Jacobwan Esauwan allipunanku

Jehová Diosmi Jacobta prometerqan cuidananpaq, imaynan Abrahantapas Isaactapas cuidarqan jinata. Jacobqa Harán llaqtapin tiyapurqan, chaypin casarakurqan, wawakunayoq karqan, qhapaq runamanpas tukupurqan.

Tiempowanmi Jehová Diosqa Jacobta nirqan: “Papaykiq wasinman kutipuy”, nispa. Jinan Jacobqa familianwan viajayta qallarirqanku. Chay qhepamanmi ñanta rishaqtinku serviqnin runakuna Jacobman kutimuspa willarqanku: “Hermanoyki Esaumi 400 runakunantin jamushanku”, nispa. Jacobqa manchasqan kasharqan hermanon Esaú paytapas familiantapas wañuchinanmanta. Chaymi Jehová Diosta valekurqan: “Ama jinachu kay hermanoymanta libraway”, nispa. Qhepantin p’unchaytaq Jacobqa Esauman regalota apachirqan: askha ovejata, cabrata, wakata, camellota, asnotapas.

Chay tutan Jacobqa sapallan kashaspa juj angelta rikurqan. Jinan angelwan jap’inakuyta qallarirqan. Paqarimunankaman Jacobqa k’irisqaña kashaspapas mana angelta kacharirqanchu. Jinan angelqa nirqan: “Kachariway”, nispa. Jacobtaq nirqan: “Manan kacharisaykichu bendeciwanaykikama”, nispa.

Chaymi angelqa Jacobta bendecirqan. Chaywanmi Jacobqa yacharqan hermanon Esaumanta Jehová Dios jark’aykunanta.

Chay p’unchaymi Jacobqa hermanon Esauta 400 runankunatawan karumanta rikurqan. Jinan Jacobqa ñauparirqan Esauwan tupananpaq, paypa qayllanman chayaspataq qanchis kutita pampaman k’umuykurqan. Jinan Esauqa payman phawaykuspa abrazaykurqan. Iskayninkun waqaykuspanku allipunapurqanku. ¿Kusikurqanchu Jehová Dios Jacobpa ruwasqanwan?

Chay qhepamanmi Esauqa wasinman kutipurqan, Jacobtaq viajashallarqan. Jacobqa 12 qhari wawakunayoqmi karqan. Sutinkun karqan: Rubén, Simeón, Leví, Judá, Dan, Neftalí, Gad, Aser, Isacar, Zabulón, José, Benjamín ima. Unay watakuna qhepamanmi Jehová Diosqa llaqtanta salvarqan Jacobpa wawan Josewan. ¿Imaynatan salvarqan? ¿Yachayta munawaqchu? Qatimuqpin chaymanta yachasun.