Jacob herenciata chaskin

Isaacqa 40 watanpi kashaspan Rebecawan casarakurqan. Payqa anchatan esposanta munakurqan. Tiempowanmi iskay gemelo wawakunayoq karqanku.

Kuraq kaqmi karqan Esaú qatiqnintaq karqan Jacob. Esauqa campotan riq salqa animalkunata cazaq. Jacobmi ichaqa wasipi qhepakuq.

Chay tiempopiqa kuraq wawankumanmi tayta-mamaqa wañupuspa aswan qolqeta aswan askha jallp’atapas saqeqku. Chaytan nikun herencia nispa. Isaacpa familianpiqa manan chaykunallatachu kuraq kaq wawaqa chaskiq, Abrahanman Jehová Diospa prometesqantawanmi chaskiq. Esauqa mana valeqpaqmi chay promesata qhawariq. Jacobmi ichaqa anchata valoraq chay promesata.

Juj p’unchaymi Esauqa campopi cazamusqanmanta sayk’usqallaña wasiman kutimurqan. Jinan Jacobpa wayk’usqan mijuna sumaqta q’apamushasqanta reparaspa nirqan: “¡Yarqaymantan wañushaniña! ¡Mijunaykita qoykuway!”, nispa. Jinan Jacobqa nirqan: “Ñaupaqta prometeway herenciaykita qopuwanaykipaq”, nispa. Esautaq nirqan: “¡Munaspaykiqa jap’ikapuy! Noqaqa mijunatan munani”, nispa. ¿Allinchu karqan chay ruwasqan? Manan allinchu karqan, payqa juj plato mijunawanmi ancha valorniyoq herenciata cambiapurqan.

Machuyapuspan Isaacqa kuraq wawanta bendeciyta munarqan. Rebecan ichaqa munarqan Jacobta bendecinanta, jinan yanaparqan. Chayta yacharuspan Esauqa sinchita phiñakurqan, jinaspa yuyaykurqan hermanonta wañuchinanpaq. Isaacpas Rebecapas manan munarqankuchu Jacob wañunanta, chaymi payta nirqanku: “Tioyki Labanpa llaqtanman ripuy, hermanoykiq sonqon tiyaykunankama”, nispa. Jacobqa tayta-mamanta kasukuspan ripurqan.