2 Samuel

17 Ahitofelmi Absalonta nirqan: “Chunka iskayniyoq waranqa runakunata ajllarusaq, jinaspa kay tuta Davidta qatiparusaq. 2 Payqa sayk’usqan kashan,+ qonqaylla phawaykuqtiyqa mancharikunqan, runankunapas manchakuymantan ayqekunqaku, chhaynapin payllata wañuchimusaq.+ 3 Chaymantataq llapa runakunata kayman kutichimpusaq. Sichus maskhasqayki runa wañunqa chayqa, paypa llapa runankunan kayman kutimpunqaku. Chhaynapin llapa llaqtantin runakuna thajpi kausanqaku”, nispa. 4 Ahitofelpa chay nisqantaqa allinpaqmi qhawarirqanku Absalonpas Israelpi llapa umalliqkunapas.*

5 Absalonmi ichaqa nirqan: “Wajamullaychistaq arkita runa Jusaita,+ paypa yuyaychasqantapas uyarisunchis”, nispa. 6 Absalonpa kasqanman Jusái jaykuqtintaq, Absalonqa payta nirqan: “Ahitofelmi kayta yuyaychawanku, ¿allinchu chay nisqan icha manachu? Mana chayqa qan niwayku imatachus ruwanaykuta”, nispa. 7 Jusaitaq Absalonta nirqan: “Kay kutipiqa pantashanmi Ahitofelqa, manan allintachu yuyaychashasunkichis”,+ nispa.

8 Chaymantapas Jusaiqa nillarqantaqmi: “Yachasqayki jina, papaykipas runankunapas allin kallpasapa maqanakuqmi kanku.+ Paykunaqa chinkasqa uñanta maskhaq china oso jinan sinchi phiñasqa kashanku.+ Chaymantapas papaykiqa allin maqanakuqtaq+ chayqa manan runankunaq kasqanpiqa puñunmanchu. 9 Kunanpas juj qaqa t’oqopipunin pakakushanman otaq maypichus kashanpas.+ Sichus pay ñaupaqta qonqaylla phawaykamunqa chayqa chayta yachaqkunachá ninkuman: ¡Davidmi atiparampun Absalonpa runankunata!, nispa. 10 Chayta uyarispaqa león jina mana manchakuq* kallpasapa runakunapas+ manchakuymantachá khatatatankumanraq.* Israel runakunaqa allintan yachanku papaykiqa kallpasapa kasqanta+ runankunapas valiente kasqankuta. 11 Aswanpas llapa Israel runakuna lamar-qocha patapi aqo jinaraq+ juñukamuchunku Danmanta Ber-Sebakama,+ chay runakunatataq qan kikiyki maqanakuyman pusanki. 12 Jinaspataq maypiña kashaqtinkupas sulla* jinaraq paykuna pataman phawaykusunchis, chhaynapi lliuta wañuchisunchis reytapas runankunatapas, manan jujpas kausanqachu. 13 Juj llaqtapi pakakunqa chaytaq apasqanchis waskhakunawan llaqtantinta wayq’oman aysaykamusunchis, manan ni juj rumillapas qhepanqachu”, nispa.

14 Jinan Absalonpas wakin Israel runakunapas nirqanku: “¡Arkita runa Jusaipa yuyaychasqanmi aswan allinqa+ Ahitofelpa yuyaychasqanmantaqa!”, nispa. Chhaynatan Jehová Diosqa Ahitofelpa allin yuyaychayninta pantachirqan.+ Chaytan Jehová Diosqa ruwarqan Absalonta sasachakuyman churananpaq.+

15 Chaymantataq Jusaiqa sacerdote Sadocman Abiatarmanwan+ willarqan: “Khaynatan Ahitofelqa yuyaychasqa Absalonta Israelpi umalliqkunatawan, noqataqmi khaynata yuyaychani. 16 Chayrayku usqhaylla Davidman willachimuy: Kay tutapacha Jordán mayuta chimpallaychisña. Amaña qhepakuychischu ch’inneqpiqa, maypichus Jordán mayu chimpanakuna kashan chaypiqa, mana chayqa runaykikunatawan kuskatan lliuta wañuchisunkichis,+ nispa”.

