2 Samuel

8 Tiempowantaq Davidqa Filistea runakunata+ atipaspa paykunata kamachipurqan,+ Meteg-Amatataq qechupurqan.

2 Chaymantapas Moab runakunatan atipallarqantaq.+ Chay atipasqan runakunatan filapi pampaman kumparuspa kinsaman t’aqarqan.* Iskay t’aqatan wañuchirqan, juj t’aqatataq kausashaqllata saqerqan.+ Chhaynapin Moab runakunaqa Davidpa kamachinkuna kapurqanku, impuestotapas payman pagarqanku.+

3 Zobá+ llaqtaq reynin Adadezermi risharqan Éufrates mayu+ ladopi kaq jallp’akunata jujmanta jap’ikapuq, chaypin rey Davidqa payta atiparqan. Adadezerqa Rehofpa churinmi karqan. 4 Davidqa Adadezerpa soldadonkunatan presota jap’irqan waranqa qanchis pachaj caballokunapi sillaykusqa soldadokunata, iskay chunka waranqa chakillapi puriq soldadokunatawan. Chaymantataq carretakunata aysaq caballokunaq jank’unta kuchurqan, pachaj caballokunallatañan mana imanarqanpaschu.+

5 Damasco+ llaqtapi tiyaq Siria runakunan jamurqanku Zobá llaqta rey Adadezerta yanapaq, Davidmi ichaqa paykunamanta iskay chunka iskayniyoq waranqa Siria runakunata wañuchirqan.+ 6 Davidqa Siriapi kaq Damasco llaqtapin soldadonkunata churarqan, chhaynapin Siria runakunaqa paypa kamachinkuna kapurqanku, impuestota imataq pagaqku. Maytaña David maqanakuq riqtinpas Jehová Diosqa atipachillaqpunin.*+ 7 Chaymantapas Davidqa Adadezerpa kamachinkunamantan qechurqan qorimanta jark’apakuna muyu escudonkuta, chaytataq Jerusalenman aparqan.+ 8 Davidqa apallarqantaqmi Béta llaqtamanta Berotái llaqtamantawan askha cobreta. Chay llaqtakunaqa Adadezerpa kamachisqan llaqtakunan karqan.

9 Amaj+ llaqta rey Toin yacharurqan Adadezerpa soldadonkunata David lliuta atipasqanta.+ 10 Jinan chay reyqa wawan Joranta kacharqan Davidpa kasqanman, chhaynapi imaynachus kashasqanta tapumunanpaq, Adadézer reyta atipasqanmanta felicitamunanpaqwan. (Rey Adadezerqa askha kutipin maqanakurqan Toi reywan). Joranqa qolqemanta, qorimanta, cobremanta imaymana ruwasqakunatan Davidman aparqan. 11 Chay regalokunatan rey Davidqa Jehová Diospaq t’aqarqan,* imaynan juj nacionkunamanta qechumusqan qoriwanpas qolqewanpas ruwarqan jinata.+ 12 Chaykunatan qechumurqan: Siria runakunamanta, Moab runakunamanta,+ Anmón runakunamanta, Filistea runakunamanta,+ Amalec runakunamanta,+ Zobá llaqta rey Adadezermanta+ ima. 13 Chaymantapas Davidqa chunka pusaqniyoq waranqa Edom runakunatan Kachi wayq’opi wañuchirqan,+ chaywanmi Davidqa aswan reqsisqa kapurqan. 14 Jinan Davidqa soldadonkunata lliu Edom llaqtapi churarqan, chhaynapin llapa Edom runakunaqa paypa kamachinkuna kapurqanku.+ Maymanña David maqanakuq riqtinpas Jehová Diosqa atipachillaqpunin.*+

15 Davidqa lliu Israel llaqtantintan chaninta juzgaspa kamachisharqan.+ 16 Zeruyapa churin Joabmi+ soldadokunaq umallin karqan, Ailujpa churin Jehosafat-taq+ reypa qelqaqnin karqan. 17 Aitufpa churin Sadocwan+ Abiatarpa churin Aimelecwantaq sacerdotekuna karqanku. Serayataq secretario karqan. 18 Jehoiadapa churin Benayataq+ karqan keretita runakunaq peletita runakunaq*+ umallin. Davidpa churinkunataq karqanku allin autoridadniyoq umallikuna.*