2 Samuel
23 Khaynata nispan Davidqa rimayta tukurqan:+
Runakunata gobiernaqchus Diosta manchakuspa+
chaninta kamachin+ chayqa,
4 tutamantanpi intiq k’anchaynin jinan,+
mana phuyuyuq illarimuy jinan.
Para pasaruqtin k’anchay jinan,
chay paran plantakunatapas wiñachimun,+ nispa.
5 Chhaynan familiaypas Diospa ñaupanpiqa.
Paymi juj promesata wiñaypaq prometewarqan,+
allinta rimaspa mana jayk’aq p’akikuqta.
Chay promesaraykun salvasqa kasaq kusikuytapas tarisaq,
chaymi payqa familiaytapas t’ikarichishan.+
6 Mana valeq runakunan ichaqa kiska jina wijch’usqa kanku,+
manan pipas makillawanqa jap’iyta atinmanchu.
7 Pipas llamiykuq munaqqa,
fierro herramientata lanzata iman apakunan.
Chay kiskakunaqa maypichus kasqanpin lliu kanasqa kanan”, nispa.
8 Davidpa kallpasapa allin maqanakuq runankunan kaykuna karqan:+ Josef-Basébej sutiyoq Acmoní runa, paymi kinsantin allin maqanakuq runakunamanta jujnin karqan, paytaqmi umallinku karqan.+ Juj kutinmi Josef-Basebejqa pusaq pachaj runakunata lanzanwan wañuchirqan. 9 Iskay kaq allin maqanakuqtaq karqan Dodopa+ churin Eleazar.+ Dodoqa Aojipa churinmi karqan. Juj kutinmi Davidwan kuska kinsa allin maqanakuqkuna Filistea runakunata pisichasharqanku, paykunamanta jujninmi karqan Eleazar. Filistea runakuna maqanakuq jamuqtinmi Israel runakunaqa kutirimpurqanku. 10 Eleazarmi ichaqa kaqllapi qhepakuspa makin sayk’unankamaraq Filistea runakunata wañuchirqan, makinña sayk’usqa kasharqan chaypas payqa espadanta mana kacharispan maqanakushallarqan.+ Soldadokunataq paypa qhepanta rispa wañuchisqan runakunamanta valorniyoq cosaskunata qechumurqanku. Chay p’unchaymi Jehová Diosqa Israel runakunata salvarqan.*+
11 Kinsa kaq allin maqanakuqtaq karqan Samá, payqa Agué sutiyoq ararita runaq churinmi karqan. Juj kutinmi Filistea runakunaqa Leipi juñukurqanku lentejas t’akasqa chajra pampapi. Chay kutipin Israel soldadokunaqa Filistea runakunamanta ayqekurqanku. 12 Samami ichaqa mana ayqekurqanchu aswanpas Filistea runakunawanmi chay chajra chaupipi maqanakurqan, jinaspa paykunata wañuchirqan. Chhaynapin Jehová Diosqa chay p’unchaypi Israel runakunata salvarqan.*+
13 Kinsa chunka umallikunamantan kinsa umallikuna Adulan+ qaqa t’oqoman Davidwan tupaq rirqanku, chay tiempoqa cosecha tiempon karqan. Filistea runakunamanta juj t’aqa soldadokunataq Refaín wayq’opi karpakusharqanku.+ 14 Davidqa pakakunallanpin kasharqan,+ wakin Filistea soldadokunataq Belén llaqtapi kasharqanku. 15 Jinan Davidqa khaynata nirqan: “¡Maytan munayman Belén llaqta punkupi kaq pozomanta unu ujayta!”, nispa. 16 Chayta David niqtinmi kinsantin allin maqanakuq soldadonkunaqa Filistea runakunawan maqanakuspa chay runakunaq karpakusqanman jaykurqanku, jinaspa Belén llaqta punkupi kaq pozomanta unuta apamurqanku, chaytataq Davidman aparqanku. Davidmi ichaqa mana ujayta munarqanchu, jinan Jehová Diospaq pampaman jich’apurqan.+ 17 Jinaspan nirqan: “Jehová Diosníy, manapunin chay unutaqa jayk’aqpas ujaymanchu. Kay runakunaqa kausayninkuta* peligroman churasparaqmi kay unutaqa apamuwarqanku. Kay unuqa paykunaq yawarnin jinan,+ manan ujaymanchu”, nispa. Jinan Davidqa chay unuta mana ujarqanchu. Chaykunatan Davidpa kinsantin allin maqanakuq soldadonkunaqa ruwarqanku.
