Marcos
3 Wajmantan Jesusqa sinagogaman jaykullarqantaq, chaypin kasharqan juj runa jujnin makin ch’akisqa.+ 2 Fariseokunataq makilla Jesusta qhawasharqanku samana p’unchaypi* chay runata qhaliyachinmanchus icha manachus chayta, chhaynapi chayman tumpalla juchachanankupaq. 3 Jinaqtinmi Jesusqa ch’akisqa makiyoq runata nirqan: “Sayarispa kay chaupiman jamuy”, nispa. 4 Chaymantataq paykunata nirqan: “¿Ima ruwaymi allin kanman samana p’unchaypi? ¿Allin kaqta ruwaychu, icha mana allin kaqta ruwaychu? ¿Runata* salvaychu, icha wañuchiychu?”,+ nispa. Paykunan ichaqa ch’inlla karqanku. 5 Jinan muyuriqninpi kaqkunata phiñasqa qhawarispa, sonqonku rumiyasqa kasqanmanta+ maytapuni llakikurqan, chaymi chay runata nirqan: “Makiykita jaywarimuy”, nispa. Jaywariqtintaq makinqa qhali kapurqan. 6 Chayta rikuspan fariseokunaqa lloqsispa jina Herodespa t’aqanmanta*+ kaqkunawan Jesusta wañuchinankupaq rimanakurqanku.
7 Jesusmi ichaqa discipulonkunawan kuska lamar-qocha ladoman rirqan, jinan Galileamanta Judeamantawan ancha askha runakuna qatikurqanku.+ 8 Imaymana ruwasqanmanta uyarispan askhallaña runakuna jamullarqantaq Jerusalenmanta, Idumea llaqtamanta, Jordán mayu inti lloqsimuy ladomanta, Tiro llaqtaq Sidón llaqtaq muyuriqninmantawan. 9 Chaymi Jesusqa discipulonkunata nirqan juj boteta listota alistapushanankupaq, chhaynapi runakuna mana k’iskinankupaq. 10 Askha onqosqakunata qhaliyachisqanraykun sinchi onqosqa runakuna llapallanku Jesusman k’iskipakamurqanku, paytan llamiykuyta munasharqanku.+ 11 Millay espiritukunapas+ payta rikuspan ñaupanpi k’umuykuspa qapariqku: “¡Qanqa Diospa Churinmi kanki!”,+ nispa. 12 Chaymi Jesusqa askha kutita paykunata allin-allinta kamachirqan pichus kasqanta ama rimarinankupaq.+
13 Juj orqoman seqaspataq wakin discipulonkunata wajarqan,+ paykunataq payman jamurqanku.+ 14 Chunka iskayniyoq runakunata ajllaspan apostolkuna* nispa suticharqan; paykunan puriysinanku karqan, Jesustaqmi paykunata kachanan karqan allin willakuykuna willaqta, 15 atiytapas qonan karqan supaykunata qarqonankupaq.+
16 Chay chunka iskayniyoq runakunan karqan:+ Simón (paytan Jesusqa suticharqan Pedro nispa),+ 17 Zebedeoq wawan Santiago, Santiagoq wayqen Juan (paykunatan sutichallarqantaq Boanerges nispa, chayqa “rayo t’ojaypa wawankuna” ninantan nin),+ 18 Andrés, Felipe, Bartolomé, Mateo, Tomás, Alfeoq wawan Santiago, Tadeo, Cananita* nisqa Simón, 19 Judas Iscariote ima, paymi karqan Jesusta jap’ichiqqa.
Chaymantan Jesusqa juj wasiman jaykurqan. 20 Wajmantan askha runakuna juñukamullarqantaq, chaymi Jesuswan discipulonkunawanqa mana ni mijuytapas atirqankuchu. 21 Jesuspa familiantaq imachus pasasqanta uyarispa pusapunankupaq jamurqanku: “Manan yuyayninpichu kashan”,+ nispanku. 22 Jerusalén llaqtamantan uraykamurqanku kamachikuy simita yachachiqkuna, paykunapas nirqankun: “Belcebupa* junt’aykusqanmi kashan, supaykunata kamachiqpa atiyninwanmi supaykunata qarqon”,+ nispa. 23 Jinan Jesusqa runakuna qayllaykamunankupaq kamachirqan, jinaspa rijch’anachiykunata willaspa* yachachirqan, nirqanmi: “¿Imaynapin Satanás pay kikinta qarqokunman? 24 Mayqen nacionpas t’aqanasqa kaspaqa, manan sayayta atinmanchu.+ 25 Mayqen familiapas t’aqanasqa kaspaqa, manallataqmi jujlla kaytaqa atinkumanchu. 26 Satanaspas kikinpa contranpi jatarispaqa t’aqanasqan kanman, manataqmi sayayta atinmanchu, aswanpas chinkapunmanmi. 27 Manan pipas kallpasapa runaq wasinman jaykuspa imantapas suwayta atinmanchu manachus ñaupaqta chay runata watanman chayqa. Wataspañan imantapas suwayta atinman. 28 Cheqaqtan niykichis: Runakunaq lliu ima ruwasqanpas perdonasqan kanqa, imapiña juchallikurqanku pisichaspaña k’amirqanku chaypas. 29 Santo espirituta* pisichaspa k’amiqmi ichaqa mana jayk’aqpas perdonasqachu kanqa,+ aswanmi wiñaypaq juchayoq kanqa”,+ nispa. 30 Chaytaqa nirqan “millay espiritun paypi kashan”+ nispa niqtinkun.
31 Chayllamanmi Jesuspa maman wayqenkuna ima jamurqanku,+ jawallapi sayaykuspankutaq payta wajamuqta kachaykurqanku.+ 32 Jesuspa muyuriqninpiqa askha runakunan tiyasharqanku, chaymi nirqanku: “Mamaykin wayqeykikunapiwan maskhamushasunkiku, jawapin kashanku”,+ nispa. 33 Jesusmi ichaqa nirqan: “¿Pitaq mamaypas wayqeykunapas?”, nispa. 34 Muyuriqninpi tiyaqkunata qhawarispataq nirqan: “¡Qhawariychis, paykunan mamaypas wayqeykunapas!+ 35 Pipas Diospa munayninta ruwaqmi wayqeypas, panaypas, mamaypas”,+ nispa.