Faraonpa mosqokusqan

ISKAY watañan pasan, Josetaq carcelpiraq kashan. Copa haywaqqa manan Joseta yuyarinchu. Faraonmi huk tuta iskayta mosqokuran, munarantaqmi mosqoynin sut’inchanankuta. ¿Rikushankichu puñusqanta? Tutamantanmi Faraonqa yachayniyoqkunata waqyaspa willan mosqokusqanta. Ichaqa manan mosqokusqanta sut’inchayta atinkuchu.

Chayraqmi copa haywaqqa Joseta yuyariran. Faraontan niran: ‘Carcelpi kashaqtiymi huk runa mosqoykunata sut’incharan,’ nispa. Chaymi Faraonqa usqhaylla carcelmanta Joseta horqochimuran.

Mosqokusqantan Faraonqa Joseman willan: ‘Mosqoyniypin rikurani qanchis sumaq wira wakakunata. Rikullaranitaqmi qanchis tullu wakakunata. Tullu wakakunataq mikhupuran wira wakakunata’.

‘Iskay kaq mosqoyniypitaq rikurani ch’ulla tullullapi qanchis trigo umakuna wiñaqta, rurusapataq sumaqtaq karan. Rikullaranitaqmi ch’ulla tullullapi qanchis trigo umakunata ch’usu ch’akita. Ch’aki ch’usu trigo umakunan mikhupuran qanchis sumaq trigo umakunata’.

José Faraonta niran: ‘Iskaynin mosqoykunaqa kaqkamallan. Qanchis wira wakakunapas, qanchis sumaq trigo umakunapas qanchis watan, qanchis tullu wakakunapas, qanchis trigo ch’aki ch’usu umakunapas qanchis watallataqmi. Egipto suyupin qanchis wata askhallaña mikhuy kanqa. Qanchis watataq yarqay kanqa,’ nispa.

Chaymi Joseqa Faraonta niran: ‘Yachayniyoq runata akllay, hinaspa kamachiy qanchis allin watapi mikhunata huñunanpaq. Chaymi qanchis wata yarqay kanqa chaypas, runakunaqa yarqaymanta mana wañunqachu’.

Faraonqa kusikunmi chay uyarisqanwan. Josetan akllan mikhunata huñuspa waqaychananpaq. Egipto suyupiqa Faraonllan Josemantaqa aswan atiyniyoq karan.

Pusaq wata qhepatan, muchuy tiempopi Joseqa rikun huk llaqtamanta hamuq runakunata. ¿Pikunan karan? ¡Chunkantin kuraq wayqenkunan! Taytan Jacobmi Canaán llaqtapi mikhuna pisiyaqtin Egipto suyuta kacharan mikhuna rantinankupaq. Joseqa reqsinmi wayqenkunata, paykunan ichaqa mana reqsinkuchu. ¿Ima rayku? José poqosqa runañan karan, hukniray p’achawantaq p’achasqa kasharan.

Joseqa yuyarinmi erqecha kashaspa mosqoyninpi wayqenkuna payman k’umuykusqankuta. ¿Yuyashankichu chaymanta leesqaykita? Chay raykun Joseqa reparan allinkuna ruwananpaq Egipto suyuman Diospa pusasqanta. ¿Imatan José ruwan? Chaymanta yachasun.