Lucas

1 Askha runakunan cheqaqpaq jap’isqanchis willakuykunata juñuspa chaykunamanta qelqarqanku,+ 2 imaynan qallariymantapacha ñawinkuwan rikuq runakunapas+ Diospa siminta willaqkunapas+ willawarqanchis chayman jina. 3 Chaymi noqapas, ancha respetasqa Teófilo,+ qallariymantapacha tukuy imachus pasasqanta allin-allinta tapukachakurqani t’aqwirqani ima, jinaspa yuyaykurqani tukuy imapas imaynachus pasasqanman jina qelqamunaypaq, 4 chhaynapi imakunatachus simillawan yachachirqasunkiku chaykunaqa cheqaqpuni kasqanta allinta yachanaykipaq.+

5 Judeapi rey Herodespa*+ kamachikusqan tiempopin Abías t’aqamanta+ juj sacerdote karqan Zacarías sutiyoq, esposantaq karqan Aaronpa mirayninmanta Elisabet sutiyoq. 6 Paykunaqa iskayninkun Diospa ñaupanpi chaninta kausaqku, mana juchachanatan kausaqku, Jehová* Diospa llapa kamachikuynintataqmi kasukuqkupas. 7 Ichaqa manan wawanku karqanchu, manan Elisabet onqoq rijuriyta atiqchu, chaymantapas machu-payañan karqanku.

8 Templopi paypa t’aqanman+ ruwana tupamuqtinmi Zacariasqa Diospa ñaupanpi sacerdote kayninman jina servisharqan, 9 imaynachus sacerdotekunaq ruwananman jinataq payman tuparqan Jehová* Diospa templonman jaykuspa+ incienso ruphachiy.+ 10 Llapa runakunataq incienso ruphachina horasta jawallapi Diosmanta mañakusharqanku. 11 Jinaqtinmi Jehová* Diospa angelninqa Zacariasman rijurirqan. Chay angelqa incienso ruphachina altarpa paña ladonpin sayasharqan. 12 Zacariasqa manan imanakuytapas atirqanchu, sinchitataqmi mancharikurqanpas. 13 Angeltaq ichaqa payta nirqan: “Ama mancharikuychu Zacarías; rogakusqaykitan Dios uyarimun, esposayki Elisabetmi juj qhari wawata qanpaq onqokunqa, paytan sutichanki Juan nispa.+ 14 Nacesqanwanmi anchata kusikunki, kusikullanqakutaqmi askha runakunapas.+ 15 Payqa jatunmi kanqa Jehová* Diospa ñaupanpi.+ Aman ujanqachu vinotapas ni ima machachiq ujanatapas;+ payqa manaraq naceshaspan santo espirituwan* junt’aykusqa kanqa.+ 16 Askha Israel runakunatan Jehová* Diosninkuman kutirichinqa.+ 17 Chaymantapas Diospa ñaupantan rinqa Eliaspa kallpanwan atiyninwan ima.+ Paymi taytakunaq sonqonta wawakunaq sonqonman jina tukuchinqa,*+ mana kasukuqkunatapas chanin runakuna jina yachayniyoqmanmi tukuchinqa; chhaynapin llaqtata preparanqa Jehová* Diospaq jina”,+ nispa.

18 Jinan Zacariasqa chay angelta nirqan: “¿Imaynapitaq chayri kanman? Machuñamá noqaqa kani, esposaypas ñan payaña kapun”, nispa. 19 Chaymi angelqa payta nirqan: “Noqaqa Gabrielmi kani,+ tukuy tiempon noqaqa Diospa ñaupanpi sayani,+ paymi kachamushawan qanwan rimanaypaq, chaymi kay allin willakuykunata willashayki. 20 Chaykunaqa tiemponpipunin junt’akunqa, ichaqa mana creewasqaykiraykun mana rimayta atinkichu chaykuna junt’akunan p’unchaykama”, nispa. 21 Chaykamataq runakunaqa Zacariasta jawapi suyasharqanku, admirasqan kasharqanku templo ukhupi unayña kamushasqanmanta. 22 Lloqsimuspataq mana paykunata rimapayayta atirqanchu, chaymi runakunaqa nirqanku: “Imatachá templo ukhupi rikuramun”, nispa. Zacariasqa manataq rimayta atirqanchu chayqa, makillanwanmi paykunata rimapayarqan. 23 Templopi servinan p’unchaykuna junt’akuqtintaq wasinman ripurqan.

