1 Samuel

15 Samuelmi Saulta nirqan: “Jehová Diospa kamachisqanmi noqaqa ajllarqayki Israel llaqtanpi rey kanaykipaq,+ chayrayku uyariy Jehová Diospa kay nisqanta.+ 2 Ejercitokunata kamachiq Jehová Diosmi nin: Egiptomanta Israel runakuna jamushaqtinmi Amalec runakuna paykunawan maqanakuq jamurqan, chaymi chay Amalec runakunamanta cuentata mañasaq.+ 3 Chayrayku, phaway chay runakunawan maqanakuq riy.+ Llapantan chinkachinki+ runakunatapas kaqninkunatapas, aman jujtapas kausashaqtaqa saqenkichu.*+ Llapantapunin wañuchinki warmitapas, qharitapas, erqetapas, wawatapas, torotapas, ovejatapas, camellotapas, asnotapas,+ nispa”. 4 Jinan Saulqa askha runakunata juñurqan, paykunatan Telain ladopi yuparqan. Judá ayllumantan karqanku chunka waranqa soldadokuna, wakin ayllukunamantataq karqanku iskay pachaj waranqa soldadokuna.+

5 Chaymantataq Saulqa runakunantin Amalec runakunaq llaqtanman rirqan, chayman chayaspataq juj wayq’opi pakakurqanku Amalec runakunaman qonqaylla phawaykunankupaq. 6 Saulmi quenita runakunata+ nirqan: “Qankunaqa sumaqtan Israel runakunata qhawarirqankichis*+ Egipto llaqtamanta lloqsimushaqtinku, chayrayku ripuychis kaymanta, mana chayqa Amalec runakunawan kuskatan chinkachiykichisman”,+ nispa. Jinan quenita runakunaqa ripurqanku. 7 Chaymantataq Saulqa runakunantin phawaykuspa lliuta Amalec runakunata wañuchirqanku+ Havilamanta+ Shurkama,+ chayqa kashan Egipto qayllapin. 8 Saulqa llapa Amalec+ runakunatan espadawan wañuchirqan, reyninku Agagtan+ ichaqa presota jap’irqan. 9 Saulwan runankunapiwanqa manan wañuchirqankuchu Agag reyta, jinallataq allinnin ovejakunata, wakakunata, wira animalkunata, orqo ovejakunatapas. Paykunaqa lliu valorniyoq kaqkunatapas jinallatan jap’irqanku,+ manan chinkachiyta munarqankuchu. Mana munasqanku, mana serviq kaqkunatan ichaqa lliuta chinkachipurqanku.

10 Jehová Diosmi Samuelta nirqan: 11 “Maytan pesapakuni* Saulta reyta ajllasqaymanta, payqa manan uyariwanchu, manan kasukuwanchu”,+ nispa. Chaymi Samuelqa sinchi llakisqa tutantin Jehová Diosta rogakurqan.+ 12 Tutamantantaq Samuelqa illarimuyta rirqan Saulwan tupaq, ichaqa manan tarirqanchu, aswanmi nirqanku: “Saulqa Carmelo+ llaqtata rispan payta yuyarinankupaq juj columnata ruwarakamun,+ chaymantataq Guilgal llaqtata pasaykun”, nispa. 13 Chaymantataq Samuelqa Saulpa kasqanman chayarqan, chaypin Saulqa nirqan: “Jehová Diospa bendecisqan kay. Jehová Diospa kamachisqantaqa llapantan ruwamuni”, nispa. 14 Samueltaq nirqan. “Chhaynaqa, ¿ima wakakunaq ovejakunaq waqasqantataq uyarishaniri?”,+ nispa. 15 Chaymi Saulqa nirqan: “Chaykunaqa Amalec runakunaq uywankunan. Jehová Diosniykipaq sacrificiota jaywanapaqmi runaykuna allinnin ovejakunata allinnin wakakunata mana wañuchimunkuchu. Wakintan ichaqa lliuta chinkachimpuyku”, nispa. 16 Samueltaq nirqan: “¡Upallay! Kay tuta imatachus Jehová Dios niwasqanta willasayki”,+ nispa. Jinan Saulqa nirqan: “Willaway”, nispa.

