Deuteronomio
24 ”Pipas juj warmiwan casarakunman manañataq paywan tiyayta munanmanchu imatapas p’enqayta ruwasqanrayku chayqa, t’aqanakuy papeltan ruwanqa,+ chayta qospan qhariqa chay warmita wasinmanta kachapunqa.+ 2 Chay runaq wasinmanta ripuspaqa atinmanmi chay warmiqa juj qhariwan casarakuyta.+ 3 Chay casarakusqan qharichus payta cheqnikuspa t’aqanakuy papelta ruwanqa, chayta qospachus wasinmanta kachapunqa chayqa, otaq chay qharichus wañupunqa chayqa, 4 manan ñaupaq kaq qosanqa paywan casarakuyta atinqachu, qhellichasqataq chay warmi kashan chayqa, manan yapamanta payta warmichakuyta atinqachu, Jehová Diosqa cheqnikunmi chay ruwaytaqa. Aman Jehová Diosniykichispa herencia qonasuykichis jallp’apiqa chay juchataqa ruwankichischu.
5 ”Pipas chayraq casarasqa kashan chayqa, aman ejercitoman jaykunqachu, aman ima ruwanatapas chaskinqachu. Aswanmi payqa juj wata chaykunamanta libre kanqa, chhaynapi esposan kusisqa kananpaq.+
6 ”Pipas imataña runamasinman manunqa chaypas aman runamasinpa kutanantaqa, ni kutananpa jawa rumintapas prendapi apanqachu,+ chaytachus apanman chayqa, runamasinpa kausaynintapas qechushanman jinan kanman.
7 ”Pipas llaqtamasin Israel runata suwaspa apanman, jinaspa sufrichinman, vendenmanpas chayqa,+ wañuchisqan kanqa chayta ruwaq runaqa.+ Chhaynatan qankuna ukhumanta chinkachinkichis mana allin kaqta.+
8 ”Lepra* onqoy rijurinqa chayqa, Leví sacerdotekunaq imachus nisqanman jinan llapa imatapas ruwankichis,+ paykunaman imachus kamachisqayman jinapunin ruwankichis. 9 Yuyariychis Egiptomanta jamushaqtiykichis imatachus Jehová Diosniykichis Miriamwan ruwarqan chayta.+
10 ”Runamasiykiman imatapas manunki chayqa,+ aman wasintaqa jaykunkichu imatachus prendapi qonasuyki karqan chayta orqomuqqa. 11 Aswanmi jawallapi qhepakunki chay manukuq runa imatachus prendapi qonasuyki karqan chayta orqomunankama. 12 Chay runachus wajcha kanman chayqa, aman prendapi qosqasuykitaqa qhepantin p’unchaykamaqa jap’ikunkichu.+ 13 Aswanmi chay qosqasuykitaqa inti jaykuqtin jina kutichipunki, chhaynapi chay qosqasuyki qatananwan puñunanpaq.+ Chayta ruwanki chayqa, qanpaqmi Diosmanta mañapusunki, Jehová Diosniykipas chaninpaqmi chay ruwasqaykita qhawarinqa.
14 ”Aman llank’apakuq wajcha runataqa engañankichu. Chay runa llaqtamasiykiña kanman chaypas llaqtayki ukhupi* tiyaq waj llaqtayoq runaña kanman chaypas aman chaytaqa ruwankichu.+ 15 Sapa p’unchaymi llank’apakuq runamanqa pagapunki,+ manaraq inti jaykupushaqtinmi pagapunki. Payqa wajchataq chayqa llank’apakuspa ganasqallanwanmi kausan. Manachus sapa p’unchay pagapunki chayqa, Jehová Diostan wajakunqa jinan qanqa juchachasqa kanki.+
16 ”Taytakunaqa manan wawankuq juchanmantaqa wañunqakuchu, manataqmi wawakunapas taytankuq juchanmantaqa wañunqakuchu.+ Sapankan paykuna kikinkuq juchankumanta wañunqaku.+
17 ”Aman mana chanintaqa juzgankichischu qankuna ukhupi tiyaq waj llaqtayoqtapas mana taytayoqtapas.+ Aman viuda warmiq mantonnintaqa prendapi apankichischu.+ 18 Aman qonqankichischu Egiptopi esclavo kasqaykichista, chaymanta Jehová Diosniykichisqa libramusqasuykichistapas.+ Chayraykun kaykunataqa kamachishaykichis.
19 ”Chajraykichista rutuspa juj marq’ay trigota qonqamunkichis chayqa, aman kutinkichischu chayta apamuqqa, aswanmi chayqa kanqa qankuna ukhupi tiyaq waj llaqtayoqpaq, mana taytayoqpaq, viuda warmipaq ima.+ Chhaynapin Jehová Diosniykichisqa llapa ima ruwasqaykichisman bendicionninta churamunqa.+
20 ”Aceituna sach’aykichista chhafchispaykichisqa, aman iskay kutitachu chhafchinkichis. Chaypi puchuqqa jinallan qhepanqa qankuna ukhupi tiyaq waj llaqtayoq runapaq, mana taytayoqpaq, viuda warmipaq ima.+
21 ”Uvasniykichista pallaspaqa aman kutinkichischu puchuqta pallamuqqa, jinallan chayqa qhepanqa qankuna ukhupi tiyaq waj llaqtayoq runapaq, mana taytayoqpaq, viuda warmipaq ima. 22 Aman qonqankichischu Egipto jallp’api esclavo kasqaykichista. Chayraykun kaykunataqa kamachishaykichis.