Jesús Mesías kapun

Bautizaq Juanmi willasharqan: “Noqamanta aswan atiyniyoqmi jamushan”, nispa. 30 watanpi jina Jesús kashaqtinmi Galileamanta Jordán mayuman rirqan, chaypin Juan runakunata bautizasharqan. Jesusqa Juanwanmi bautizachikuyta munarqan. Paymi ichaqa nirqan: “Qanmi bautizawanaykiqa manan noqachu”, nispa. Jesustaq nirqan: “Diosmi munan bautizawanaykita”, nispa. Chaymi Jordán mayuman jaykuspanku Jesusta unuman chinkaykachispa bautizarqan.

Unumanta lloqsimuspan Jesusqa Diosmanta mañakurqan. Chay ratupin janaq pacha kicharikurqan, jinaspa santo espíritu paloma jina Jesusman uraykamurqan. Jinan Jehová Dios nimurqan: “Qanmi munakusqay Churiyqa kanki, qanqa sonqoypaq jinan kanki”, nispa.

Chhaynatan Jesusqa Diospa espiritunta chaskirqan, chaymantapachan Mesías kapurqan. Kunanqa atirqanñan Jehová Diospa munasqanta kay pachapi ruwayta.

Bautizakusqan qhepallamanmi Jesusqa ch’inneqta rirqan, 40 p’unchaymi chaypi kamurqan. Kutimuspan Juanpa kasqanman rirqan. Payman Jesús jamushasqanta rikuspan Juanqa nirqan: “Paymi Diospa corderon, runakunaq juchantan pichanqa”, nispa. Chaytaqa nirqan runakuna Jesús Mesías kasqanta yachanankupaqmi. ¿Iman Jesusta pasarqan ch’inneqpi kashaqtin? Chaymantan qatimuqpi yachasun.