17 Jonatanwan+ Aimazwanqa+ En-Roguelpin+ kasharqanku Jerusalén llaqta jawapi. Paykunaqa mana rikuchikuyta munaspan llaqta ukhuman mana jaykurqankuchu, chaymi juj warmi kamachilla paykunaman willarqan Jusaipa nisqanta. Jinan paykunaqa rey Davidman willaq rirqanku. 18 Juj waynan ichaqa paykunata rikurqan jinaspa Absalonman willarqan. Chaymi Jonatanwan Aimazwanqa usqhaylla rispanku Baurin llaqtaman chayarqanku+ juj runaq wasinman. Chay runaq wasi pationpin juj pozo karqan, chay ukhumanmi paykunaqa pakakuq jaykurqanku. 19 Wasiyoqpa esposantaq chay pozota telawan taparurqan, jinaspa chay pataman trigo ch’aqeta jich’arqan. Chaytaqa manan pipas repararqanchu. 20 Absalonpa kamachinkunataq chay warmiq wasinman chayaspa tapurqanku: “¿Maypin kashanku Aimazwan Jonatanwan?”, nispa. Chay warmitaq nirqan: “Mayu ladomanmi risharqanku”,+ nispa. Jinan chay runakunaqa maskhayta qallarirqanku, mana tarispataq Jerusalenman kutipurqanku.

21 Chay runakuna pasapuqtinkutaq Aimazwan Jonatanwanqa chay pozomanta lloqsispa rey Davidman willaq rirqanku, jinaspa nirqanku: “Usqhaylla Jordán mayuta chimpaychis, Ahitofelmi qankuna contra imaymanata Absalonta yuyaychasqa”,+ nispa. 22 Jinan Davidqa runankunantin kaq ratupacha puririspa Jordán mayuta chimparqanku, illarimuypaqqa llapankuñan chimparurqanku.

23 Yuyaychasqanta mana kasusqankuta yachaspan Ahitofelqa juj asnopi sillaykukuspa llaqtanman ripurqan.+ Wasinman chayaspataq wasinpi kaqkunawan rimarqan,+ chaymantataq seq’okapurqan.+ Jinan ñaupa taytankunaq sepulturanpi p’ampapurqanku.

24 Chaykamataq Davidqa Manain+ llaqtaman rirqan, Absalontaq llapa Israel runakunapiwan Jordán mayutaña chimpasharqanku. 25 Absalonqa Joabpa rantinpin Amasata+ churarqan soldadonkunaq umallin kananpaq.+ Amasapa papanmi karqan Israelmanta Itrá, mamantaq karqan Najaspa ususin Abigaíl.+ Abigailqa Zeruyapa ñañanmi karqan, Zeruyataq karqan Joabpa maman. 26 Absalonqa Israel runakunapiwanmi karpakurqanku Galaad runakunaq jallp’anpi.+

27 Manain llaqtaman David chayaqtin jinataq Anmón runakunaq tiyasqan Rabá+ llaqtamanta Najaspa churin Sobí, Lo-Debarmanta Amielpa churin Makir,+ Galaad jallp’amanta Roguelin llaqtayoq Barzilaipiwan+ 28 apamurqanku puñunakunata, t’urumanta vasokunata, t’urumanta mankakunata, puruñakunata,* trigota, cebadata, habasta, lentejasta, jank’ata, jak’uta, 29 mielta, mantequillata, quesota,* ovejakunatawan. Tukuy chaykunatan aparqanku Davidpas runankunapas mijunankupaq.+ Chaykunata apamuqkunan nirqanku: “Ch’inneqpi puriq runakunaqa sayk’usqachá kashanku, yarqaymanta ch’akiymanta ima”,+ nispa.