatariychis jinaspa ama sayk’uspa mañakushallaychis, chhaynapi ama tentacionman urmanaykichispaq”,+ nispa.

47 Rimashallaqtinraqmi askha runakuna rijurimurqanku, paykunatan pusamusqa chunka iskayniyoq apostolkunamanta jujnin, paymi karqan Judas, paymi Jesusman qayllaykuspa much’aykurqan.+ 48 Jinan Jesusqa payta nirqan: “Judas, ¿juj much’aywanchu runaq Churinta jap’ichinki?”, nispa. 49 Paywan kashaqkunataq imachus pasananta reparaspa Jesusta nirqanku: “Señor, ¿k’irirusaqkuchu espadawan?”, nispa. 50 Paykunamanta jujninqa k’irirqanpunin uma sacerdoteq kamachinta, espadawami paña ninrinta qhorurqan.+ 51 Jinan Jesusqa paykunata nirqan: “Ama chayta ruwaychischu”, nispa. Chay kamachiq ninrinta llamiykuspataq qhaliyachirqan. 52 Chaymantataq Jesusqa payman jamuq umalli sacerdotekunata, templota qhawaq umallikunata, umalliq runakunatawan* nirqan: “¿Suwaman jinachu jamuwarqankichis espadakunantin k’aspikunantin ima?+ 53 Sapa p’unchaymá riki qankunawan templopi kasharqani,+ ¿imaraykutaq manari jap’iwarqankichischu?+ Ichaqa kunanmi qankunaq horaykichis chayamun, jinallataq tutayaqpa kamachikunan horapas”,+ nispa.

54 Jinan paykunaqa presota jap’ispa aparqanku,+ jinaspa uma sacerdoteq wasinman jaykuchirqanku; Pedrotaq ichaqa karullamanta qatiparqan.+ 55 Chaupi patiopi ninata jap’ichispankun paykunaqa chaypi tiyaykurqanku, Pedropas paykunawan kuskan tiyasharqan+ 56 ninapi q’oñikuspa. Payta rikuruspataq juj warmi kamachi allinta qhawaykuspa nirqan: “Kay runapas paywantáq kasharqanqá”, nispa. 57 Paytaq ichaqa negaspa nirqan: “Manan paytaqa reqsinichu”, nispa. 58 Chayllamanmi juj runañataq rikuruspa nirqan: “Qanpas paykunamanta jujninmá kashanki riki”, nispa. Pedrotaq “manan”+ nirqan. 59 Juj horamanta jinataq jujñataq atipakusparaq nirqan: “¡Cheqaqtapunin kay runapas paywan kasharqan, payqa Galilea llaqtayoq runamá kashan riki!”, nispa. 60 Pedrotaq ichaqa nirqan: “Imatachá rimakushankipas”, nispa. Chayta rimashallaqtinraqmi juj gallo waqarqan. 61 Chay ratun Señorqa kutirispa payta qhawarirqan, chaywanmi Pedroqa yuyarirqan: “Kunanmi manaraq gallo waqashaqtin kinsa kutita negawanki”,+ nispa Señorpa nisqanta. 62 Chaymi jawaman lloqsispa khuyayta waqaykurqan.

63 Jesusta qhawanankupaq encargasqa runakunan payta asipayayta qallarirqanku+ maqarqanku ima,+ 64 uyanta taparuspataq saqmakacharqanku: “Profeta kanki chayqa, niwayku pichus saqmashasunki chayta”, nispa. 65 Chaymantapas imaymanakunatan payta k’amirqanku.

66 P’unchayamuqtintaq llaqtapi umalliq runakunaqa umalli sacerdotekunawan kamachikuy simita yachachiqkunapiwan juñunakuspanku,+ Jatun Juntaq* juñunakunan wasiman Jesusta aparqanku, jinaspa tapurqanku: 67 “Niwayku, ¿qanchu kanki Cristo?”,+ nispa. Paytaq nirqan: “Niykichismanña chaypas, manapunin creewaqchischu. 68 Tapuykichismanña chaypas, manan kutichiyta atiwaqchischu. 69 Kunanmantan ichaqa runaq Churinqa+ atiyniyoq Diospa paña ladonpi tiyaykunqa”,+ nispa. 70 Chayta niqtinmi llapanku nirqanku: “Chhaynaqa, ¿qanchu kanki Diospa Churin?”, nispa. Jesustaq paykunata nirqan: “Qankuna kikiykichismi chaytaqa ninkichisña”, nispa. 71 Jinan paykunaqa nirqanku: “Noqanchispunitaq siminmanta uyarishanchis chayqa, ¿imapaqñan testigotapas munasunman?”,+ nispa.