24 Chay p’unchaykuna qhepatataq esposan Elisabetqa onqoq rijurirqan, jinaspan pisqa killa wasillapi karqan. Paymi nirqan: 25 “Yuyariwaspanmi Jehová* Diosqa khaynata kay p’unchaykunapi noqapaq ruwapuwan amaña runakunaq p’enqasqan* kanaypaq”,+ nispa.

26 Elisabet soqta killa onqoq kashaqtinmi Diosqa ángel Gabrielta kacharqan+ Galilea provinciapi Nazaret sutiyoq llaqtapi tiyaq 27 María sutiyoq+ doncella sipasman,*+ payqa Davidpa mirayninmanta José sutiyoq qhariwan casarakunanpaqmi rimaykusqa kasharqan. 28 Paypa kasqanman jaykuspan chay angelqa nirqan: “¿Imaynallan, María? Qanqa Diospa ancha sumaq qhawarisqan sipasmi kanki, qanwanmi Jehová* Diosqa kashan”, nispa. 29 Jinan Mariaqa angelpa rimaykusqanwan sinchita mancharikurqan, sonqonpitaq nirqan: “¿Ima rimaykuytaq kayri?”, nispa. 30 Jinaqtinmi angelqa Mariata nirqan: “Ama mancharikuychu María, qanqa Diospa sumaq qhawarisqanmi kanki. 31 Qanmi onqoq rijurinki, jinan juj qhari wawata onqokunki,+ paytan sutichanki Jesús nispa.+ 32 Payqa jatunmi kanqa,+ ancha jatun Diospa Churin nisqataqmi kanqapas.+ Jehová* Diosmi paytaqa ñaupa taytan Davidpa trononpi rey kananpaq churanqa.+ 33 Jinan Jacobpa mirayninta wiñaypaq kamachinqa. Paypa kamachikuyninqa mana tukukuqmi kanqa”,+ nispa.

34 Mariataq angelta nirqan: “¿Imaynataq chayri kanman? Manaraqmá noqaqa pi qhariwanpas kaniraqchu”,+ nispa. 35 Jinan chay angelqa payta nirqan: “Santo espiritun qanman chayamusunki,+ ancha jatun Diospa atiynintaq llanthuykusunki. Chaymi naceq wawaqa, ch’uya,+ Diospa Churin nisqa kanqa.+ 36 Parienteyki Elisabetpas paya kayninpin soqta killaña onqoq kashan. Paytaqa mana wachakuq warmi, nispan niqku. 37 Diospaqqa manan ima nisqanpas* mana junt’ay atinaqa kanmanchu”,+ nispa. 38 Chaymi Mariaqa nirqan: “Jehová* Diospa warmi kamachinmi kani, nisqaykiman jina noqawan ruwakuchun”, nispa. Angeltaq qayllanmanta ripurqan.

39 Chay p’unchaykunapin Mariaqa usqhaylla rirqan Judá ayllupi orqo-orqopi kaq llaqtaman, 40 Zacariaspa wasinman jaykuspataq Elisabet-ta napaykurqan. 41 Mariaq napaykusqanta Elisabet uyariqtintaq wijsanpi kaq wawaqa kuyuykacharqan, jinan Elisabetqa santo espirituwan junt’a kaspa 42 fuerteta nirqan: “¡Llapa warmikunamantapas ancha sumaq qhawarisqan kanki, wijsaykipi kaq wawapas sumaq qhawarisqa kachun! 43 ¿Pitaq noqari kani Señorniypa maman noqaman jamuwananpaq? 44 Napaykuwasqaykita uyariqtiy jinan wijsaypi kaq wawaqa kusisqa kuyuykacharun. 45 Creesqaykiraykun qanpas kusisqa kanki, qanman Jehová* Diospa rimaykusqanqa junt’akunqapunin”, nispa.

