2 Samuel
16 Olivos orqo patata David pasaruqtinmi+ Mefibosetpa+ kamachin Zibaqa+ chaypiña suyashasqa. Paymi apamusqa iskay asnokunapi iskay pachaj t’antata, pachaj pasas tortakunata, higosmanta datilmanta pachaj tortakunata,* jatun jarrapi vinotawan.+ 2 Jinan rey Davidqa Zibata nirqan: “¿Imaraykutaq kaykunatari apamushanki?”, nispa. Zibataq nirqan: “Kay asnokunaqa familiayki sillakunanpaqmi, t’antawan frutakunawantaq runaykikuna mijunanpaq, kay vinotaq ch’inneqpi purispa sayk’usqakunapaq”,+ nispa. 3 Jinan rey Davidqa tapurqan: “¿Maytaq patronniykiq nietonri?”,*+ nispa. Zibataq nirqan: “Jerusalenpin qhepakamun, paymi nishan: Kunanqa abueloypa gobiernontan Israel runakunaqa qopuwanqaku,+ nispa”. 4 Chaymi rey Davidqa nirqan: “Chhaynaqa, Mefibosetpa llapa kaqninkunata jap’ikapuy”,+ nispa. Zibataq nirqan: “Ñaupaykipin k’umuykuni sumaqta qhawariwasqaykimanta. Gracias reyníy, chhaynallatapuni qhawarishaway”,+ nispa.
5 Baurin llaqtaman rey David chayaqtinmi juj runa Davidta ñakaspa lloqsimurqan.+ Chay runaqa Saulpa familianmantan karqan, Guerapa churin Simeí.+ 6 Chay runan Davidta, kamachinkunata, chaypi kaq llapa runakunatawan rumiwan ch’aqemurqan. Rey Davidpa paña ladonta lloq’e ladonta rishaq allin maqanakuq soldadokunatapas mana manchakuspan ch’aqemurqan. 7 Simeiqa khaynatan Davidta ñakarqan: “¡Yau runa wañuchiq, mana valeq runa! ¡Ripuy kaymanta! 8 Qanqa Saulpa familianpi kaqkunatan wañuchirqanki, gobiernontapas qechurqanki, chayraykun Jehová Diosqa castigashasunki. Chay ruwasqaykimantan kunanqa Jehová Diosqa Absalón wawaykita reyta churapun. ¡Runa wañuchisqaykiraykun qanqa sinchita ñak’arinki!”,+ nispa.
9 Chaymi Zeruyapa+ churin Abisaiqa rey Davidta nirqan: “Reyníy, ¿pitaq jaqay wañunayaq alqori+ chhaynata ñakanasuykipaq?+ Rirusaq, jinaspa umanta qhoruramusaq”,+ nispa. 10 Rey Davidmi ichaqa nirqan: “Zeruyapa churinkuna, ¿imanasunkichismi chay runaq rimasqan?+ Jinalla ñakawachun,+ paytaqa Jehová Diosmi kamachimun:+ ¡Phaway Davidta ñakamuy!, nispa. Chhaynaqa manan pipas paytaqa ninmanchu: ¿Imaraykun ñakashanki?, nispaqa”, nispa. 11 Chaymantataq Davidqa Abisaita kamachinkunatawan nirqan: “Qhawariychis, kikin wawaypas wañuchiytan munashawan.+ Chhaynaqa, ¡razonwanraqchá riki Benjamín ayllumanta runaqa ñakawan!+ Ama imanaychispaschu, jinalla ñakawachun, Jehová Diosmi paytaqa kamachimun. 12 Yaqapaschá Jehová Diosqa kay ñak’arisqayta rikumuspa khuyapayawanman,+ jinaspa chay runaq ñakawasqanta Jehová Diosqa bendicionkunaman tukuchinman”,+ nispa. 13 Davidwan runankunawanqa ñannintan rishallarqanku, Simeitaq chimpan orqo qayllata rishallarqantaq ñakaspa,+ rumiwan ch’aqemuspa, jallp’ata jach’imuspa ima.
14 Chaymantataq rey Davidqa llapa runankunapiwan maymanchus rinankuman chayarqanku. Paykunaqa sinchi sayk’usqan kasharqanku, chaymi samarirqanku.
15 Chaykamataq Absalonqa llapa yanapaqnin runakunapiwan Jerusalén llaqtaman chayarqanku, Ahitofelpas+ Absalonwan kuskan kasharqan. 16 Davidpa amigon arkita runa+ Jusaitaq+ Absalonpa kasqanman jaykuspa nirqan: “¡Kausachun rey!+ ¡Kausachun rey!”, nispa. 17 Chayta niqtinmi Absalonqa Jusaita nirqan: “¿Chhaynatachu amigoyki Davidman munakuyniykita* rikuchinki? ¿Imaraykutaq paywanri mana rirqankichu?”, nispa. 18 Chaymi Jusaiqa Absalonta nirqan: “Pitachus Jehová Diospas Israelpi llapa runakunapas reyta ajllarqanku, chaytan noqaqa yanapasaq, chaywantaqmi qhepakusaqpas. 19 Chhaynaqa, ¿pitataq serviymanri? Qanqa amigoypa wawanmi kanki. Chaymi kunanqa qanta servisayki imaynan papaykitapas servirqani jinata”,+ nispa.
20 Chaymantataq Absalonqa Ahitofelta nirqan: “Yuyaychaway,+ ¿imatan ruwasunchis?”, nispa. 21 Jinan Ahitofelqa Absalonta nirqan: “Papaykin wasinta* cuidanankupaq tiyaqmasin warmikunata* saqesqa,+ chay warmikunawan puñuy.+ Chhaynapin lliu Israel runakunaqa yachanqaku papaykiq cheqnisqan kapusqaykita. Qanta yanapaq runakunataq astawan kallpachakunqaku”, nispa. 22 Jinan runakunaqa wasi patapi Absalonpaq juj karpata ruwapurqanku,+ chay karpamanmi Absalonqa llapa Israel runakunaq rikushasqan+ jaykurqan jinaspa papanpa tiyaqmasin warmikunawan puñurqan.+
23 Chay p’unchaykunapiqa Ahitofelpa yuyaychasqankunataqa+ Diospa rimasqanpas kanman* jinatan qhawariqku. Chhaynatan Davidpas Absalonpas qhawariqku Ahitofelpa llapa yuyaychasqankunataqa.