18 Chaymantapas kinsa maqanakuqkunan kallarqantaq, paykunamanta jujninmi karqan Zeruyapa+ churin, Joabpa wayqen Abisái,+ paytaqmi karqan umallinku. Paymi kinsa pachaj runakunata lanzanwan wañuchirqan, payqa allin reqsisqan karqan ñaupaq kaq kinsa kallpasapa allin maqanakuq runakuna jina.+ 19 Chay kinsa maqanakuq runakunamantaqa Abisaimi aswan allin maqanakuq karqan, paytaqmi paykunaq umallinpas karqan. Ichaqa manan igualaqchu ñaupaq kaq kinsa kallpasapa allin maqanakuq runakunamanqa.
20 Jehoiadapa churin Benayapas+ mana manchakuq runan karqan,* paymi Cafzel+ llaqtapi admiranapaq ruwaykunata ruwarqan. Paymi Moab llaqtayoq Arielpa iskaynin churinkunata wañuchirqan. Jinaspapas juj p’unchaymi rit’ishaqtin juj pozoman jaykuruspa juj leonta wañuchirqan.+ 21 Chaymantapas Benayaqa Egipto llaqtayoq jatunkaray runatan wañuchillarqantaq. Chay runaqa juj lanzayoqmi kasharqan, Benayan ichaqa juj k’aspillayoq kasharqan. Chaywanpas Benayaqa chay runaq lanzantan qechururqan, jinaspa chay lanzawan wañuchipurqan. 22 Chaykunatan Jehoiadapa churin Benayaqa ruwarqan. Payqa allin reqsisqan karqan ñaupaq kaq kinsa kallpasapa allin maqanakuq runakuna jina. 23 Benayaqa kinsa chunka maqanakuqkunamanta aswan allin maqanakuqña karqan chaypas, manan igualarqanchu kinsa kallpasapa allin maqanakuqkunamanqa. Chhaynaña kaqtinpas Davidqa payta cuidaq guardiakunaq umallintan Benayataqa churarqan.
24 Joabpa wayqen Asaelqa+ kinsa chunka maqanakuqkunamanta jujninmi karqan. Paykunawanmi kasharqan Belén llaqtayoq Dodopa churin Elanán,+ 25 Aroj runa Samá, Aroj runa Elicá, 26 Bej-Pélej* runa Élez,+ Tecoa llaqtayoq Iquespa churin Irá,+ 27 Anatoj llaqtayoq+ Abí-Ézer,+ Jusá runa Mebunái, 28 Aojí runa Zalmón, Netofá llaqtayoq Marái,+ 29 Netofá llaqtayoq Banapa churin Hélef, Benjamín ayllupi kaq Guibeá llaqtamanta Ribaipa churin Ittái, 30 Piratón llaqtayoq Benaya,+ Gas+ wayq’okunamanta Idái, 31 Bej-Arabá llaqtayoq Abí-Albón, Baurin llaqtayoq Azmávej, 32 Salbin llaqtayoq Eliabá, Jasenpa churinkuna, Jonatán, 33 ararita runa Samá, ararita runa Sararpa churin Ajiam, 34 Macaj runaq wawan Ajasbaipa churin Elifélej, Guiló llaqtayoq Ahitofelpa+ churin Elian, 35 Carmelo llaqtayoq Ezró, Arab llaqtayoq Parái, 36 Zobá llaqtayoq Natanpa churin Igal, Gad runa Baní, 37 Anmón runa Zélec, Beroj llaqtayoq Najarái, paymi karqan Zeruyapa churin Joabpa arma apaysiqnin; 38 Jéter runa Irá, Jéter runa Garef,+ 39 Het runa Uriaspiwan.+ Llapanpiqa kinsa chunka qanchisniyoq runakunan karqanku.