Mateo
28 Samana p’unchay qhepatan semana qallariy* p’unchay illarimuyta María Magdalenawan juj kaq Mariapiwan sepultura qhawaq rirqanku.+
2 Janaq pachamanta Jehová* Diospa angelnin uraykamusqanraykun jatun terremoto kasqa, chay angelmi jamuspa rumita suchuchisqa, jinaspa chay patapi tiyasharqan.+ 3 Chay angelqa llifllikiy jinan k’ancharqan, p’achantaq rit’i jina yuraq karqan.+ 4 Payta mancharikuspan sepulturata qhawanankupaq churasqa runakunaqa khatatatarqanku,* wañusqa jinaraqmi kapurqanku.
5 Angeltaq warmikunata nirqan: “Ama mancharikuychischu, qankunaqa k’aspipi wañuchisqanku Jesustan maskhashankichis+ ¿riki? 6 Payqa manan kaypiñachu, nisqanman jinan kausarichisqa kapun.+ Jamuychis, qhawaykuychis maypichus kasharqan chayta. 7 Chhaynaqa usqhaylla rispa discipulonkunaman willamuychis wañusqamanta kausarichisqa kasqanta. Payqa ñauparinñan Galileaman,+ chaypin payta rikumunkichis. Chayta willaqmi jamurqani”,+ nispa.
8 Jinan chay warmikunaqa sepulturamanta usqhaylla ripuspa, manchasqataq ancha kusisqataq phawaylla rirqanku Jesuspa discipulonkunaman willaq.+ 9 Rishaqtinkutaq Jesusqa paykunaman qonqaylla rijurispa napaykurqan. Chaymi paykunaqa asuykuspa chakinman k’umuykurqanku. 10 Jinan Jesusqa nirqan: “¡Ama manchakuychischu! Phawaychis, wayqeykunaman willamuychis Galileaman rinankupaq, chaypin rikumuwanqaku”, nispa.
11 Chay warmikuna rishanankukaman sepulturata qhawaq wakin runakunaqa+ llaqtaman rirqanku, jinaspa umalli sacerdotekunaman willamurqanku tukuy imachus pasasqanta. 12 Jinan umalli sacerdotekunaqa umalliq runakunapiwan* juñunakurqanku rimanakunankupaq, chay qhepamantaq soldadokunaman askha qolqeta qorqanku. 13 Jinaspa nirqanku: “Puñushanaykukaman discipulonkuna tuta jamuspa cuerponta suwaruwasqaku,+ nispan ninkichis. 14 Chaytachus kamachikuq yacharunqa chayqa, aman llakikunkichischu, noqaykuñan paywan rimasaqku”, nispa. 15 Jinan chay soldadokunaqa qolqeta chaskikuspa yachachisqa kasqankuman jina rimarqanku, chaytan kunan p’unchaykama judío runakuna ukhupi rimakushan.
16 Chunka jujniyoq discipulonkunataq Galileata rirqanku+ maypichus Jesús paykunawan tupanan karqan chay orqoman.+ 17 Jesusta rikuspankutaq payman k’umuykurqanku, wakin discipulonkunan ichaqa iskayarqanku. 18 Jinan Jesusqa discipulonkunaman qayllaykuspa nirqan: “Diosmi tukuy atiyta qowan janaq pachapipas kay pachapipas.+ 19 Chayrayku, llapa nacionmanta runakunaman riychis, jinaspa yachachimuychis discipuloykuna kanankupaq,+ jinaspa Yayaq, Churiq, santo espirituq* sutinpi paykunata bautizamuychis.+ 20 Qankunaman llapa kamachisqaykunata imaynatachus kasukunanku chayta paykunaman yachachimuychis.+ Noqaqa sapa p’unchaymi qankunawan kashasaq kay tiempoq* tukukapunankama”,+ nispa.