Jueces
11 Galaad ladomanta Jefteqa+ allin kallpasapa maqanakuqmi karqan. Payqa ramera warmiq wawanmi karqan, taytanpa sutintaq karqan Galaad. 2 Galaadpaqa esposanpipas wawankunaqa kallarqantaqmi, chay wawankunan wiñaruspanku Jefteta qarqorqanku: “Qanqa juj warmiq wawanmi kanki, manan taytanchismantaqa ima herenciatapas chaskiwaqchu”, nispa. 3 Jinan Jefteqa wayqenkunamanta ayqekuspa Tof ladoman ripurqan, chaypitaq tiyarqan. Paywan kuskan rillarqankutaq mana llank’anayoq runakunapas.
4 Tiempowanmi Anmón runakunaqa Israel runakunawan guerraman jaykurqanku.+ 5 Anmón runakuna Israel runakunawan maqanakuqtinmi, Galaad jallp’amanta umalliqkunaqa* Tof ladota rirqanku Jefteta kutichimuq. 6 Chaypin Jefteta nirqanku: “Jaku, Anmón runakunawan maqanakuypi umalliwayku”, nispa. 7 Jinan Jefteqa Galaadpi umalliqkunata nirqan: “Qankunamá riki cheqnikuwaspaykichis taytaypa wasinmanta qarqomushawankichis,+ kunantaqchu llakipi tarikuspaykichis maskhamushawankichis”, nispa. 8 Galaadpi umalliqkunataq nirqanku: “Cheqaqtan nishanki, chayraykun maskhamushaykikupas. Sichus jamuspa Anmón runakunawan maqanakuypi yanapawankiku chayqa, Galaad jallp’api llapa runakunaq umallinmi kapunki”,+ nispa. 9 Jinan Jefteqa paykunata nirqan: “Sichus Anmón runakunawan maqanakunaypaq kutichiwankichis, Jehová Diostaqchus atipanaypaq yanapawanqa chayqa, qankunaq umalliykichismi kapusaq”, nispa. 10 Galaadpi umalliqkunataq Jefteta nirqanku: “Jehová Dios kay rimasqanchismanta testigo kachun, manachus chayman jina ruwasaqku chayqa pay juzgawachunku”, nispa. 11 Jinan Jefteqa Galaadpi umalliqkunawan kuska rirqan, runakunataq payta nombrarqanku comandantenku umallinku ima kananpaq. Mizpá llaqtapitaq+ Jefteqa Galaadpi umalliqkunaman rimasqanta Jehová Diospa ñaupanpi rimallarqantaq.
12 Chaymantataq Jefteqa Anmón+ llaqta reyman willachimurqan: “¿Imanarqaykin noqa, llaqtaywan maqanakuq jamunaykipaq?”, nispa. 13 Anmón llaqta reytaq Jeftepa kachasqan runakunata nimurqan: “Noqaykuq jallp’aykuqa Arnón+ mayumanta Jaboc mayukaman karqan, kinraymantaq Jordán+ mayukama karqan. Chaytan Israel runakunaqa Egiptomanta jamushaspa+ qechuwarqanku. Kunanqa chay jallp’aykuta ama imanispalla kutichipuwayku”, nispa. 14 Jinan Jefteqa jujmanta Anmón reyman runakunata kachallarqantaq, 15 paykunan nirqanku:
“Khaynatan Jefté nin: Israel runakunaqa manan Moab runakunaq+ jallp’antapas ni Anmón runakunaq+ jallp’antapas qechurqankuchu. 16 Israel runakuna Egiptomanta lloqsimushaspaqa ch’inneq ladollantan purimurqanku Puka lamar-qochaman chayamunankukama,+ chaymantataq Cadesman chayarqanku.+ 17 Cadesmantan Israel runakunaqa Edom reyman runakunata kacharqanku:+ Ama jinachu kay jallp’aykiq chaupinta pasarusaqku, nispa nimunankupaq. Edom reymi ichaqa mana munarqanchu. Moab+ reymanpas kachallarqankutaqmi, paypas manan munallarqantaqchu. Chaymi Israel runakunaqa Cadesllapiraq qhepakurqanku.+ 18 Ch’inneqninta purishaspankuqa Edom jallp’aq+ Moab jallp’aq cantollantan Israel runakunaqa pasamurqanku, Moab llaqtaq inti lloqsimuy ladollanta. Chaymantataq Moab llaqtaq linderon*+ Arnón wayq’o cercapi karpakurqanku, manan Moab jallp’amanqa jaykurqankupaschu.+
19 ”Chaymantan Israel runakunaqa willaqkunata kacharqanku Esbón llaqtapi amorreo runakunata kamachiq rey Sehonta: Ama jinachu kay, maychus rinaykuman chayanaykupaq jallp’aykiq chaupinta pasarukusaqku,+ nispa valekamunankupaq. 20 Sehonmi ichaqa Israel runakunapi mana confiaspa mana munarqanchu jallp’ankuq chaupinta pasanankuta. Aswanmi runankunata juñuspa Jáz llaqtapi karpakurqanku jinaspa Israel runakunawan maqanakurqanku.+ 21 Chayta rikuspan Israel runakunaq Diosnin Jehová Diosqa Sehonta llapa llaqtantinta Israel runakunaq makinman entregarqan. Jinan Israel runakunaqa amorreo runakunata atipaspanku llapa jallp’ankuta jap’ikapurqanku.+ 22 Chhaynapin Israel runakunaqa amorreo runakunaq jallp’anta jap’ikapurqanku Arnón mayumanta Jaboc mayukama, juj ladonmantaq ch’inneqmanta Jordán mayukama.+
