Juan ñanta preparan

Zacariaspa Elisabetpa wawanku Juanmi wiñaspa profeta karqan. Diosmi Juanta ajllarqan Mesías jamunanmanta runakunaman yachachinanpaq. Ichaqa manan sinagogapichu nitaq llaqtapichu yachachirqan, aswanpas ch’inneqpi. Runakunaqa Judea llaqtakunamanta Jerusalenmanta iman Juanta uyarinankupaq rirqanku. Jinan paykunaman yachachirqan Diosta kasukunankupaq, mana allin ruwayninkuta saqepunankupaqpas. Chayta uyarispan askha runakuna juchankumanta pesapakuspa Juanwan Jordán mayupi bautizachikurqanku.

Juanqa camelloq willmanwan ruwasqa p’achawanmi churakurqan, mielta langostakunata iman mijurqan. Askhan paymanta yachayta munarqanku, chaymi orgulloso fariseokunapas, saduceokunapas payta rikuq rirqanku. Juanmi paykunata nirqan: “Juchaykichistan saqepunaykichis. Abrahanpa wawanmi kayku nispaña ninkichis chaypas manan Diospa wawankunachu kankichis”, nispa.

Askhan Juanta tapurqanku: “¿Imatan ruwanayku Diosta kusichinaykupaq?”, nispa. Juantaq nirqan: “Iskay p’achayoq kankichis chayqa, jujninta necesitaq runaman qoychis”, nispa. ¿Imaraykun chayta nirqan? Runamasinku munakuyta yachanankupaq, chhaynapin Diospa sonqonta kusichinkuman.

Juanqa impuesto cobraqkunatan nirqan: “Honrado kaychis, amataq pitapas engañaychischu”, nispa. Soldadokunatataq nirqan: “Ama llullakuychischu nitaq lluk’iytapas chaskiychischu”, nispa.

Sacerdotekunapas, Leví runakunapas Juanman rispan tapurqanku: “¿Pitaq kanki? Llapankun yachayta munanku pichus kasqaykita”, nispa. Juantaq nirqan: “Noqaqa ch’inneqpi rimaqmi kani, runakunatan yanapani Diosman kutirikunankupaq, profeta Isaiaspa nisqan jina”, nispa.

Runakunaqa kusisqan uyariqku Juanpa yachachisqanta. Askhataq tapurqanku: “¿Qanchu Mesías kanki?”, nispa. Paytaq nirqan: “Qhepayta jamuqqa aswan atiyniyoqmi noqamanta. Manan usut’allantapas paskanaypaq jinachu kani. Noqaqa unullawanmi bautizani. Paymi ichaqa santo espirituwan bautizanqa”, nispa.