Elisabet wawayoq kapun

Jerusalén llaqtaq perqankuna sayarichisqa kasqanmantaqa 400 watakunañan pasarqan. Juj sacerdoteq sutinmi karqan Zacarías, payqa esposayoqmi karqan, Jerusalén llaqtaq qayllanpitaq tiyarqanku. Unayñan kuska tiyarqanku ichaqa manan wawanku karqanchu. Juj p’unchaymi Zacariasqa templopi kaq ch’uya cuartopi inciensota q’apachisharqan, jinan ángel Gabriel payman rijurirqan. Zacariasqa sinchitan mancharikurqan, angelmi ichaqa nirqan: “Ama manchakuychu, juj sumaq noticiatan willasayki, esposaykin juj qhari wawata onqokunqa, sutintaq kanqa Juan. Diosmi payta ajllan juj sumaq llank’aypaq”, nispa. Zacariastaq nirqan: “¿Imaynapin chay pasanman? Noqaykuqa kuraqñan kayku wawayoq kanaykupaq”, nispa. Gabrieltaq nirqan: “Noqataqa Diosmi kachamuwarqan kayta willanaypaq. Mana creewasqaykiraykun mana rimayta atinkichu wawayki nacenankama”, nispa.

Zacariasqa unaymi ch’uya cuartopi kamurqan. Lloqsimuqtintaq runakunaqa yachayta munarqanku paywan imachus pasasqanta. Zacariasqa manan rimayta atirqanchu. Makinkunallawanmi señakunata ruwarqan. Chaypin runakunaqa yacharqanku Zacariasqa Diosmanta juj mensajeta uyarisqanta.

Tiempowanmi Elisabetqa juj qhari wawata onqokurqan angelpa willasqanman jina. Chaymi amigonkunapas parientenkunapas anchata kusikurqanku. Elisabetmi nirqan: “Juanmi sutin kanqa”, nispa. Paykunataq nirqanku: “Familiaykipiqa manan pipas chay sutiyoqqa kanchu, papan jina Zacarías sutiyoq kachun”, nispa. Zacariasta tapuqtinkutaq payqa qelqarqan “Juanmi sutinqa” nispa. Chay ratupin Zacariasqa wajmanta rimaripurqan. Chay wawamanta noticiataqa llaqtantinpi runakunan uyarirqanku, jinan nirqanku: “¿Imachá kay wawaqa kanqa?”, nispa.

Jinan Zacariasqa santo espirituq junt’aykusqan nirqan: “Jehová Diosta jatunchasun. Paymi Abrahanman prometerqan salvawananchispaq Mesiasta kachamunanpaq. Juantaq profeta kaspa Mesiaspaq ñanta preparanqa”, nispa.

Jinaspapas Elisabetpa parienten Mariapaqmi sumaq noticia kallarqantaq. Chaytan qatimuq willakuypi yachasun.