5 Wawaykichiskunawan sumaqta parlariychis

¿IMAYNATAN CHAYTA RUWAWAQ?

Wawaykichiswan parlarinaykichispaqqa tukuy yuyaywanmi uyarinaykichis imachus piensasqanta sonqonpi imachus kasqantawan.

¿IMARAYKUN WAWAYKIKUNAWAN PARLARINAYKI?

Wayna-sipaskunawan rimayqa sasan. Tú no me escuchas, yo no te entiendo libropi willashan juj tayta imayna sientekusqanta: “Wawaykuqa juch’uyllaraq kaspaqa lliutan imatapas willawaqku, wayna-sipas kapuspan ichaqa pisillataña imatapas willawanku”, nispa. Chhaynataña wawaykita qhawariwaq chaypas, sonqonkupiqa astawanmi munashanku qankunawan parlariyta.

¿IMAKUNATAN RUWAWAQ?

Liston kashanayki wawaykiwan parlanaykipaq. Nishu tutaña kaqtinpas wawayki qanwan rimayta munaqtinqa rimanaykichismi.

Luisa nin: “Mayninpiqa yaqapaschá niyta munawaq: ‘¡Chayraqchu niwanki, nakharaqchá niwankiman riki¡’, nispa. Chhaynata nisunman chayqa wawanchisqa manañan imatapas willawasunmanchu, chaytaqa manapunin tayta-mamaqa munasunmanchu”, nispa.

Hebermi nin: “Noqaqa tempranotan puñuyta munani, mayninpin ichaqa wawaykunawan kuska tuta pasayta parlayku, chay kutikunapi rimasqaykuqa ancha allinpunin karan”, nispa.

BIBLIAPIN NISHAN: “Sapanka jujpa allinninta maskhashachun, amataq paypa allinnintaraqchu”, nispa (1 Corintios 10:24).

Tukuy yuyaywanmi uyarinayki. Juj taytan nin: “Wawaykuna imatapas willawashaqtinmi mayninqa juj ruwaykunapi piensashani, chaytaqa ratollan wawakunaqa reparanku”, nispa.

Sichus qanpas chayta ruwashanki chayqa televisionta, celularta, ima ruwasqaykitapas saqespan wawaykita tukuy yuyaywan uyarinayki. Chhaynapin wawaykiqa reparanqa paypi piensasqaykita yanapay munasqaykitapas.

María nin: “Wawanchiskunaqa sut’itan reparananku paykunata uyariy munasqanchista. Mana chayqa manan imatapas willawasunchu otaq jujkunaman willakunqaku”, nispa.

Anthony nin: “Wawayki mana allinta piensaykuspa imataña rimaqtinpas ama phiñakuychu”, nispa.

BIBLIAPIN NISHAN: “Allinta qhawarikuychis imaynatachus uyarisqaykichista”, nispa (Lucas 8:18).

Wawaykiwanqa maypipas rimashanallaykin. Mayninpiqa wayna-sipaskunaqa imatapas ruwashaqtiykichismi willasunkichis imachus piensasqankuta.

Nicol nin: “Wawaywan viajashaspaykun paywanqa astawan rimayku, carropiqa manan uya-uyapurachu tiyayku, chaymi wawayqa mana manchakuspa imatapas willawan”, nispa.

Mijusqaykichis ratopipas wawaykichiswanqa parlarinaykichismi.

Roberto nin: Ch’isinta mijushaspaykun wawaykuwan parlariyku, chaypin sapankayku willayku chay p’unchaypi imakuna pasawasqankumanta. Chayta ruwasqaykun yanapawanku juj jinalla kausanaykupaq, yanapanakunaykupaqpas”, nispa.

BIBLIAPIN NISHAN: “Llapaykichispas allin uyariqmi kanaykichis, manataqmi comuntachu rimanaykichis”, nispa (Santiago 1:19).