23 ”Israel runakunaq Diosnin Jehová Diosmi amorreo runakunata qarqospa llaqtanman chay jallp’ata qopurqan,+ ¿chaychu qan munashanki Israel runakunata qarqoyta? 24 Qanpas Kemós*+ diosniykiq imapas qosqantaqa jap’ikapunkin ¿riki? Chhaynatan noqaykupas Jehová Diosniykuq qowasqanku jallp’ataqa mana kacharikuspa jap’ikapusaqku.+ 25 Icha, ¿Ziporpa churin Moab rey Balacmanta+ aswan allinpaqchu qhawarikunki? Payqa manan jayk’aqpas Israel runakunawanqa churanakurqanchu ni maqanakurqanpaschu. 26 Chaymantapas Israel runakunaqa ñamá kinsa pachaj wataña Esbón llaqtapi muyuriqninpi kaq llaqtakunapi,+ Aroer llaqtapi muyuriqninpi kaq llaqtakunapi, Arnón mayu patakunapi kaq llaqtakunapipas tiyashanku. ¿Imaraykutaq mana chay tiempokunapichu kaykunata chaskikapurqankichis?+ 27 Noqaqa manan imanashaykipaschu, qanmi aswanpas llaqtayman jamuspa mana allinta ruwashanki. Jatun juez Jehová+ kunan p’unchay juzgachun Israel runakunata Anmón runakunatawan, nispa”.
28 Anmón runakunaq reyninmi ichaqa Jeftepa willachisqanta mana kasurqanchu.
29 Jehová Diospa espiritunmi Jefteman junt’aykurqan,+ jinan payqa Galaadninta Manasés jallp’anta pasarqan, jinaspa Galaadpi Mizpá* llaqtaman chayarqan.+ Chaymantapachan Anmón runakunawan maqanakuq rirqan.
30 Chaypin Jefteqa Jehová Diosman juj promesata ruwarqan:+ “Anmón runakunata atipanaypaqchus yanapawanki, 31 chay guerramantataqchus thajpi wasiyman kutimpusaq chayqa, pichus waysiymanta noqata chaskiq ñaupaqta lloqsimuqtan qan Jehová Diosman ruphachina ofrendata jina qopusayki”,+ nispa.
32 Chaymantataq Jefteqa Anmón runakunawan maqanakuq rirqan, Jehová Diosqa llapankutan paypa makinman entregarqan. 33 Jefteqa askhatan runakunata wañuchirqan. Aroer llaqtamanta Minij llaqtakaman iskay chunka llaqtakunata jap’ikapurqan. Chaymantapas Abel-Keraminkaman chayarqan. Chhaynapin Israel runakunaqa Anmón runakunata atiparqanku.
34 Mizpá llaqtapi+ wasinman Jefté kutimpushaqtinmi ususin payta chaskiq lloqsimurqan tamborta tocaspa tususpa ima. Payqa Jeftepa sapallan ususinmi karqan, manan karqanchu qhari wawanpas ni juj warmi wawanpas. 35 Payta rikuspan Jefteqa p’achanta llik’ikurqan, jinaspa nirqan: “¡Ay ususilláy ususi! ¿Imatataq kaytari ruwaruwanki? Sonqoymi sinchitapuni nanarushan. Jehová Diosmanmi prometerqani, manañan imatapas ruwayta atiymanñachu,+ ¡Ay wawalláy, karumanmi kacharpariyki!”, nispa.
36 Ususintaq nirqan: “Papáy, ñataq Jehová Diosman prometerqankiña chayqa, prometesqaykiman jina noqawan ruway.+ Jehová Diosmá riki Anmón runakunatapas makiykiman entregashasunki”, nispa. 37 Chaymantan payqa papanta nillarqantaq: “Papáy, manataq jayk’aqpas casarakusaqchu chayqa, ama jinachu kay, permisota qoykuway amigaykunawan iskay killantin orqon-orqonta waqaspa purimunaypaq”, nispa.
38 Papantaq nirqan: “Yá wawáy, rillay”, nispa; jinaspa iskaynin killantinta kacharqan. Jinan payqa manaña casarakunanta yachaspa amigankunawan kuska puririrqan orqon-orqonta waqaq. 39 Iskay killa qhepamantaq payqa wasinman kutimpurqan, jinan papanqa Diosman prometesqanta junt’arqan.+ Jeftepa ususinqa manan jayk’aqpas pi qhariwanpas puñurqanchu. Israel llaqtapitaq kay costumbre qallarirqan:* 40 Israel llaqtapi sipaskunan sapa watan riqku Jeftepa ususinta kallpachaq, paykunaqa watapi tawa p’unchaytan riqku.