Marcos

6 Chaymanta rispan llaqtanman jaykurqan,+ discipulonkunapas paywan kuskan rirqanku. 2 Samana p’unchay* kaqtintaq sinagogapi yachachiyta qallarirqan, yaqa llapa uyariqkunataq ancha admirasqa nirqanku: “¿Maypitaq kay runari kaykunata yacharamun?+ ¿Imaynapitaq khayna yachaytari tarimun? ¿Imaynapin atin milagrokuna* ruwaytapas?+ 3 ¿Manachu kay runaqa Mariaq wawan+ carpintero kashan?+ ¿Manachu payqa Santiagoq,+ Josepa, Judaspa, Simonpapas+ wayqen? ¿Manachu panankunapas kaypi tiyanku?”, nispa. Chaymi mana paypi iñiyta munarqankuchu. 4 Jesustaq paykunata nirqan: “Profetaqa maypipas allin respetasqan, kikin llaqtanpi kikin wasinpi imallan manaqa”,+ nispa. 5 Chaymi payqa mana askhatachu milagrokunata chaypi ruwarqan, aswanpas iskay kinsa onqosqakunallatan qhaliyachirqan makinta paykunaman churaykuspa. 6 Jesusqa anchatan admirakurqan mana iñiyniyoq kasqankumanta. Chaymantataq chaypi kaq llapa ayllukunata yachachispa purirqan.+

7 Chunka iskayniyoq apostolninkunata wajaspataq iskay-iskaymanta kachayta qallarirqan,+ paykunamanmi atiyta qorqan millay espiritukunata qarqonankupaq.+ 8 Jinaspa paykunata kamachirqan ama imatapas ñanpaq apanankupaq, ni t’antatapas ni qoqawatapas ni qolqetapas,* aswanpas taunallata.+ 9 Ichaqa nirqanmi churakusqanku usut’allawan cuerponkupi p’achallankuwan rinankupaq.* 10 Nillarqantaqmi: “Maypipas juj wasiman jaykuspaykichisqa chaypin qhepakunkichis chay llaqtamanta lloqsipunaykichiskama.+ 11 Maypipas mana chaskisunkichischu ni uyarisunkichispaschu chayqa, chaymanta lloqsipushaspan chakiykichispi kaq jallp’ata chhafchirparinkichis, chhaynapi mana allin ruwasqankuta rikuchinaykichispaq”,+ nispa. 12 Jinan paykunaqa chaymanta rispa allin willakuykunata runakunaman willarqanku juchankumanta pesapakunankupaq.+ 13 Askhatan supaykunatapas qarqorqanku,+ askha onqosqakunatataq aceitewan jawispa qhaliyachirqanku.

14 Chaykunatan rey Herodesqa* uyarirqan runakuna tukuyneqpi Jesusmanta rimasqankurayku, paykunan nisharqanku: “Bautizaq Juanmi wañusqanmanta jatarimun, chaymi payqa milagrokunata ruwashan”,+ nispa. 15 Wakin runakunataq nisharqanku: “Payqa Eliasmi”, nispa. Wakintaq nisharqanku: “Payqa profetan, ñaupa profetakunamanta jujnin jina”,+ nispa. 16 Herodestaq chayta uyarispa nirqan: “Kayqa umanta wit’uchisqay Juanpunin kanman, payqa wañusqanmantachá jatarichisqa karqan”, nispa. 17 Herodesqa wayqen Felipeq esposan Herodiaswanmi casarakusqa,+ chay warmiq causanpin payqa Juanta presota jap’ichispa watasqata carcelman wisq’achisqa. 18 Juanqa askha kutipin Herodesta nisqa: “Manan allinchu wayqeykiq esposanwan kasqaykiqa”,+ nispa. 19 Chaymi Herodiasqa Juanta sinchita cheqnikuspa wañuchiyta munarqan, ichaqa manan atirqanchu. 20 Herodesqa yacharqanmi Juanqa chanin runa, Dios sonqo runa kasqanta,+ chaymi payta manchakurqan, manataq munarqanchu imananankutapas. Sapa kutilla Juanpa rimasqanta uyarispan Herodesqa mayta iskayaq imatachus ruwananmanta, ichaqa kusisqan paytaqa uyariq.

21 Herodiaspa suyasqan p’unchaymi chayamurqan. Herodesmi nacesqan p’unchay fiestanpi+ umalli runankunaman, ejercitopi comandantekunaman,* Galileapi allichachaq runakunamanwan jatun mijuyta jaywasharqan.+ 22 Jinan Herodiaspa ususinqa jaykuspa tusurqan, chaywantaq Herodesta invitasqan runakunatawan anchata kusichirqan. Chaymi rey Herodesqa chay sipasta nirqan: “Ima munasqaykitapas mañakullaway, jinan qosayki”, nispa. 23 Jurasparaqmi nirqan: “Imapas mañakuwasqaykitaqa qosaykipunin, kamachisqay llaqtaq kuskannintaña mañakuwanki chaypas qosaykin”, nispa. 24 Chaymi sipasqa chaymanta lloqsispa mamanta tapurqan: “¿Imatan mañakuyman?”, nispa. Mamantaq nirqan: “Bautizaq Juanpa umanta mañakuy”, nispa. 25 Jinan payqa reypa kasqanman phawaylla jaykuspa mañakurqan: “Bautizaq Juanpa umanta kunanpacha juj platopi qoway”,+ nispa. 26 Reyqa sinchitan chaywan llakikurqan, ichaqa jurasqanrayku invitasqan runakunarayku iman mana atirqanchu “manan” niyta. 27 Jinan reyqa kaq ratu guardiata kamachirqan Juanpa umanta apamunanpaq. Paytaq carcelta rispa umanta wit’umurqan, 28 jinaspa juj platopi apamuspa chay sipasman qorqan, paytaq mamanman aparqan. 29 Juanpa discipulonkunataq chayta yachaspa jamurqanku, ayanta apapuspataq p’ampapurqanku.

