Éxodo

5 Chaymantataq Moiseswan Aaronwanqa faraonpa* ñaupanman jaykurqanku, jinaspa nirqanku: “Israelpa Diosnin Jehová Diosmi nin: Llaqtayta kacharipuy chhaynapi ch’in ladopi fiestata ruwapuwananpaq, nispa”. 2 Faraontaq ichaqa nirqan: “¿Pitaq Jehovari+ siminta kasunaypaq, Israel runakunata kacharinaypaqpas?+ Manan reqsinichu Jehovataqa, manataqmi Israel runakunataqa kacharisaqchu”,+ nispa. 3 Paykunataq nirqanku: “Hebreo runakunaq Diosninmi noqaykuwan rimamun. Chaymi valekuykiku ch’inneqta kinsa p’unchay puriyta rinaykupaq, chaypi Jehová Diosniykuman sacrificiokunata jaywamunaykupaq.+ Mana chayqa onqoywanmi castigawankuman, espadawan iman wañuchiwankuman”, nispa. 4 Egipto reymi ichaqa nirqan: “Yau Moisés, yau Aarón, ¿imaraykun runakunaq llank’ananta sayachiyta munashankichis? ¡Pasaychis llank’amuychis!”,+ nispa. 5 Faraonqa nillarqantaqmi: “Llank’aqkunaqa askhan kanku. ¡Manan llank’anankutaqa sayachiwaqchischu!”, nispa.

6 Chay p’unchaypachan faraonqa capatazkunata, paykunaq churasqanku llank’achiq runakunatawan kamachirqan: 7 “Kunanmantaqa amañan chay runakunaman ichhuta qonkichischu adobeta ruwanankupaq.+ ¡Paykuna kikinku ichhuta maskhakamuchunku! 8 Adobetan ichaqa jayk’atachus ruwashanku chhaynallata ruwanqaku, aman pisiyachinkichischu. Qella runakunaqa qella kaypin nishanku: ¡Ripuytan munashayku! ¡Diosniykuman sacrificiokuna jaywaq riytan munashayku!, nispanku. 9 Astawan llank’achiychis, chhaynapi ama yanqa rimaykunata uyarishanankupaq”, nispa.

10 Jinan chay capatazkunaqa+ llank’achiq runakunapiwan Israel runakunata nimurqanku: “Faraonmi nin: Manañan ichhutaqa qosaykichischu. 11 Qankuna maymantapas maskhakamuychis. Adobekunatan ichaqa jayk’atachus ruwasharqankichis chhaynallata ruwankichis, nispa”. 12 Chaymi Israel runakunaqa Egipto llaqtantinta purirqanku rastrojota* maskhaspa, chayta ichhuq rantinpi churanankupaq. 13 Capatazkunataq paykunata qatiqku: “Jayk’a adobetachus ichhuta qoshaqtiyku ruwarqankichis chhaynallatan sapa p’unchaypas ruwankichis”, nispa. 14 Capatazkunaqa llank’achiq Israel runakunatawanmi soq’arqanku, chay runakunatan paykunaqa churarqanku Israel runakunata llank’achinankupaq.+ Nirqankun: “¿Imanaqtinmi qayna-unchaypas kunan p’unchaypas mana ñaupaqpi jinachu adobekunata ruwachirqankichis?”, nispa.

15 Chaymi chay llank’achiq Israel runakunaqa faraonman quejakuq rirqanku: “¿Imanaqtinmi kamachiykikunata khaynata ruwawankiku? 16 Manan kamachiykikunaman ichhuta qowankuchu, ¡adobeta ruwaychis! nishawankutaq, soq’ashawankutaq. Runaykikunan juchayoq kanku”, nispanku. 17 Faraonmi ichaqa paykunata nirqan: “¡Qella runakuna! Qella kaypin+ qankunaqa: Ripuytan munashayku, Jehovamanmi sacrificiota jaywamuyta munashayku, nishankichis.+ 18 ¡Pasaychis llank’amuychis! Manan ichhutaqa pipas qosunkichischu. Ichaqa jayk’atachus adobekunata ruwaq kankichis chhaynallatapunin adobetaqa ruwankichis”, nispa.

19 Chhaynapin llank’achiq Israel runakunaqa llakipi tarikurqanku. “Jayk’a adobetachus sapa p’unchay ruwaq kankichis chhaynallatapunin ruwankichis” nispa nisqanwanmi llakikurqanku. 20 Chaymantataq paykunaqa Moiseswan Aaronpiwan juñukurqanku. Moiseswan Aaronwanqa jawapiñan kasharqanku chay runakuna faraonpa ñaupanmanta lloqsimunankuta suyaspa. 21 Chay runakunan lloqsimuspa jina Moisesta Arontawan nirqanku: “Jehová Dios rikuchun imachus ruwasqaykichista, jinaspa juzgachun. Qankunaq causaykichispin faraonpas kamachinkunapas cheqnikuwanku. Qankunaqa espadatapas paykunaq makinkuman churashawaqchis jinatan ruwashankichis”,+ nispa. 22 Chayta uyarispan Moisesqa Jehová Diosta nirqan: “Jehová Diosníy, ¿imaraykun khaynata llaqtaykita sufrichinki? ¿Imapaqmi kachamuwarqanki? 23 Faraonta sutiykipi rimapayasqaymantapachan+ payqa kay llaqtata astawanraq sufrichishan,+ qantaq kay llaqtaykita mana kacharichinkichu”,+ nispa.