Jeremías
27 Josiaspa churin Judá rey Jehoiaquin kamachikuyta qallarishaqtinmi Jehová Diosqa Jeremiasta rimapayarqan. 2 Jinan Jeremiasqa nirqan: “Jehová Diosmi khaynata niwan: Yugota ruwakuy watanantinta, chaytataq much’uykiman watakuy. 3 Chaymantataq chayta apachinki Edom reyman,+ Moab reyman,+ Anmón reyman,+ Tiro reyman,+ Sidón reyman+ ima. Chaytan apachinki paykunaq sutinpi, Jerusalenpi kashaq Judá rey Sedequiasman jamuqkunawan. 4 Niy patronninkuman kay kamachikuyta apanankupaq:
”Patronniykichismanmi kayta willamunkichis, ejercitokunata kamachiq Jehová Diosmi, Israelpa Diosninmi nin: 5 Noqan jatun atiyniywan, kallpaywan kay jallp’ata, runakunata, pachantinpi kaq animalkunata kamarqani, pi munasqaymanmi qorqani.+ 6 Kunantaq llapa kay suyukunata kamachiy Babilonia rey Nabucodonosorpa makinman jap’ichini,+ campopi kaq salqa animalkunatapas paymi munaychakapunqa. 7 Llapa nacionkunan payta, churinta, nietontapas servinqaku, suyun atipasqa kananpaq tiempo chayamunankama,+ chaymantaqa askha nacionkunan, atiyniyoq reykunan kamachinman tukuchipunqaku,+ nispa.
8 ”Sichus mayqen nacionpas mayqen gobiernopas mana Babilonia rey Nabucodonosorta serviyta munanqachu, manataq Babilonia reypa yugonta kunkanman churakuyta munanqachu chayqa, chay naciontan espadawan,+ yarqaywan, millay onqoywan ima castigasaq, Babilonia reywanmi paykunata ch’usaqyachisaq, ninmi Jehová Dios.
9 ”Diosmi nin: Chhaynaqa ama uyariychischu profetakunata, watuqkunata, mosqokuqkunata, layqakunatapas, paykunan nishasunkichis: Manan Babilonia reytaqa servinkichischu, nispa. 10 Chay willasqankuqa manan cheqaqchu, paykunata uyarinkichis chayqa jallp’aykichismantan karuman apasqa kankichis, noqan ch’eqechisaykichis, jinan wañunkichis.
11 ”Babilonia reypa yugonta kunkanman churakuspa serviq nacionmi ichaqa jallp’allanpi qhepakunqa, chaypin tiyakunqa chajratapas ruwakunqa, ninmi Jehová Dios”, nispa.
12 Judá rey Sedequiastapas kaqtan nillarqanitaq:+ “Babilonia reypa yugonta kunkaykichisman churakuspa payta llaqtantawan serviychis, chhaynapin kausashallankichis.+ 13 ¿Imaraykun qanpas llaqtaykipas Babilonia reyta mana serviq nacionmanta Jehová Diospa nisqan jina espadawan,+ yarqaywan,+ millay onqoywan+ wañuwaqchis? 14 Ama uyariychischu, qankunaqa manan Babilonia reyta servinkichischu niq profetakunata,+ paykunaqa llullakuspan willashasunkichis.+
15 ”Jehová Diosmi nin: Manan noqachu paykunataqa kachamurqani, llullakuspan sutiypi rimashanku, paykunata uyariqtiykichisqa qankunatapas chay profetakunatapas ch’eqechisaykichismi, jinan wañunkichis,+ nispa”.
16 Sacerdotekunata llapa llaqta runakunatawanmi nirqani: “Jehová Diosmi nin: Ama uyariychischu chay llulla profetakunata, paykunan nishanku: ¡Qhawariychis!, ñan Babiloniamantaqa kutichimpunqakuña Jehová Diospa wasinmanta apasqanku cosaskunata,+ nispa. Paykunaqa llullakuspan chayta willashasunkichis.+ 17 Ama uyariychischu. Aswanpas Babilonia reyta serviychis, chhaynapin kausashallankichis.+ ¿Imaraykutaq kay llaqtari thunisqa kanman? 18 Profetachus kanku chayqa, Jehová Diosmantachus simita chaskirqanku chayqa, ejercitokunata kamachiq Jehová Diosta rogakuchunku, Jehová Diospa wasinpi puchuq cosaskunata, Judá reypa wasinpi,* Jerusalenpi puchuq cosaskunata ama Babiloniaman apakapunankupaq, nispa.
19 ”Ejercitokunata kamachiq Jehová Diosmi columnakunamanta,+ Jatun Qocha nisqa puruñamanta,*+ carretakunamanta,+ kay llaqtapi puchuq cosaskunamantawan nin. 20 (Chay cosaskunatan Babilonia rey Nabucodonosorqa mana aparqanchu, Jerusalenmanta Jehoiaquinpa churin Judá rey Jeconiasta Judá umallikunata Jerusalén umallikunatapas+ presota Babiloniaman apasqan p’unchaypi). 21 Arí, Jehová Diospa wasinpi, Judá reypa wasinpi, Jerusalenpi puchuq cosaskunamantan ejercitokunata kamachiq Jehová Dios, Israelpa Diosnin nin: 22 Babiloniamanmi chaykunata apakapunqaku,+ chaypin kamunqa noqa watukunay p’unchaykama, chaymantan kayman apakampusaq, jinaspan maypichus kananman churapusaq;+ noqa Jehová Diosmi chayta nini, nispa”.