Romanos
9 Noqaqa Cristoq discipulon jinan cheqaqta rimashani, manan llullakushanichu, concienciaypas santo espirituq pusasqanmi sut’itapuni willakun: 2 Noqaqa sinchi llakisqan kashani, may sonqo nanasqan kashani. 3 Noqaqa liston kashani Cristota mana reqsiq ñakasqa runa jina kanaypaq llaqtamasiy wayqeykunata* yanapaykunayrayku. 4 Chay wayqeykunatan,* arí, chay Israel runakunatan Diosqa wawankunata jina chaskikapurqan,+ paykunamanmi qhapaq atiyta qorqan, paykunawanmi rimanakurqan,+ paykunamanmi kamachikuy simitapas qorqan.+ Chaymantapas paykunan Diostaqa adorarqanku,+ paykunan promesankunatapas chaskirqanku.+ 5 Paykunan ñaupa taytakunaq mirayninpas kanku,+ paykunamantan Cristopas runa jina nacerqan.+ Wiñaypaq jatunchasqa kachun tukuy imata kamachiq Diosqa. Amén.
6 Kunanmi ichaqa Diosmanta t’aqasqa kashanku. Ichaqa manan chayraykuchu nisunman: “Diospa siminqa mana junt’akuqmi”, nispaqa. Manan Israelpi naceqkunallachu “Israel runakunaqa” kanku.+ 7 Manataqmi Abrahanmanta jamusqankuraykuchu llapanku paypa wawankuna kanku.+ Diospa simin qelqapas ninmi: “Mirayniykiqa Isaacmantan jamunqa”,+ nispa. 8 Chhaynaqa, manan Abrahanpa llapa wawankunachu Diospa wawankunaqa kanku,+ aswanpas Diospa promesanmanta jamuqkunan+ paypa mirayninqa kanku. 9 Diosmi khaynata prometerqan: “Watamanmi kay p’unchaykunata jina kutimusaq, chaypaqqa ñan esposayki Saraqa juj wawata onqokunqaña”,+ nispa. 10 Manan chay kutillachu Diosqa promesata ruwarqan, ñaupa taytanchis Isaacpaq mellizokunawan Rebeca onqoq kashaqtinpas promesataqa ruwarqanmi.+ 11 Diosqa ñan yachasqaña mayqentachus ajllanan karqan chayta, chayqa manan chay ajllasqanpa imachus ruwasqanman jinachu kanan karqan, aswanpas pitachus wajay munasqantan ajllanan karqan. Chaymi manaraq naceshaqtinku, manaraq allin kaqta ni mana allin kaqtapas ruwashaqtinku 12 Diosqa Rebecata nirqan: “Kuraq kaqmi sullk’a kaqpa kamachin kanqa”,+ nispa. 13 Qelqasqan kashanpas: “Jacobtan munakurqani, Esautan ichaqa cheqnikurqani”,+ nisqa.
14 Chhaynaqa, ¿imanisuntaq? ¿“Diosqa manan chaninchu” nisunchu? ¡Manapunin!+ 15 Paymi Moisesta nirqan: “Noqaqa pitachus khuyapayayta munani chaytan khuyapayasaq, pitachus llakipayayta munani chaytan llakipayasaq”,+ nispa. 16 Chhaynaqa, pipas ajllasqachus kanqa manachus chayqa, manan runaq munayninmantachu nitaq kallpachakusqanmantapaschu, aswanpas khuyapayakuq Diosmantan chayqa.+ 17 Diospa simin qelqaq nisqan jina, Diosmi faraonta* nirqan: “Atiyniyta rikuchinaypaq, lliu kay pachapi sutiy reqsisqa kananpaqwanmi jinallata kausachishayki”,+ nispa. 18 Chhaynaqa, pitachus munan chaytan Diosqa khuyapayan, sonqonku rumiyachiyta munaqkunatan ichaqa jinallata qhawan sonqonkuq rumiyananta.+
19 Yaqapaschá niwankichisman: “¿Imaraykutaq runakunatari juchachashallan? ¿Acaso pipas paypa munaynin contra sayayta atirqanchu?”, nispa. 20 Yau runa, ¿pitaq qanri kanki Diosman kutipakunaykipaq?+ ¿T’urumanta ruwasqa kaqqa ninmanchu ruwaqninta: “¿Imanaqtinmi khaynata ruwawanki?”,+ nispa? 21 ¿Manachu t’uruwan llank’aqqa atiyniyoq kashan t’uruwan ima munasqantapas ruwananpaq? ¿Manachu munaspaqa kaq t’urullawan ruwanman+ juj munay p’uyñuta juj común p’uyñutapas? 22 Chhaynallataqmi Dioswanpas; payqa munanña millay runakunaman sinchi phiñakuyninta atiynintawan rikuchiyta chaypas, anchatan pacienciakun ñut’unapaq jina phiñachiqnin runakunapaq. 23 Chaytaqa ruwan khuyapayanapaq jina runakunaman ancha qhapaq atiyninta rikuchinanpaqmi,+ paykunan chaskinqaku ñaupaqmantaña preparasqan premiota. 24 Chay runakunaqa noqanchismi kanchis, payqa manan judiokunallatachu wajawanchis, aswanpas waj nacionkunamanta runakunatawanmi.+ Chhaynatataq pay ruwayta munan chayqa, ¿pitaq imaninmanpas? 25 Chayraykun Oseas libropipas nirqan: “Mana llaqtaymanta kaqkunatan, qankunaqa llaqtaymi kankichis nisaq,+ mana munasqay warmitan munasqaymi nisaq;+ 26 maypichus qankunaqa manan llaqtaychu kankichis nispa nisqaypin, kausaq Diospa wawankuna nisqa kankichis”,+ nispa.
27 Profeta Isaiaspas Israel runakunamantaqa nirqanmi: “Lamar-qocha patapi aqo jinaña Israelpa wawankuna kanku chaypas, puchuqkunallan salvasqaqa kanqaku.+ 28 Jehová* Diosqa jujpaqkaman usqhaylla kay pachapi kaqkunamanta cuentata mañanqa”,+ nispa. 29 Profeta Isaiasqa nillarqantaqmi: “Manachus ejercitokunata kamachiq Jehová* Dios* mirayninchista puchuchinman karqan chayqa, Sodoma llaqtaman jinan tukusunman karqan, Gomorra llaqta jinan kapusunman karqan”,+ nispa.
30 Chhaynaqa, kayta yachaychis: Waj nacionkunamanta runakuna manaña chanin ñanta maskharqankuchu chaypas,+ iñisqankuraykun paykunaqa chaninpaq jap’isqa kanku.+ 31 Israel runakunan ichaqa, kamachikuy simiq nisqanman jinaña chanin kayta maskharqanku chaypas, mana atirqankuchu chay kamachikuy simi junt’ayta. 32 ¿Imaraykutaq manari atirqankuchu? Paykunaqa manan iñiywanchu chanin kayta maskharqanku, aswanpas imapas ruwasqallankuwan chanin kanankupaqmi piensarqanku. Chaymi paykunaqa “urmachiq rumi” jawa urmarqanku;+ 33 Diospa simin qelqapas ninmi: “¡Uyariychis! Sionpin churasaq urmachiq rumita,+ jark’aq* qaqatawan; pipas chaypi iñiqqa manan p’enqaypichu tarikunqa”,+ nispa.