Pedro Jesusta negan

Altos cuartopi kashasparaqmi Jesusqa apostolninkunata nirqan: “Kunan tutan llapaykichis saqerpariwankichis”, nispa. Pedrotaq nirqan: “Llapankuña saqesuqtiykikupas, noqaqa manan saqesaykichu”, nispa. Jesusmi ichaqa nirqan: “Manaraq gallo waqashaqtinmi kinsa kutita negawanki”, nispa.

Soldadokuna Jesusta Caifaspa wasinman apaqtinkun yaqa llapa apostolkuna ayqekurqanku. Ichaqa iskay apostolkunan qatiparqanku runakuna ukhupi. Jujninmi karqan Pedro, payqa Caifaspa wasinpa pationpin nina qayllapi q’oñikusharqan. Jinan juj warmi kamachiqa Pedrota rikuspa nirqan: “¡Qantaqa reqsiykin, Jesuswanmi kasharqanki!”, nispa.

Chaymi Pedroqa nirqan: “¡Manan paytaqa reqsinichu!”, nispa. Punku ladoman riqtintaq juj warmiñataq runakunata nirqan: “Kay runaqa Jesuswanmi purirqan”, nispa. Pedrotaq nirqan: “¡Pichá kakunpas!”, nispa. Jinan juj qhariñataq nirqan: “Qanqa Jesuswanmi kasharqanki, pay jinan rimayniykipas”, nispa. Pedrotaq jurasparaq nirqan: “¡Manan reqsinichu!”, nispa.

Chay ratupin juj gallo waqamurqan. Pedrotaq rikurqan Jesús payta qhawamushasqanta jinan yuyarirqan Jesuspa nisqanta. Jinaspa jawaman lloqsispa khuyayta waqaykurqan.

Chaykaman juezkuna juñukurqanku Jesusta juzganankupaq. Rimanakurqankuñan Jesusta wañuchinankupaq, chaypaqmi ichaqa llulla testigokunata maskharqanku. Ichaqa manan imamantapas tumpayta atirqankuchu, jinan Caifasqa Jesusta tapurqan: “¿Qanchu Diospa Churin kanki?”, nispa. Jesustaq nirqan: “Arí, noqan kani”, nispa. Chaymi Caifasqa nirqan: “¡Diostan k’amishan!”, nispa. Llapa juezkunataq nirqanku: “¡Kay runaqa wañunanmi!”, nispa. Jinan ch’aqlarqanku, thoqaykurqanku, ñawinta tapaspataq saqmarqanku, nirqankutaq: “Profeta kanki chayqa, niwayku pichus saqmashasunki chayta”, nispa.

P’unchayamuqtinmi Jesusta aparqanku juezkunaq juzgananku salaman, jinaspa wajmanta tapurqanku: “¿Qanchu kanki Diospa Churin?”, nispa. Jesustaq nirqan: “Arí, qankuna kikiykichismi nishankichis”, nispa. Jinan nirqanku: “Diostan k’amin”, nispa. Jinaspa Poncio Pilato kamachikuqman aparqanku. ¿Iman chay qhepaman pasarqan? Qatimuqpi yachasun.