17 Jinan Samuelqa nirqan: “Qan Israel llaqtapi umalli kanaykipaq ajllasqa kashaqtiykiqa,+ Jehová Dios rey kanaykipaq churashasuqtiykiqa, mana valeqpaq jinan qhawarikurqanki+ ¿riki? 18 Chay qhepamantaq Jehová Diosqa kamachirqasunki: Phaway chay juchasapa Amalec runakunata wañuchimuy.+ Llapantan paykunataqa chinkachimunki,+ nispa. 19 Qantaq ichaqa Jehová Diospa siminta kasukunaykimantaqa uywankunata cosasninkunata ima aparikamurqanki.+ Chayqa manan allinchu Jehová Diospaqqa”, nispa.

20 Saulmi ichaqa Samuelta nirqan: “¡Kasukushanimá riki Jehová Diostaqa! Jehová Diospa kamachiwasqanman jinan llapa Amalec runakunata wañuchimuni, chaymi Agag reytapas presota apamushani.+ 21 Runakunan llapa chinkachinapaq kaqkunamanta allinnin ovejakunata allinnin wakakunataqa aparikamunku, Guilgal llaqtapi Jehová Diosniykiman sacrificiota jaywanapaq”,+ nispa.

22 Samueltaq Saulta nirqan: “¿Imataq Jehová Diospaqri aswan allin, animalkunata sacrificiopi jaywaychu+ icha kasukuychu? Jehová Diospaqqa kasukuymi aswan allin sacrificiokunata jaywaymantaqa.+ Kasukuymi aswan allin orqo ovejakunaq wiranta+ jaywaymantaqa. 23 Mana kasukuq kayqa+ watuy jinan jatun jucha,+ jatunchakuspa ruwayqa idolokuna* yupaychay jinan, layqa ruway jinan. Imaynan qanpas Jehová Diospa siminta mana kasukuyta munarqankichu,+ chhaynatan paypas manaña munanchu rey kanaykita”,+ nispa.

24 Chaymi Saulqa nirqan: “Juchallikunin. Runakunata manchakuspan, siminkuta kasukuspan Jehová Diostapas qantapas mana kasukurqaykichischu. 25 Juchaytayá perdonaykuway, amayá saqewankichu, noqawan jamuy Jehová Diosman qonqorikunaypaq”,+ nispa. 26 Samueltaq ichaqa nirqan: “Manan qanwanqa risaqchu. ¿Imaraykun qan mana kasukurqankichu Jehová Diospa siminta? Jehová Diosqa manañan munanchu Israel llaqtapi rey kanaykita”,+ nispa. 27 Samuel ripunanpaq kutiriqtintaq Saulqa jawa p’achanpa cantonmanta jap’irqan, jinan chay p’achaqa llik’irparikurqan. 28 Chaymi Samuelqa nirqan: “Kay p’achayta llik’irusqaykita jinan qantapas pasasunki. Jehová Diosmi Israel llaqtapi rey kanaykimanta wijch’upusunki, qanmanta aswan allin runata ajllaspataq reyta churanqa.+ 29 Israelpa ancha jatun Diosninqa+ tukuy rimasqantan junt’an,+ imachus nisqantaqa manan cambianchu. Payqa manan runakuna jinachu ima nisqantapas cambian”,+ nispa.

30 Chayta niqtinmi Saulqa nirqan: “Cheqaqtan nishanki, juchallikunin. Ichaqa Israelpi llapa umalliqkunaq* ñaupanpi, llapa Israel runakunaq ñaupanpi allin rikusqa kanaypaq kutimuy; jaku riysiway Jehová Diospa ñaupanpi qonqorikamunaypaq”,+ nispa. 31 Jinan Samuelqa Saulpa qhepanta kutimurqan, Saultaq Jehová Diospa ñaupanpi qonqorikurqan. 32 Chaymantataq Samuelqa nirqan: “Amalec runakunaq reynin Agagta apamuwaychis”, nispa. Jinan Agagqa phiñasqallaña* Samuelman qayllaykurqan, payqa “manañachá wañuchiwanqakuchu” nispan nisharqan. 33 Samuelmi ichaqa Agagta nirqan: “Imaynan espadayki askha warmikunata mana wawayoqta saqerqan, chhaynatan mamaykipas chay warmikuna ukhupi mana wawayoq qhepanqa”, nispa. Chayta nispan Samuelqa Guilgal llaqtapi Jehová Diospa ñaupanpi Agagta espadawan wañuchirqan.+

34 Chaykuna qhepatan Samuelqa Ramá llaqtaman ripurqan, Saultaq Guibeá llaqtapi wasinman ripurqan. 35 Samuelqa wañupunankaman manaña Saulwan tupapurqanñachu, payqa Saulmantan sinchi llakisqa kasharqan.+ Jehová Diospas maytan pesapakurqan Israel llaqtapi Saulta rey kananpaq churasqanmanta.+