46 Chaymi Mariaqa nirqan: “Jehová* Diostan jatunchani,+ 47 salvawaqniy Diosraykun+ sonqoyqa anchatapuni kusikun, 48 paymi kay warmi kamachinta qhawarimuwan wajchaña kashaqtiypas.+ Kunanmantaqa llapa runakunan kusisqa warmi niwanqaku,+ 49 atiyniyoq Dios jatun ruwaykunata noqapaq ruwapuwasqanrayku. Paypa sutinqa ch’uyapunin,+ 50 tukuy tiempon manchakuqninkunataqa khuyapayan.+ 51 Ancha jatun ruwaykunatan makinwan ruwan, jatunchakuq sonqoyoqkunatan ch’eqerichin.+ 52 Tronopi tiyaq atiyniyoq runakunatan k’umuchin,+ k’umuykukuq kaqkunatataq jatunchan;+ 53 yarqasqa kaqkunatan allin kaqkunawan allinta sajsachin,+ qhapaq kaqkunatataq ch’usaq makita kachapun. 54 Kamachin Israelta yanapaq jamuspan rikuchin promesan yuyarisqanta,+ 55 paymi prometekurqan Abrahanta miraynintawan+ wiñaypaq khuyapayananpaq, chaytan ñaupa taytanchiskunaman willarqan”, nispa. 56 Mariaqa kinsa killata jinan Elisabetwan qhepakurqan, chaymantataq wasinman kutipurqan.

57 Onqokunan tiempo junt’akuqtinmi Elisabetqa juj qhari wawata onqokurqan. 58 Jinan wasimasinkunapas parientenkunapas Jehová* Diosqa anchatapuni Elisabet-ta khuyapayasqanta uyarispa paywan kusikurqanku.+ 59 Wawaq nacesqanmanta pusaq p’unchay karuqtintaq qhari kaynin qarachata kuchuyman jamurqanku,+ jinaspan taytan Zacariaspa sutinwan sutichayta munarqanku. 60 Chaymi wawaq mamanqa nirqan: “¡Manan! Juanmi sutinqa kanqa”, nispa. 61 Jinan paykunaqa nirqanku: “Manamá pi familiaykipas chhayna sutiyoqqa kanchu”, nispa. 62 Jinaspan makillankuwan taytanta tapurqanku ima sutitachus wawaman churayta munan chayta. 63 Jinan Zacariasqa qelqana tablachata mañakuspa chaypi qelqarqan: “Juanmi sutinqa”,+ nispa. Chaywantaq llapanku admirakurqanku. 64 Chayllamanmi Zacariaspa siminqa kicharikurqan, qallunpas paskarikurqan, jinan Diosta jatunchaspa rimayta qallarirqan.+ 65 Chaywanmi llapa wasimasinkuna mancharikurqanku, lliu Judea orqo-orqopitaq tukuy chaykunamanta runakuna rimayta qallarirqanku. 66 Llapa uyariqkunataq chaykunata sonqonkupi jap’ikuspa nirqanku: “Pichá kanqa chay wawaqa”, nispa. Chaytaqa nirqanku Jehová* Dios paywan kashasqanta reparaspankun.

67 Taytan Zacariastaq santo espirituwan junt’a kaspa nirqan: 68 “Jatunchasqa kachun Israelpa Diosnin Jehová* Diosqa,+ paymi llaqtanta watukamun kacharichinanpaq.+ 69 Kamachin Davidpa wasinmantan+ atiyniyoq salvaqta* jatarichipuwanchis,+ 70 ñaupa tiempopi ch’uya profetankunawan willachisqanman jinan ruwapuwanchis.+ 71 Paymi prometekurqan enemigonchiskunamanta, cheqniwaqninchiskunaq makinmanta salvawananchispaq,+ 72 ñaupa taytanchiskunarayku khuyapayawananchispaq, ch’uya rimanakuyninta yuyarinanpaqwan.+ 73 Chaytan payqa ñaupa taytanchis Abrahanman jurasqa.+ 74 Maypachachus enemigonchiskunaq makinmanta librawasun chayqa, mana manchakuspan payta servisunchis 75 tukuy kausasqanchis p’unchaykunan junt’aq kaywan, chanin kaywan payta servisunchis. 76 Qanqa wawáy, ancha jatun Diospa profetan, nisqan kanki, Jehová* Diospa ñaupantan rinki ñanninta allichaq,+ 77 llaqtanmanmi willanki juchankumanta perdonasqa kaspa+ salvasqa kanankuta; 78 ancha khuyapayakuq kasqanraykun Diosqa chayta ruwanqa. Chay khuyapayaywanmi pacha illarimuy k’anchaywan jina k’anchaykuwasun, 79 chay k’anchaymi tutayaqpi tiyaqkunata, wañuypa llanthuykusqanpi tiyaqkunatawan k’anchaykunqa;+ thaj kay ñannintataqmi pusawasunchis”, nispa.

80 Wawaqa allintan wiñarqan, yuyayninpipas imayna kayninpipas allin tajyasqan kasharqan, Israel llaqtaman sut’ita rikuchikunankamataq ch’inneqllapi tiyarqan.