Jeremías
19 Jehová Diosmi khaynata niwarqan: “Phaway, t’uruwan llank’aq runamanta p’uyñuta rantimuy.+ Wakin llaqta umalliqkunata* wakin umalliq sacerdotekunatawan pusarikuspa 2 Hinón* wayq’ota riy,+ K’arpa* Punku nisqa jaykunaman riy. Chaypin willamunki imatachus nisayki chayta. 3 Khaynatan ninki: Judá reykuna, Jerusalenpi tiyaq runakuna, Jehová Diospa siminta uyariychis. Ejercitokunata kamachiq Jehová Diosmi, Israelpa Diosninmi nin:
”Ñak’ariytan kayman chayachimusaq, pipas chay ñak’ariymanta uyariqqa admirakunqan. 4 Noqata saqerpariwaspan+ paykunaqa kay cheqasta mana reqsiyman tukuchirqanku.+ Chaypin paykunaqa mana reqsisqanku waj dioskunaman, ñaupa taytankuq, Judá reykunaq mana reqsisqan dioskunaman sacrificiokunata jaywarqanku, mana juchayoq runakunaq yawarnintan kaypi jich’arqanku.+ 5 Yupaychana patakunatan Baalpaq ruwarqanku, chaypi wawankuta ruphachinankupaq, ruphachina ofrendata jina Baalman jaywanankupaq.+ Manan chaytaqa kamachirqanichu, manan yuyaykullarqanipaschu.+
6 ”Chayraykun p’unchaykuna chayamushanña, chay p’unchaykunapin manaña kaytaqa Tófet, Hinón* wayq’o ninqakuñachu, aswanpas Runa Wañuchina wayq’o ninqakun,+ ninmi Jehová Dios. 7 Kaypin Judá runakunaq, Jerusalén runakunaq yuyaykusqankuta tatichisaq. Enemigonkun paykunataqa espadawan wañuchinqa, noqan enemigonkuwan atipachisaq, paykunata wañuchiyta munaqkunamanmi entregasaq. Ayankutapas phalaq animalkunamanmi, kay jallp’api kaq animalkunamanmi qaraykusaq.+ 8 Mancharikunamanmi kay llaqtata tukuchisaq, asipayanaman silbapayanamanmi tukuchisaq. Llapa chayninta puriqkunan sinchi mancharisqa qhawanqaku, imaynapi tarikusqanmantan admirasqa qhawanqaku.+ 9 Enemigonkuna, wañuchiyta munaqkuna muyuykuqtinmi sinchita mancharikunqaku, manan imatapas ruwayta atinqakuchu. Churinkuq ususinkuq aychantan mijuchisaq, paykunapuran mijunakunqaku.+
10 ”Chaymantataq qanwan riq runakunaq rikushasqan p’uyñuta p’akinki, 11 jinaspa ninki: Ejercitokunata kamachiq Jehová Diosmi nin: Chhaynatan ruwasaq kay llaqtawan, kay llaqta runakunawanpas, imaynan t’uruwan llank’aqpa ruwasqan p’uyñuta pipas p’akiqtin manaña allichayta atikunchu chhaynan kanqa kay llaqtawanpas ñut’usqa kaqtin. Tofetpin wañuqkunata p’ampanqaku manaña campopas kanankama,+ nispa.
12 ”Chaytan ruwasaq kay cheqaswan, chaypi tiyaqkunawanpas, kay llaqta Tófet jina kapunanpaq, ninmi Jehová Dios. 13 Jerusalenpi wasikunapas Judá reykunaq wasinkunapas Tófet jinan qhelli kapunqa,+ arí, llapa mayqen wasi patakunapis janaq pachapi kaq ch’askakunaman*+ sacrificiokunata jaywarqanku, waj dioskunaman vino ofrendata jaywarqanku, chay wasikunan qhelli kapunqa”,+ nispa.
14 Jeremiasqa Tofetmanta kutimuspan, Jehová Dios profetizananpaq kachasqanmanta kutimuspan Jehová Diospa wasin patioman rirqan, jinaspa llapa runakunata nirqan: 15 “Ejercitokunata kamachiq Jehová Diosmi, Israelpa Diosninmi nin: Willasqay ñak’ariytan kay llaqtaman, muyuriqninpi kaq juch’uy llaqtakunamanpas chayachimusaq, paykunaqa k’ulluchakuspan simiyta mana kasukurqankuchu,+ nispa”.