30 Apostolkunataq Jesuspa kasqanman juñukuspanku willarqanku tukuy ima ruwamusqankumanta yachachimusqankumantawan.+ 31 Paykunapaqqa manan mijunallankupaqpas tiemponku kaqchu, askha runakuna sapa ratu jamusqanrayku. Chaymi Jesusqa paykunata nirqan: “Jaku ch’in ladoman chaypi juj chhikanta samarimunaykichispaq”,+ nispa. 32 Jinan paykunaqa botepi juj ch’in ladoman rirqanku sapallanku kanankupaq.+ 33 Runakunan ichaqa maymanchus rishasqankuta rikurqanku, juj runakunapas yacharurqankun chayta, chaymi llapan llaqtakunamanta chakillapi phawaspa ñaupaqtaraq chayarqanku. 34 Botemanta lloqsispataq Jesusqa ancha askha runakunata rikurqan, jinaspa anchata paykunata khuyapayarqan+ mana michiqniyoq ovejakuna jina kasqankurayku.+ Chaymi imaymanata paykunaman yachachiyta qallarirqan.+

35 Tardeña kaqtintaq discipulonkunaqa payman qayllaykuspa nirqanku: “Kayneqqa ch’inmi, tardeñataqmi kanpas.+ 36 Chayrayku kachapullayña paykunata, chhaynapi campokunata ayllukunata rispa imallatapas rantikuspa mijunankupaq”,+ nispa. 37 Jesustaq paykunata nirqan: “Qankunayá imallatapas mijuchiychis”, nispa. Jinan paykunaqa nirqanku: “Llapankupaqqa iskay pachaj denario qolqewanchá* t’antata rantimunayku kanman,+ ¿imaynatan chayta ruwaykuman?”, nispa. 38 Jinan Jesusqa paykunata nirqan: “Qhawaramuychis jayk’achus t’antaykichis kashan chayta”, nispa. Paykunataq jayk’achus kasqanta yachaspa nirqanku: “Pisqa t’antawan iskay challwallawanmi kashasqa”,+ nispa. 39 Jinan Jesusqa llapa runakunata kamachirqan t’aqa-t’aqapi q’omer pasto pampapi tiyaykunankupaq.+ 40 Chaymi t’aqa-t’aqapi tiyaykurqanku, pachaj-pachajmanta, pisqa chunka pisqa chunkamanta. 41 Pisqa t’antata iskay challwatawan jap’ispataq cielota qhawarispa graciasta qorqan.+ Jinaspan t’antata phasmispa discipulonkunaman jaywayta qallarirqan runakunaq ñaupanman churanankupaq, iskaynin challwakunatapas llapankupaqmi phasmirqan. 42 Chaymi llapallanku sajsanankukama mijurqanku, 43 puchuq phasmikunatataq chunka iskayniyoq canasta junt’ata juñurqanku, challwakunapas puchurqanmi.+ 44 T’antata mijuq qharikunaqa pisqa waranqan karqan.

45 Chay qhepamantaq Jesusqa discipulonkunata boteman seqachirqanpacha, chhaynapi qochaq chimpan Bejsaida ladoman ñaupashanankupaq, chaykamataq payqa runakunata kachapurqan.+ 46 Runakunata kacharparipuspataq juj orqoman rirqan Diosmanta mañakuq.+ 47 Ch’isinña kaqtinmi boteqa qocha chaupipiña kasharqan, Jesustaq orqopi sapallan kasharqan.+ 48 Chaymantataq discipulonkunata rikurqan ñaupankumanta sinchita wayramusqanrayku boteta ñak’ayta suchuchishaqta, chaymi Jesusqa manaraq illarimushaqtin* unu patanta purispa paykuna ladoman rirqan paykunata ñaupayta munaspa. 49 Jinan paykunaqa unu patanta purishaqta rikuruspa qaparirqanku: “¡Imataq jaqayri!”, nispa. 50 Llapallankun payta rikuspa mancharikurqanku. Chaymi Jesusqa kaq ratu paykunata nirqan: “¡Kallpachakuychis! Ama manchakuychischu, noqan kani”,+ nispa. 51 Boteman seqaqtintaq wayraqa thanipurqan, jinan anchatapuni admirakurqanku. 52 Paykunaqa manan entienderqankuchu t’anta askhayachisqanmanta imatachus yachananku karqan chayta, sonqonkupas rumiyasqan kasharqan entiendenankupaq.

53 Qochata chimpaspankutaq Genesaret ladoman chayarqanku, chay qayllapitaq boteta watarqanku.+ 54 Botemanta lloqsiqtinku jinan runakunaqa Jesusta reqsirurqanku. 55 Jinaspan phawaspa llapa chaykunapi tiyaqkunaman willamurqanku, jinan llapa onqosqakunata camillapi Jesusman apamuyta qallarirqanku. 56 May ayllukunamanña, llaqtakunamanña, campokunamanña jaykuqtinpas mercado plazakunapin onqosqakunata churaqku, chaypin rogakuqku jawa p’achanpa puntallantapas llamiykunankupaq.+ Llapa llamiykuqkunataq qhali kapuqku.