2 Samuel
6 Davidmi jujmanta juñurqan Israelmanta kinsa chunka waranqa aswan allin soldadokunata. 2 Jinan Davidqa llapa soldadonkunapiwan Bale-Judá llaqtaman rirqanku, chaymanta Diospa rimanakuynin arcata*+ apamunankupaq. Diospa rimanakuynin arcaq ñaupanpin runakunaqa ejercitokunata kamachiq Jehová Diospa sutinta wajakunku,+ paymi querubín angelkuna patapi* kaq trononpi tiyaq Diosqa.+ 3 Diospa rimanakuynin arcaqa moqo patapin kasharqan, Abinadabpa wasinpi.+ Chay arcata apamunankupaqqa mosoq carretamanmi churarqanku.+ Chay carretatan Abinadabpa iskaynin churinkuna, Juzawan Aiyowan aparqanku.
4 Chhaynatan Diospa rimanakuynin arcata Abinadabpa wasinmanta aparqanku. Aiyoqa rimanakuy arcaq ñaupantan risharqan. 5 Davidpas llapa Israel runakunapas ancha kusisqan Jehová Diospa ñaupanta risharqanku, enebro k’ullumanta tocanakunawan, arpakunawan, cuerdayoq tocanakunawan,+ panderetakunawan,*+ chhaqchanakunawan,* platillokunawan+ ima. 6 Nacón era pataman* chayaqtinkutaq carreta aysamuq torokunaqa yaqalla Diospa rimanakuynin arcata urmachirqanku, jinan Juzaqa makinwan ayparuspa chay rimanakuy arcata jap’irurqan.+ 7 Chaymi Jehová Diosqa Juzapaq sinchita phiñakurqan, jinan kaq ratupacha chaypi wañuchipurqan+ kamachikuyninta mana respetasqanrayku.+ Chhaynapin Juzaqa Diospa rimanakuynin arcaq ladonpi wañupurqan. 8 Davidmi ichaqa Jehová Diospaq sinchita phiñakurqan Juzata chhaynata wañuchisqanrayku. Chaymi chay cheqasta kunankama sutichakun Pérez-Juzá* nispa. 9 Chay p’unchaymi Davidqa Jehová Diospaq manchasqa kasharqan,+ chaymi nirqan: “Chhaynaqa, ¿imaynatataq Jehová Diospa rimanakuynin arcatari tiyasqayman apasaq?”,+ nispa. 10 Chaymi Davidqa Jehová Diospa rimanakuynin arcata mana apayta munarqanchu tiyasqan llaqtaman, Davidpa Llaqtan+ nisqaman. Aswanmi Gaj* llaqtayoq Obed-Edompa wasinman apachirqan.+
11 Jehová Diospa rimanakuynin arcaqa kinsa killañan Gaj llaqtayoq Obed-Edompa wasinpi kasharqan. Jehová Diostaq Obed-Edomta wasinpi kaqkunata bendecisharqan.+ 12 Chaytan Davidman willamurqanku, nirqankun: “Jehová Diosmi Obed-Edompa wasinpi rimanakuy arca kasqanrayku Obed-Edomta, familianta, tukuy kaqninkunatawan bendecishan”, nispa. Chayta yachaspan Davidqa kusisqa Obed-Edompa wasinta rirqan, Diospa rimanakuynin arcata Davidpa Llaqtan nisqaman apamunanpaq.+ 13 Jehová Diospa rimanakuynin arcata apamuqkuna+ soqta thaskiyta puririmuqtinkutaq Davidqa Diosman sacrificiota jaywarqan juj torota juj wira animaltawan.
14 Davidqa Jehová Diospa ñaupanpin tukuy kallpanwan muyu-muyurispa tususharqan. Payqa linomanta unkuwan* churasqan kasharqan.+ 15 Davidqa llapa Israel runakunawan kuskan Jehová Diospa rimanakuynin arcata+ apasharqanku oveja waqrakunata tocaspa,+ kusisqa qaparispanku ima.+ 16 Jehová Diospa rimanakuynin arcata Davidpa Llaqtan nisqaman chayachiqtinkutaq, Saulpa ususin Micalqa+ ventanamanta qhawarimuspa rey Davidta rikumurqan Jehová Diospa ñaupanpi salta-saltarispa muyu-muyurispa tusushaqta. Chayta rikuspan Micalqa Davidta sonqonpi pisicharqan.+ 17 Jehová Diospa rimanakuynin arcataqa Davidpa ruwachisqan karpamanmi apaykurqanku.+ Chaymantataq Davidqa ruphachina sacrificiokunata+ sumaq kausay sacrificiokunatawan+ Jehová Diospa ñaupanpi jaywarqan.+ 18 Chay ruphachina ofrendakunata sumaq kausay sacrificiokunatawan jaywayta tukuspataq Davidqa ejercitokunata kamachiq Jehová Diospa sutinpi llapa runakunata bendecirqan. 19 Chaymantapas llapa llaqtamanmi, llapa Israel runakunamanmi qharimanpas warmimanpas sapankaman qorqan t’antata, dátil tortata, pasas tortatawan.* Chay qhepamantaq runakunaqa sapankanku wasinkuman ripurqanku.
20 Wasinpi kaqkunata bendecinanpaq David kutimuqtintaq Saulpa ususin Micalqa+ Davidman aypaspa nirqan: “¡Qhawariychis Israel llaqtaq reyninta, pay kikinmi pisichakun! ¡Waq’a jina p’enqayta p’achanta q’alarukuspa oficialninkunaq warmi kamachinkunawan millayta qhawachikushan!”,+ nispa. 21 Jinan Davidqa Micalta nirqan: “Manan yanqachu noqaqa festejashani, Jehová Diospa rimanakuynin arcata apamusqayraykun noqaqa paypa ñaupanpi festejashani. Jehová Diosmi taytaykiq rantinpi familianpa rantinpiwan noqata ajllawarqan, paymi Israel llaqtanpi umalli kanaypaq churawarqan.+ Chayraykun noqaqa Jehová Diospa ñaupanpi festejashallasaq. 22 Astawanraqmi juch’uyaykukusaq, imaymanatataq ruwasaqpas mana imapaschu kasqayta rikuchinaypaq. Pi warmikunamantachus rimarqanki chay warmi kamachikunan ichaqa jatunchawanqaku”, nispa. 23 Saulpa ususin Micalqa+ mana wawayoqmi wañukapurqan.