Romanos
10 Wayqeykuna,* noqaqa tukuy sonqoywanmi munashani paykuna salvasqa kanankuta, chaytan Diosmantapas rogakushani.+ 2 Noqaqa allintan yachani tukuy sonqowan Dios serviy munasqankuta,+ ichaqa manan allintachu paymanta yachanku. 3 Paykunaqa manan yachankuchu imaninchus Dios juj runa chanin kananpaq chayta,+ aswanpas munayninkuman jinallan chanin kayta munanku,+ manataq Diospa nisqanman jinachu.+ 4 Cristowanmi kamachikuy simiqa tukupun,+ chhaynapi pipas iñiqqa chanin kananpaq.+
5 Kamachikuy simirayku chaninpaq jap’isqa kaymantan Moisés qelqarqan: “Chaykunata kasukuq runaqa chay kamachikuyraykun kausanqa”,+ nispa. 6 Ichaqa Diospa siminqa nillantaqmi runaqa iñisqanrayku chaninpaq jap’isqa kananta, khaynatan nin: “Aman sonqoykipi ninkichu:+ ¿Pitaq janaq pachatari wichanqa?,+ nispaqa (chayqa, ¿pitaq janaq pachatari wichanqa, chhaynapi Cristota uraykachimunanpaq?, ninantan nin). 7 Aman, ¿pitaq chinkay-chinkay ukhumanri jaykunqa?,+ ninkipaschu (chayqa, ¿pitaq chinkay-chinkay ukhumanri jaykunqa, chhaynapi Cristota wañusqanmanta kutichimunanpaq?, ninantan nin)”, nispa. 8 Ichaqa, ¿imanintaq Diospa siminri chaymanta? “Kamachikuy simiqa qayllaykipin kashan, simiykipi sonqoykipi iman kashan”+ nispan nin; chay “simiqa” iñiywan chaskina simin, chay simimantan noqanchisqa willashanchis. 9 Simiykiwanchus runa qayllapi rimanki: “Jesusqa Señormi”,+ nispa; sonqoykiwantaqchus iñinki Diosqa wañusqamanta kausarichimusqanpi chayqa, salvasqan kanki. 10 Chanin kanapaqqa tukuy sonqowanmi iñina, salvasqa kanapaqtaq chay simimanta jujkunaman willana.+
11 Diospa simin qelqapas ninmi: “Manan pipas paypi iñiqqa p’enqaypichu tarikunqa”,+ nispa. 12 Judío runakunawan griego runakunawanqa igual-llan kanchis,+ juj Señorllataqmi llapapaqpas kan; payqa llapa wajakuqninkunapaqmi qoykukuqllaña.* 13 Chaymantapas “Jehová* Diospa sutinta llapa wajakuqkunaqa salvasqan kanqaku”.+ 14 Ichaqa, ¿imaynatan wajakunkuman paypi mana iñishaspanku? ¿Imaynatan iñinkuman paymanta mana uyarishaspanku? ¿Imaynatan uyarinkuman paykunaman mana pipas willashaqtin? 15 ¿Imaynatan paykuna willankuman mana kachasqa kashaspa?+ Qelqasqa kasqanman jina, “¡may munaymi allin willakuykunata willaqkunaq chakinqa!”.+
16 Chaywanpas, manan llapankuchu kasukurqanku chay allin willakuykunataqa. Chaymi profeta Isaiaspas nirqan: “Jehová* Diosníy, ¿pitaq iñirqan imachus willasqaykupi?”,+ nispa. 17 Chhaynaqa, willasqata uyarispallan pipas iñin.+ Chay willakuytaqa uyarikun Cristomanta pipas rimallaqtinmi. 18 Ichaqa, ¿nisunmanchu: “Manan pipas chay willakuytaqa uyarirqanchu”, nispa? ¡Manapunin! Aswanpas chay “willakuyqa pachantinmanmi chayarqan, yachachiyninkuqa kay pachaq k’uchunkunakamaraqmi chayarqan”.+ 19 Chaywanpas, ¿nisunmanchu: “Israel runakunaqa manan yacharqankuchu”,+ nispa? ¡Manapunin! Paykunaqa yacharqankun. Moisespas nirqanmi: “Waj nacionkunawanmi sonqoykichista nanachisaykichis; mana yuyayniyoq nacionkunawanmi sonqoykichista t’impurichisaq”,+ nispa. 20 Isaiaspas mana manchakuspan Diospa nisqanta nirqan: “Mana maskhawaqkunawanmi tarichikurqani,+ noqamanta mana tapurikuqniykunawanmi reqsichikurqani”,+ nispa. 21 Israel runakunamantan ichaqa nirqan: “P’unchay ch’isiyaqtan makiyta jaywarirqani mana uyarikuq k’ullu llaqtaman”,+ nispa.