2 Samuel

9 Davidmi nirqan: “¿Kausashanmanraqchu pillapas Saulpa familianmanta Jonatanrayku payta khuyapayanaypaq?”,*+ nispa. 2 Saulpa kamachinmi karqan Zibá,+ payta wajachimuspan rey Davidqa nirqan: “¿Qanchu kanki Zibá?”, nispa. Paytaq nirqan: “Arí, noqan kani”, nispa. 3 Jinan rey Davidqa tapurqan: “¿Kausashanraqchu pillapas Saulpa familianmanta Diospa mana tukukuq munakuyninta payman rikuchinaypaq?”, nispa. Jinan Zibaqa nirqan: “Arí, kashanraqmi Jonatanpa juj wawan, payqa iskaynin chakinmantan wist’u”,+ nispa. 4 Chaymi rey Davidqa tapullarqantaq: “¿Maypitaq payri kashan?”, nispa. Zibataq nirqan: “Payqa Lo-Debarpin kashan, Amielpa churin Makirpa+ wasinpi”, nispa.

5 Chaymi rey Davidqa kaq ratupacha Amielpa churin Makirpa wasinmanta Mefiboset-ta apachimurqan. 6 Jinan Jonatanpa churin Saulpa nieton Mefibosetqa Davidpa kasqanman jaykurqan, jinaspa qonqorikuspa pampakama k’umuykurqan. Davidtaq nirqan: “¡Mefibóset!”, nispa, paytaq nirqan: “Wiraqocháy, kaypin kashani”, nispa. 7 Davidtaq nirqan: “Ama manchakuychu. Noqan papayki Jonatanrayku khuyapayasayki.*+ Jinaspapas abueloykiq jallp’ankunatan llapanta kutichipusayki, noqawan kuskataqmi sapa p’unchay mesaypi mijunki”,*+ nispa.

8 Jinan Mefibosetqa jujmanta qonqorikuspa pampakama k’umuykurqan, jinaspa nirqan: “¿Imataq noqari kani, noqa wañusqa alqomanta+ yuyarikuwanaykipaqri?”, nispa. 9 Chaymantataq rey Davidqa Saulpa kamachin Zibata wajachirqan, jinaspa nirqan: “Saulpa llapa kaqninkunatan, familianpa kaqninkunatawanmi patronniykiq nietonman qopusaq.+ 10 Qanmi wawaykikunawan, kamachiykikunawan ima Mefibosetpa chajrankunata llank’anki, chhaynapi paypa familian mijunanpaq. Patronniykiq nieton Mefibosetmi ichaqa sapa p’unchay mesaypi mijunqa”,+ nispa.

Zibapa wawankunan karqan chunka pisqayoq, kamachinkunataq karqan iskay chunka.+ 11 Chaymantataq Zibaqa rey Davidta nirqan: “Reyníy, noqaqa tukuy niwasqaykitan ruwasaq”, nispa. Chaymantapachan Mefibosetqa reypa wawan jina Davidwan kuska mesanpi mijurqan. 12 Zibapa wasinpi kaq lliu runakunataq Mefibosetpa kamachin kapurqanku. Mefibosetpan karqan juch’uy wawachan, sutinmi karqan Micá.+ 13 Mefibosetqa Jerusalenpin tiyapurqan, chaypin rey Davidwan kuska sapa p’unchay mijuq.+ Mefibosetqa iskaynin chakinmantan wist’u karqan.+